Read Cibverano Cipsa Cisena Lk. 20 Bible Online

Lk. 20 - Cibverano Cipsa Cisena bible

Lk. 20

¹Ntsiku inango, Yezu akhali mu Nyumba ya Mulungu mbakhapfundzisa mbumba, na kumwaza Mphangwa Zadidi. Na tenepo, afika penepo akulu aanyantsembe, na anyakudziwisa a Mwambo na mathubu,

²mbam'bvundza tenepa: “Kodi Iwe uli kucita pinthu penepi na mphambvu za utongi wa ani? Mbani akupasa mphambvu za utongi unowu?”

³Yezu atawira tenepa: “Ine ndisafunambo kukubvundzani. Ndipangeni:

⁴‘Batixmu ya Juwau ikhali ya kudzulu peno ya anthu?’ ”

⁵Iwo akhaketesana okha-okha mbakhalonga tenepa: “Tingalonga kuti ndi ya kudzulu, Iye anadza kabvundza kuti: ‘Mphapo thangwi yanji imwe mwakhonda kuntawira Juwau?’

⁶Mbwenye tingalonga kuti: Ndi ya anthu, mbumba yonsene iyi inatimenya na myala. Thangwi iwo asatawira kuti Juwau akhali mporofetadi.”

⁷Na thangwi eneyo, iwo atawira tenepa: “Ife nkhabe kupidziwa kuti ikhali ya ani.”

⁸Na tenepo, Yezu aapanga kuti: “Ine nkhabe kukupanganimbo na pang'ono pene, kuti ndi mphambvu za utongi wa ani zinacita na Ine pinthu penepi.”

⁹Buluka penepo, Yezu alonga kuna mbumba nsanje uyu: “Mamuna m'bodzi acheka miti ya mauva m'munda mwace, mbaurikisa na anthu anango anyakulima, pidamala iye acita ulendo mbakhala ntsiku zizinji.

¹⁰Pidakwana iwo n'dzidzi wa kubulusa mauva, iye atuma nyabasa wace m'bodzi kuna anyakulima, toera ampase phindi ya misapu ya mauva. Mbwenye anyakulima am'menya, mbam'bweza cimanja-manja.

¹¹Mwanacinthu munda atuma nyabasa unango. Mbwenye iwo am'menya pontho, mban'nyadzisa, mbam'bweza cimanja-manja.

¹²Na tenepo, iye atuma pontho unango wacitatu. Mbwenye anyakulima am'phekesambo, mban'thamangisa.

¹³“Penepo mwanacinthu munda alonga kuti: ‘Ndinacitanji? Ndinatuma mwana wanga wa pa ntima, panango iwo angamuona, anamulemedza.’

¹⁴“Mbwenye anyakulima mudaona iwo mwana, abverana okha-okha kuti: ‘Uyu ndiye mwanaciro unthaka. Tendeni timuphe, unthaka ukhale wathu.’

¹⁵Na tenepo, iwo amponya kunja kwa munda wa mauva, mbamupha. “Mphapo ndi ninji pinafuna kuacita mwanacinthu munda?

¹⁶Iye anabwera, mbapha anyakulima ale, mbakwata munda wa mauva mbaupasa anango.” Na tenepo, mbumba mudabva iyo penepi yalonga kuti: “Penepi mbapileke kucitika.”

¹⁷ Mbwenye Yezu aalang'anisa mwadidi mwene, mbaabvundza kuti: “Mphapo pisalongeranji pidalembwa m'Bukhu ya Mulungu kuti? “ ‘Mwala udakhondiwa na anyakumanga nyumba, ndiwo udadza kakhala mwala wakufunika kakamwe?’

¹⁸Onsene anagwa padzulu pa mwala uyu ananyedzeka, mbwenye ule anagwerwa na iwo, anapeyeka kudza pfumbi.”

¹⁹Anyakudziwisa a Mwambo na akulu aanyantsembe, akhapidziwa kuti nsanje unowu ukhalongera iwo. Penepo pene, iwo akhasaka kuti anam'manga tani, mbwenye akhagopa mbumba.

²⁰Na tenepo, atoma kunzonda. Atuma amuna kuna Yezu, mbakhala ninga anthu akulungama, kuti amuone ngakhala anadodomeka pa malongero ace, toera iwo akwanise kuona thangwi ya kumpereka m'manja mwa utongi wa ku Roma.

²¹Amuna enewa am'bvundza tenepa: “Mpfundzisi, ife tisadziwa kuti pire pinalonga imwe na pinapfundzisa imwe, ndimo mwene. Pontho tisadziwa kuti imwe nkhabe kutonga mbamulang'ana makhaliro a munthu. Mbwenye musapfundzisa njira ya Mulungu mwa ndimo mwene.

