Read Cibverano Cipsa Cisena Lk. 21 Bible Online

Lk. 21 - Cibverano Cipsa Cisena bible

Lk. 21

¹Yezu alang'ana mbaona apfumi mbakhaikha miyoni yawo n'combo cinaikhirwa miyoni.

²Mwenemu Yezu aonambo nkazi m'bodzi wakucherenga adaferwa na mamuna wace, mbaikhambo pikobiri pyace piwiri.

³Penepo Yezu alonga kuti: “Ndimo mwene, ndisakupangani kuti nkazi uyu, manferwa wakucherenga, apasa pikulu kakamwe kupita onsene.

⁴Thangwi onsene awa apasa mbasala na pinango. Mbwenye nkazi uyu, na ucherengi wace, apereka pyonsene pikhakhala na iye, pire pikhafuna kudya iye.”

⁵Anthu anango akhalonga na thangwi ya kubalikiswa kudacitwa Nyumba ya Mulungu na myala yadidi ya kubalika, pontho na miyoni ikhaperekwa kuna Mulungu. Mbwenye Yezu alonga kuti:

⁶“Musapiona pinthu ipi? Zinafika ntsiku kuti pyonsene ipi pinaona imwe, pinati pibodolwe. Nkhabe mwala ubodzi unafuna sala padzulu pa unango.”

⁷Penepo iwo atoma kum'bvundzisa Yezu kuti: “Mpfundzisi, pinacitika lini pinthu penepi? Pontho ndi cidzindikiro canji cinafuna kudza kaoneka, toera kupangisa kuti ipyo piri dhuzi na kufuna kucitika?”

⁸Yezu atawira tenepa: “Cenjerani! Lekani kunyengezwa na munthu. Thangwi azinji anati abwere na dzina yanga mbalonga kuti: ‘Ndine pano!’ Pontho mbalonga kuti: ‘Wafika n'dzidzi!’ Lekani kuatowerera.

⁹Pontho lekani kugopa mungabva mbapilongwa pya nkhondo na pya kusandukirana. Thangwi pisafunika kuti pakutoma picitike pinthu penepi, mbwenye si kulongera kumala kwa pantsi kunafikiratu n'dzidzi unowu tayu.”

¹⁰Na tenepo, Yezu athimiza na kulonga kuti: “Dziko na dziko inadza kamenyana, pontho umambo na umambo unadza kamenyana.

¹¹Munadza kaoneka piteke-teke pikulu, njala na miliri mu mbuto zizinji. Pinadza kaoneka pinthu pyakugopsa, pontho na pidzindikiro pizinji kudzulu.

¹²“Mbwenye pinthu pyonsene ipi mbapidzati kucitika, munazondiwa mbamumangwa. Na tenepo, munatongiwa m'manyumba a kuphemberera, pontho mbakufungirani n'kaidi. Pontho imwe munati muperekwe pamaso pa amambo na atongi, na thangwi ya dzina yanga.

¹³Penepyo pinakucitani kuti imwe mukhale na n'dzidzi wa kundilongera umboni.

¹⁴Mbwenye Khurudzikani. Lekani kunentseka kuti munadza kalonganji.

¹⁵Thangwi Ine ndinakupasani mafala na ndzeru za kuti iwo anyamalwa anu onsene, anacimwana kukupokanyani peno kukukonesani.

¹⁶Imwe munati musandukirwe na ababanu, abale anu, na abale a dzindza, na axamwali. Pontho andzanu anango anati aphiwe na iwo.

¹⁷Anthu onsene anati akuideni na thangwi ya dzina yanga.

¹⁸Mbwenye nkhabe tsisi ibodzi ya munsolo mwanu inafuna kutaika.

¹⁹Mungawangisira, munapulumuka.

²⁰“Mphapo mungaona nzinda wa Djerusalema mbuzungulirwa na anyankhondo, dziwani kuti uli dhuzi na kufudzika.

²¹Na tenepo, ale anagumanika mu Djudeya, mbathawire m'mapiri. Anagumanika mu nzinda mbabuluke, pontho ale anagumanika m'minda, mbaleke kupita mu nzinda.

²²Thangwi ntsiku zenezo ndi za nyatwa, toera pisimbiswe pyonsene pidalembwa m'Bukhu ya Mulungu.

²³Ntsiku zenezo zinati zikhale za nyatwa ikulu kuna ale ali na pathupi, na ale anayamwisa! Thangwi kunaoneka kutsukwala kukulu pa dziko, pontho Mulungu anadzesa nyatwa ikulu kakamwe kuna mbumba eneyi.

²⁴Azinji anati aphiwe na tarasada, anango anakwatiwa mbaendeswa madziko onsene a pantsi ninga anyan'kaidi. Pontho mbumba idakhonda kukhala madjuda inati itapate dziko ya Djerusalema, mpaka kufikira wamala n'dzidzi wawo wa kutapata.

²⁵“Pinaoneka pidzindikiro pa dzuwa, pa mwezi na pa nyenyezi. Pontho pantsi pano madziko onsene anatsukwala mbagopa na kutitimira kukulu kwa mabimbi a m'bara.

²⁶Anthu azinji anati akomoke na kugopa pire pinafuna kudza kacitika pa dziko. Thangwi mphambvu za kudzulu zinatekenyeka.

²⁷Na tenepo, anadza kaona Ine, Mwana wa Munthu mbandikhabwera padzulu pa khole na mphambvu, pontho na mbiri ikulu.

²⁸Pinthu penepyo pingatoma kucitika, khalani dzololo mulamuse misolo yanu, thangwi muli dhuzi na kuombolwa.”

²⁹Pakumala kulonga penepyo Yezu alonga nsanje uyu: “Lang'anani muti wa nsambvu na miti inango yonsene.

³⁰Mungaiona mbitoma kuphwikira masamba ace, imwe ene musadziwiratu kuti malimwe ali dhuzi.

³¹Tenepambo, mungaona mbapicitika pinthu penepi, dziwani kuti Umambo wa Mulungu uli dhuzi.”

³²“Ndimo mwene, ndisakupangani kuti pyonsene ipi pinacitika, anthu a midzidzi ino mbadzati kumala.

³³Kudzulu na pantsi panamala, mbwenye mafala anga nkhabe kudza kamala.”

³⁴Yezu amalisira na kulonga kuti: “Cenjerani! Lekani kudzudzumika na maphwandu a padziko, peno na pya kuledzeresa, peno na pinthu pinango pya dziko ino, toera mukhonde kututumuswa nayo ntsiku eneyo ingafika.

³⁵Thangwi ntsiku eneyo inadzera anthu onsene a pantsi pano.

³⁶Na tenepo, lang'anirani midzidzi yonsene mbamuphembera, toera mukhonde kugumana napyo pyonsene pinafuna kucitika, pontho mukhale dzololo pamaso pa Ine, Mwana wa Munthu.”

³⁷Yezu akhapfundzisa anthu ntsiku zonsene mu Nyumba ya Mulungu. Mbwenye na masiku akhaenda kakhala pa phiri inacemerwa Mulivera mpaka mangwana mwace.

³⁸Na macibese ene, mbumba yonsene ikhaenda kuna Yezu, mu Nyumba ya Mulungu kwenda kam'bvesera.