Read Cibverano Cipsa Cisena Lk. 1 Bible Online

Lk. 1 - Cibverano Cipsa Cisena bible

Lk. 1

¹Anthu azinji acita mphambvu za kulemba pinthu pidacitika pakati pathu,

²ninga mudapipangwa ife na ale akhali anyamaso kutomera pakutoma, pontho mbakhala anyabasa a fala ya Mulungu.

³Na tenepo, ine ndapipfundza pyonsene n'cidikho-dikho kutomera pakutoma. Pakumala, ndaona kuti mphyadidi ndikulembereni imwe wakulemebza Tiyofilu, cibodzi na cibodzi, pyonsene ninga mudacitikira ipyo,

⁴toera mukhonde kupenula pinthu pya ndimo mwene pidapfundziswa imwe.

⁵Pa n'dzidzi wa Herodhi mambo wa Djudeya, akhalipo nyantsembe m'bodzi akhacemerwa Zakariya. Iye akhali m'bodzi wa nsoka wa anyantsembe wa Abhiya. Nkazi wace akhali Zabere. Iye Zabere akhalimbo wa dzindza ya Arau.

⁶Zakariya na nkazi wace akhali anthu akulungama pamaso pa Mulungu. Iwo akhabvera mwakukwana myambo na matongero onsene a Mbuya.

⁷Mbwenye iwo hakhali na ana tayu, thangwi Zabere hakhabala tayu. Pontho mamuna na nkazi, akhadakulupala.

⁸Ntsiku inango, pa n'dzidzi ukhakhala nsoka wa Zakariya m'basa, iye akhacita basa yace ya unyantsembe patsogolo pana Mulungu.

⁹Ninga nsambo wa anyantsembe, iye amenyerwa ntsango mbasankhulwa toera apite mu Nyumba ya Mbuya, kuti aende kapisa pinthu pyakununkhira pinacemerwa isensu.[1]

¹⁰Pa n'dzidzi ukhapiswa isensu, mbumba yonsene ikhaphembera kunja.

¹¹Na tenepo, anju wa Mbuya abulukira pana Zakariya, mbalimira ku khundu ya madyo ya guwa ya ntsembe ikhapisirwa isensu.

¹²Zakariya na kuona anju, atutumuka mbagopa.

¹³Mbwenye anju ampanga kuti: “Leka gopa, Zakariya! Mulungu abva maphembero ako. Nkazi wako Zabere anadza kabala mwana-mamuna, dzina yace iwe unadza kan'thula Juwau.

¹⁴Kunaoneka kukomerwa na kutsandzaya muna iwe, na anangombo azinji anatsandzaya na kubaliwa kwace.

¹⁵Thangwi iye anakhala nkulu pamaso pa Mbuya. Pontho iye nkhabe kudza kamwa vinyu na pya kumwa pinango pya kuledzeresa. Anati adzale na Nzimu Wakucena kutomera m'mimba mwa mai wace.

¹⁶Na tenepo, anati aabweze pontho anthu azinji a mbumba ya Izarayeli aende kuna Mbuya Mulungu wawo.

¹⁷Iye anaenda patsogolo pa Mbuya, mu nzimu na mphambvu za Eliya, toera abweze mitima ya ababa kuna anawo, na kuna anthu akukhonda kubvera abwerere mwakulungama, kuti asasanyire mbumba toera iphatire basa Mbuya.”

¹⁸Mphapo Zakariya abvundzisa anju mbalonga kuti: “Ndinapidziwa tani pinthu penepi kuti ndimo mwenedi? Thangwi ine na nkazanga, tonsene ndife mankhalamba.”

¹⁹Anju antawira tenepa: “Ine ndine Gabhiriyeli, ndiri pamaso pa Mulungu midzidzi yonsene. Iye andituma ndilonge na iwe toera ndikupase mphangwa izi zadidi.

²⁰Cincino iwe unakhala bewewe. Unacimwana kulonga mpaka ntsiku inacitika penepi. Thangwi wapokanya mafala anga, anadza kafuna kucitika n'dzidzi wace ungakwana.”

²¹Mukhacitika penepyo, mbumba yonsene ikhadikhira Zakariya, mbwenye ikhadzumatirwa na kuona kudembuka kukhacita iye mu Nyumba ya Mulungu.

²²Pakubuluka kwace Zakariya mu Nyumba ya Mulungu, abuluka mbali bewewe mbakhacimwana kulonga. Penepo mbumba yonsene yadzindikira kuti piripo pikhadaoneswa iye na Nzimu Wakucena n'kati mwa Nyumba ya Mulungu. Na tenepo, Zakariya akhakwanisa kulonga na mbumba na manja basi.

