Read Cibverano Cipsa Cisena Lk. 23 Bible Online

Lk. 23 - Cibverano Cipsa Cisena bible

Lk. 23

¹Na tenepo, nsoka wawo onsene walamuka, mbakwata Yezu mbaenda na iye kuna Piratu.

²Kweneko atoma kumpambazira kuti: “Mamuna uyu tam'phata mbakhanyengerera mbumba yathu kuti icite cikuti, mbakhaikhondesa kuti ileke kulipa nsonkho kuna mambo wa ku Roma, mbakhalonga kuti iye ndi Kirixtu Mambo.”

³Penepo Piratu abvundza Yezu kuti: “Iwe ndiwe mambo wa madjuda?” Yezu antawira kuti: “Ndimwe analonga penepi.”

⁴Na tenepo, Piratu alonga kuna akulu aanyantsembe na kuna mbumba kuti: “Nkhabe thangwi idaona ine kuti ndikonese nayo mamuna uyu.”

⁵Mbwenye iwo akhathimiza basi na kulonga kuti: “Iye asakuwizira mbumba mu Djudeya muno monsene na mapfundzisiro ace, kuti icite cikuti, kutomera ku Galileya mpaka kuno.”

⁶Piratu na kubva dzina ya Galileya, abvundzisa ngakhala Yezu ngwa ku Galileya.

⁷Mudabva iye kuti Yezu ngwa ku cisa cinatongwa na Herodhi, amuendesa kuna Herodhi, thangwi Herodhi n'dzidzi unowumbo, akhali mu Djerusalema.

⁸Herodhi mudaona iye Yezu akomerwa pikulu kakamwe, thangwi akhamubva mbakhalongwa, mbamala ntsiku zizinji mbakhasaka kuti amuone. Iye akhafuna kuti amuone mbacita cirengo cibodzi.

⁹Na tenepo, am'bvundza pinthu pizinji, mbwenye Yezu nkhabe cibodzi cidatawira iye.

¹⁰Akulu aanyantsembe, na anyakudziwisa a Mwambo akhakhalambo penepo, mbakhampambazira pinthu pikulu.

¹¹Na tenepo, Herodhi, pabodzi na anyankhondo ace, atoma kunsingirira Yezu mbakhampwaza. Am'bvazika nguwo zakubalika mbam'bweza pontho kuna Piratu.

¹²Herodhi na Piratu akhali anyamalwa, mbwenye kubulukira ntsiku eneyo, adza kakhala axamwali.

¹³Piratu acemeresa akulu aanyantsembe, na atsogoleri a madjuda, na mbumba,

¹⁴mbaapanga tenepa: “Imwe mwandidzesera mamuna uyu mbamulonga kuti akhakuwizira mbumba kuti icite cikuti. Mbwenye ine ndam'bvundzisa kazinji kene pamaso panu, nkhabe thangwi ibodzi idagumana ine, pa pyonsene pinansumira imwe.

¹⁵Na iyembo Herodhi nkhabe thangwi ibodzi idagumana iye. Na thangwi eneyo am'bweza pontho kuna ife. Na tenepo, pisapangisa kuti mamuna uyu nkhabe cinthu cibodzi cidacita iye, kuti aphiwe naco.

¹⁶Na tenepo, ine ndinankwapulisa na michamu, ndingamala ndinansiya mbaenda pyace.”

¹⁷[Piratu akhali na nsambo wace wa kukhuca munthu m'bodzi n'kaidi, pa phwandu ya Paxkwa.]

¹⁸Mbwenye anthu onsene akhuwa pabodzi pene, mbalonga tenepa: “Mbaphiwe! Tibulusirene Bharabhasi!”

¹⁹Bharabhasi akhadafungirwa n'kaidi na thangwi ya cikuti cikhadacitika mu nzinda, pontho iye akhadapha munthu.

²⁰Piratu, na kufuna kubulusa Yezu, alonga pontho na mwinji wa anthu.