²²Mphapo tipangeni: Pisatawirirwa kulipa nsonkho kuna Mambo Sezari, peno nkhabe?”

²³Mbwenye Yezu, na kudziwa ucenjeri wawo, alonga tenepa:

²⁴“Ndipangiseni kobiri ibodzi ya parata.[11] Kodi nkhope na dzina iyi iri pa kobiri nja ani?” Iwo antawira kuti: “Mphya Sezari.”

²⁵Penepo Yezu aapanga tenepa: “Pya Sezari, pasani Sezari, pya Mulungu, pasani Mulungu.”

²⁶Iwo acimwana kuona mafala a kum'phata na iwo pamaso pa anthu. Na tenepo, amatama, mbadzumatirwa na matawiriro adacita Yezu.

²⁷Asadhusi anango, ale analonga kuti anthu nkhabe kulamuka pa kufa, afendedzera Yezu, mbampanga kuti:

²⁸“Mpfundzisi, Mozesi asiya amala kutilembera mwambo wa kuti, mamuna angafa, mbasiya nkazi mbadzati kubala na iye, m'bale wace wa mamuna asatongwa kuti apite kumusa na manferwa wa nkazi, toera ansiyire dzindza.

²⁹Mphapo akhalipo amuna anomwe muubale mwawo. Wakutoma, apita kumusa, mbafa mbakhonda kunsiya na ana.

³⁰Waciwiri,

³¹na wacitatu, na anango, apitambo na iye kumusa. Onsene pa unomwe wawo afa mbakhonda kubala na iye ana.

³²Pa kumalisira nkazi afambo.

³³Mphapo, pa ntsiku ya kulamuka kwa anyakufa, nkazi unowu anadza kakhala wa ani? Thangwi pa unomwe wawo apita na iye kumusa.”

³⁴Yezu atawira tenepa: “Pantsi pano, ndipo panacita amuna mabanja, akazi mbaperekwa m'mabanja.

³⁵Mbwenye anthu ale adakwanira kuti apite ku dziko ya kudzulu mbalamuka pa kufa, nkhabe kudza kacitabve banja, peno kuperekwa m'mabanja.

³⁶Thangwi anadza kakhala ninga maanju, pontho hanadza kafabve tayu. Anakhala ana a Mulungu, thangwi ndi anthu a kulamuka pa kufa.

³⁷ Pontho, pya kuti anyakufa analamuka, Mozesi apipangisa kale padalonga Mulungu pa thundudzi, mbacemera Mbuya kuti ndi ‘Mulungu wa Abharaamu, Mulungu wa Izaki, pontho ndi Mulungu wa Djakobo.’

³⁸Penepi pisapangisa kuti Mulungu ndi Mulungu wa am'maso, si Mulungu wa anyakufa tayu. Thangwi kuna Iye onsene ali m'maso.”

³⁹Anango anyakudziwisa a mwambo alonga tenepa: “Mwatawira mwadidi, Mpfundzisi!”

⁴⁰Penepo, nkhabe munthu unango akhali na cipapu ca kum'bvundzisa.

⁴¹Na tenepo, Yezu aabvundza kuti: “Pisalongerwanji kuti Kirixtu ndi Mwana wa Dhavidhi?”

⁴²“Thangwi iye ene Dhavidhi alonga m'bukhu ya Masalimu kuti: “ ‘Mbuya alonga kuna Mbuya wanga kuti: Khala ku nkono wanga wa madyo,

⁴³ mpaka pana ikha ine anyamalwa ako, ninga cinthu cakupwandira manyalo ako.’

⁴⁴Na tenepo, ngakhala Dhavidhi asancemera ‘Mbuya,’ anakhala tani pontho mwana wace?”

⁴⁵Yezu mukhabveserwa Iye na mbumba yonsene, apanga anyakupfundza ace kuti:

⁴⁶“Citani mphole na anyakudziwisa a Mwambo. Iwo asafuna kufamba na nguwo zakulapha, asafuna pikulu kakamwe kumwanyikwa na anthu m'mphambano, asafuna kusankhula mipando yakutoma mu nyumba za kuphemberera, pontho na kusankhula mbuto za kulemebza m'maphwandu.

⁴⁷Asatapata nyumba za akazi adaferwa na amuna awo, mbaadhobha na kucita miphembero yakukhonda kugwandira. Anthu enewa, anati athabuswe pikulu kakamwe.”