²³Pidamala izo ntsiku zace za kuphata basa mu Nyumba ya Mulungu, Zakariya abuluka mbaenda ku nyumba kwace.

²⁴Buluka penepo, Zabere nkazi wa Zakariya akhala na pathupi. Na tenepo, amala myezi mixanu, mbakhakhala pa nyumba.

²⁵Iye akhalonga tenepa: “Izi ndi nkhombo za Mbuya! Cincino Iye andionambo toera kundimwaza manyadzo patsogolo pa mbumba.”

²⁶Zabere pikhakhala iye na pathupi myezi mitanthatu, Mulungu atuma anju Gabhiriyeli, kuti aende ku nzinda ubodzi unacemerwa Nazareti ku dziko ya Galileya,

²⁷kuti aende kalonge na mwali m'bodzi anacemerwa Mariya, akhabvundzirana na Zuze, mwana wa dzindza ya mambo Dhavidhi.

²⁸Anju afendedzera Mariya, am'mwanyika mbampanga tenepa: “Makolokoto iwe wakudzala na nkhombo! Mbuya ali na iwe.”

²⁹Apo Mariya na kupibva, adzumatirwa pikulu kakamwe, mbakhasaka kudziwa kuti mamwanyikiro enewa asalonganji.

³⁰Mbwenye anju ampanga kuti: “Leka kugopa Mariya, thangwi pidacitirwa iwe ndi kukoma ntima kwa Mulungu!

³¹Iwe unati ukhale na pathupi mbubala mwana-mamuna, dzina yace unadza kan'thula Yezu.

³²Iye anakhala nkulu, mbadza kacemerwa Mwana wa Mulungu wa kudzulu kakamwe. Mulungu Mbuya anadza kampasa mpando wa umambo wa baba wace Dhavidhi.

³³Pontho Iye anadza katonga kwenda na kwenda mbumba ya Djakobo. Umambo wace nkhabe kudza kamala.”

³⁴Mphapo Mariya alonga kuna anju kuti: “Pinacitika tani penepi, thangwi ine ndidzati kudziwa mamuna?”

³⁵Anju antawira tenepa: “Nzimu Wakucena unabwera muna iwe, pontho mphambvu za Mulungu wa kudzulu kakamwe zinakugudumira na n'thundzi wace. Na thangwi eneyo, mwana anafuna kudza kabalwa, anadza kacemerwa Wakucena, pontho anadza kacemerwa Mwana wa Mulungu.

³⁶Pontho m'bale wako Zabere, anati akhale na mwana-mamuna pa unkhalamba wace. Ule akhalongwa kuti nkhabe kubala, lero iye ana pathupi, mwezi uno ndi wacitanthatu.

³⁷Thangwi kuna Mulungu nkhabe cinthu cinacimwanika.”

³⁸Penepo Mariya antawira tenepa: “Ndiri pano ine n'dzakazi wa Mbuya. Mphapo mbapicitike pyapyo kuna ine ninga mudapilongera imwe.” Na tenepo, anju aenda pyace.

³⁹Pa ntsiku zenezo, Mariya acita ulendo wace na mwansanga, mbaenda ku nzinda ubodzi ukhagumanika ku cisa ca mapiri, ku dziko ya Djudeya.

⁴⁰Kweneko, iye apita n'nyumba ya Zakariya mbamwanyika Zabere.

⁴¹Zabere na kubva kumwanyikwa kudacitwa iye na Mariya, mwana athaula m'mimba mwace. Na tenepo, Zabere adzala na Nzimu Wakucena,

⁴²mbalonga na mphambvu kuti: “Iwe ndiwe wakusimbwa pakati pa akazi, pontho mwana anafuna kudza kabala iwe ndi wakusimbwambo!

⁴³Mbwenye ndine ani ine kuti ndidze kaoniwa na mai wace Mbuya wanga?

⁴⁴Pa n'dzidzi ubodzi ene udabva ine kumwanyikwa na iwe, mwana wanga atoma kuthaula m'mimba mwanga na kukomerwa.

⁴⁵Kutsandzaya ndi kwako iwe Mariya adatawira kuti pinacitika pidakupanga Mbuya!”

⁴⁶Na tenepo, Mariya alonga kuti: “Ntima wanga usakuza Mbuya.

⁴⁷Pontho nzimu wanga usasekera Mulungu Mpulumusi wanga,

⁴⁸thangwi Iye akumbukambo kucepeseka kwa ine, n'dzakazi wace. Apo kutomera lero mpaka kutsogolo, madzindza onsene anati andicemere nkazi wakudzala na nkhombo.

⁴⁹Thangwi Mulungu wa mphambvu acita pinthu pikulu kakamwe kuna ine. Wakucena ndiyo dzina yace.

