Read Cibverano Cipsa Cisena Lk. 17 Bible Online

Lk. 17 - Cibverano Cipsa Cisena bible

Lk. 17

¹Yezu alonga kuna anyakupfundza ace kuti: “Ndimo mwene, pinthu pyonsene pinagwisa anthu n'kudawa, pinati picitike. Mbwenye dzedze nja ule anacita kuti pinthu penepi picitike.

²Pikhali pyadidi kum'mangirira libwe n'khosi mwace mbaponyiwa m'bara, kupiringana kugwisa n'kudawa mwana wang'ono ninga uyu.

³Citani mphole! “Ngakhala m'bale wako adawa, nsandike. Iye angachunyuka, mulekerere.

⁴Angakudawisira kanomwe pa ntsiku, iye mbabwera kuna iwe kanomwe, mbalonga tenepa: ‘Ndachunyuka.’ Iwe mulekerere.”

⁵Apoxtolo aphemba Yezu kuti: “Mbuya, tithimizireni kukhulupira kwathu!”

⁶Iye aatawira tenepa: “Ngakhala imwe muna cikhulupiro ca kulandana na thunga ya mbeu ing'ono,[10] munakwanisa kupanga muti wa nsambvu uyu kuti: ‘Dulika uyende kachekeke m'bara,’ iwo unakubverani.”

⁷“Mbani mwa imwe angakhala na nyabasa m'bodzi anam'phatira basa ya kulima kumunda, peno ya kukumbiza mabira, iye angafika buluka kumunda mbampanga kuti: ‘Bwera pa thando, utome kudya?’

⁸Nkhabe kucitika! Anampanga kuti asasanyike atome kum'phikira pyakudya, adye, amwe. Angamala anadza kampanga kuti adyembo mbamwambo.

⁹Musanyerezera kuti iye ana pereka takhuta kuna nyabasa, thangwi ya kuncitira pidantuma iye? Nkhabe.

¹⁰Na tenepo, imwe musafuna mucite pibodzi-bodzi. Mungamala kucita pyonsene pidatumwa imwe, longani tenepa: ‘Ife ndife anyabasa ene pyathu. Thangwi tacita pire basi pidapangwa ife kuti tipicite.’ ”

¹¹Mukhaenda Yezu ku Djerusalema, apita na m'madire mwa Samariya na Galileya.

¹²Mukhapita iwo n'cisa cibodzi, anyamatanya khumi aenda kuna Iye, mbalimira na kutali,

¹³mbakhuwa tenepa: “Yezu, Mpfundzisi, tibvereni ntsisi!”

¹⁴Yezu aalang'ana mbaapanga tenepa: “Ndokoni mukhapangizike kuna anyantsembe kuti akudinkheni!” Mukhaenda iwo, awangiswa.

¹⁵M'bodzi wawo, mudaona iye kuti awangiswa, abwerera mbakhakuza Mulungu na mphambvu zonsene.

¹⁶Agodama pa myendo pa Yezu, mbapereka takhuta. Unowu akhali wa ku Samariya.

¹⁷Na tenepo, Yezu am'bvundza kuti: “Kodi si khumi tayu adawangiswa? Anango apfemba ali kupi?

¹⁸Ndi thangwi yanji abwerera kakuza Mulungu ndi munthu wakudza basi?”

¹⁹Na tenepo, Yezu ampanga kuti: “Lamuka, ndoko pyako. Kukhulupira kwako kwakupulumusa.”

²⁰Afarisi anango, abvundzisa Yezu kuti: “Umambo wa Mulungu unafika lini?” Iye atawira tenepa: “Umambo wa Mulungu nkhabe bwera mbuoneka.

²¹Nkhabe anadza kalonga kuti: ‘Lang'anani! Uli pano.’ Peno ‘Uli kule.’ Thangwi Umambo wa Mulungu uli pakati panu.”

²²Buluka penepo, Iye apanga anyakupfundza ace kuti: “Unadza kafika n'dzidzi wa kuti imwe munati mufune kuona ntsiku ibodzi ya kubwera kwa Ine, Mwana wa Munthu, mbwenye nkhabe kudza kaiona.

²³Anango anakupangani kuti: ‘Lang'anani ali pano,’ peno ‘lang'anani ali pale.’ Mbwenye lekani kwenda mbamuatowera.

²⁴Thangwi sawa-sawa ninga njazi isacetuma buluka pa nkhomu ibodzi ya kudzulu mpaka ku nkhomu inango, tenepa pinacitikambo pa ntsiku inadza kabwera Ine, Mwana wa Munthu.

²⁵Mbwenye pakutoma, Ine ndisafunika ndithabuke, pontho ndikhondiwe na anthu a ntsiku zino.

²⁶“Ninga pidacitika pa ntsiku za Nowa, pinacitikambo sawa-sawa pa ntsiku za Ine, Mwana wa Munthu.

²⁷Anthu onsene akhadya, akhamwa. Amuna akhacita mabanja, akazi akhaperekwa m'mabanja, mpaka ntsiku idapita Nowa mu arika. Na tenepo, madzi adzala, onsene mbamala kufa na madzi.

²⁸“Pibodzi-bodzi pyacitikambo pa n'dzidzi wa Loti. Anthu akhadya, akhamwa, akhagula, akhagulisa, akhacheka pontho akhamanga nyumba.

²⁹Mbwenye pa ntsiku idabuluka Loti mu Sodhoma, kudzulu kwabvumba moto wa myala yakugaka, mbumala kupha onsene.

³⁰“Na tenepo, pinacitikambo sawa-sawa ntsiku inafuna kubulukira Ine, Mwana wa Munthu.

³¹Ntsiku eneyo, ule anagumanika pa ntsoyi ya nyumba yace, mbaleke kuchita toera akhakwate pinthu pyace n'kati mwa nyumba. Sawa-sawa na ule ali ku munda, mbaleke bwerera n'nduli.

³²Kumbukani nkazi wa Loti!

³³Munthu anasaka kukoya moyo wace, anauluza. Mbwenye ule analuza moyo wace, anaugumana.

³⁴Ndinakupangani kuti masiku enewa, anthu awiri anagumanika ali kugona pa talimba ibodzi ene, m'bodzi anakwatiwa, unango anasiyiwa.

³⁵Akazi awiri anagumanika ali kupeya pabodzi pene, m'bodzi anakwatiwa, unango anasiyiwa.

³⁶[Amuna awiri anagumanika ali kumunda, m'bodzi anakwatiwa, m'bodzi anasiyiwa.”]

³⁷Na tenepo, anyakupfundza ace am'bvundza kuti: “Mbuya, pinacitika kupi penepi?” Iye atawira tenepa: “Pale panagumanika cinthu ca kufa, penepo ndipo panagumanyikana malezi.”