⁵⁰Ntsisi zace asazipangisa kuna ale anan'gopa, kuna dzindza na dzindza.

⁵¹Iye acita pinthu pikulu na nkono wace, mbamwaza ale akhanyerezera pya umbirimi n'kati mwa mitima yawo.

⁵²Agwisa amambo a mphambvu m'mipando mwawo ya umambo, mbakwiza anthu akupwazika.

⁵³Akhutisa anyanjala na pinthu pyadidi, mbwenye athamangisa anyakupfuma cimanja-manja.

⁵⁴Aphedza n'dzakazi wace Izarayeli, mbakumbukira ntsisi zace

⁵⁵kuna Abharaamu na dzindza yace kwenda na kwenda, ninga mudapikirira Iye ambuya athu.”

⁵⁶Mariya akhala na Zabere dhuzi na kuthamangira myezi mitatu, buluka penepo mbabwerera ku nyumba kwace.

⁵⁷Pidakwana izo ntsiku zace za kubala, Zabere abala mwana-mamuna.

⁵⁸Abale ace na anthu anango a pa cisa, abva kuti Mulungu am'bvera ntsisi zikulu, mbaenda onsene kancitira makolokoto.

⁵⁹Pa ntsiku yacisere, anthu aenda kansidza mwana, mbakhafuna kumpasa dzina ya Zakariya, dzina ya baba wace mwana.

⁶⁰Mbwenye mai wace atawira mbalonga tenepa: “Nkhabe! Iye anacemerwa Juwau.”

⁶¹Penepo iwo antawira nkazi kuti: “Ku dzindza kwako nkhabe munthu ana dzina eneyi.”

⁶²Na tenepo, iwo atoma kulonga na manja na baba wace mwana, toera adziwe dzina yanji inafuna iye kupasa mwana wace.

⁶³Zakariya aphemba citabwa kuti alemberepo dzina ya mwana. Penepo iye alemba tenepa: “Dzina yace ndi Juwau.” Na tenepo, onsene adzumatirwa napyo.

⁶⁴Pa n'dzidzi ubodzi-bodzi, Zakariya lirimi yace yasudzuka, iye atoma kulonga mwadidi ninga mwakale, mbakhakuza Mulungu.

⁶⁵Anthu onsene a pa cisa atoma kugopserwa pikulu. Na tenepo, mphangwa zenezo zamwazika n'cisa consene ca m'mapiri a ku Djudeya.

⁶⁶Onsene akhabva mbapilongwa penepyo akhabvundzisana tenepa: “Kodi mwana uyu anadza kakhala ani?” Thangwi mphambvu za Mbuya zikhali na iye.

⁶⁷Penepo Zakariya, babace mwana, adzazwa na Nzimu Wakucena mbatoma kulonga pinthu na Nzimu ubodzi-bodzi kuti:

⁶⁸“Mbasimbwe Mbuya, Mulungu wa Izarayeli, thangwi iye abwera kudza kaona na kuombola mbumba yace.

⁶⁹Iye atidzesera upulumuki wa mphambvu wa dzindza ya n'dzakazi wace Dhavidhi.

⁷⁰(Ninga mudapilongera Mulungu kale na kale na milomo ya maporofeta ace akucena,)

⁷¹mbatipulumusa mwa anyamalwa athu na m'manja mwa onsene anatizonda,

⁷²toera kupangisa ambuya athu ntsisi zace, pontho na kukumbuka cibverano cace cakucena,

⁷³na cidumbiriro cidacita Iye kuna baba wathu Abharaamu,

⁷⁴ca kutiombola m'manja mwa anyamalwa athu, toera tim'phatire basa na kukhonda kugopa,

⁷⁵mwakulungama na mwa udidi pamaso pace, ntsiku zathu zonsene.

⁷⁶Iwe mwana wanga, unati ucemerwe mporofeta wa Mulungu wa kudzulu kakamwe. Unaenda patsogolo pa Mbuya toera unsasanyire njira,

⁷⁷toera kupasa mbumba yace udziwisi wa upulumuki, unabulukira pa kulekererwa kwa madawi awo,

⁷⁸na thangwi ya ntsisi zikulu za Mulungu wathu, zinacita kuti atigasire dzuwa ya kudzulu,

⁷⁹toera kumwanikira ale anakhala n'cidima na ali mu n'thundzi wa kufa, pontho toera kulondeza myendo yathu mu njira ya ntendere.”

⁸⁰Mwana akhakula mbawanga mu nzimu. Pontho akhala n'thando mpaka ntsiku idabulukira iye pakweca, kuna mbumba ya Izarayeli.