²¹Mbwenye iwo athimiza na kukhuwa kuti: “N'khomereni pa ntanda! N'khomereni pa ntanda!”

²²Kacitatu, Piratu athimiza na kuapanga kuti: “Ndi canji cakuipa cidacita munthu uyu? Ine nkhabe kuona thangwi kuti Iye aphiwe nayo. Ndinankwapulisa, ndingamala ndinsiye aende pyace.”

²³Mbwenye iwo athimiza na kukhuwa na mphambvu kuti Yezu akhomerwe pa ntanda. Penepo kukhuwa kwawo kwakunda.

²⁴Na tenepo, Piratu aatawirisa kuti acite kufuna kwawo.

²⁵Piratu abulusa ule akhafuna iwo, akhadafungirwa n'kaidi na thangwi ya cikuti, pontho na thangwi ya kupha munthu, mbaapasa Yezu ninga mukhafunira iwo.

²⁶Mukhankwata iwo, akakamiza mamuna m'bodzi akhacemerwa Simau, wa ku nzinda wa Sirene, akhabuluka ku munda, mbankwatisa ntanda pa phewa pace toera aende na iwo n'nduli mwa Yezu.

²⁷Mwinji wa anthu ukhantowera, pabodzi na akazi akhakhuwa mbakhalira na thangwi yace.

²⁸Na tenepo, Yezu azungunuka kuna akazi mbaapanga kuti: “Akazi a Djerusalema, lekani kundilira. Lirikani mwekha na ana anu!

²⁹Thangwi unafika n'dzidzi unadza kafuna imwe longa kuti: ‘Mbatsandzaye akazi adakhonda paswa kubala, pontho na mimba zidakhonda kubala ana, na mabere a kuti cipo adzati kuyamwisa!’

³⁰“ ‘ Na tenepo, anati alonge kuna mapiri kuti: “Tigwereni!” Pontho analonga kuna pimapiri kuti: “Tigudumireni!” ’

³¹Thangwi ngakhala asacita ipi na muti uwisi, ndiye tani kuna muti wakuuma?”

³²Akwatiwambo amuna awiri, mapanga, kuti aende kaphiwe pabodzi na Yezu.

³³Mudafika iwo pa mbuto inacemerwa Kavera, penepo an'khomera pa ntanda pabodzi pene na mapanga, m'bodzi ku nkono wa madyo, unango ku nkono wa bzere.

³⁴[Penepo Yezu alonga kuti: “Baba, alekerereni, thangwi nkhabe kupidziwa pinacita iwo.”] Na tenepo, iwo, pakumala kumenya ntsango, agawana nguwo zace.

³⁵Mbumba ikhakhala penepo, ikhalang'anisa pyonsene pire. Atsogoleri a madjuda akhasingirira Yezu mbalonga tenepa: “Iye apulumusa anango, mbapulumusikembo ekha ene ngakhala ndiyedi Kirixtu adasankhulwa na Mulungu.”

³⁶Anyankhondo akhansingirirambo. Iwo akhafika dhuzi na Yezu mbakhampasa vinyu ya kudjamuka,

³⁷mbalonga tenepa: “Ngakhala Iwe ndiwe mambo wa madjuda, pulumusika wekha ene!”

³⁸Pa ntanda, padzulu pa nsolo wace, pakhadalembwa mafala awa: “UYU NDI MAMBO WA MADJUDA.”

³⁹M'bodzi wa mapanga akhadakhomerwa pa ntanda, akhatikanambo Yezu mbalonga tenepa: “Iwe siwe Kirixtu tayu? Pulumusika mphapo wekha, mbupulumusambo ife!”

⁴⁰Mbwenye unango ansandika mbalonga tenepa: “Iwe nkhabe gopa Mulungu? Iwe uli kuthabuswa sawa-sawa ninga iye.

⁴¹Ife tina thangwi ya kuthabuswa nayo. Mbwenye Iye nkhabe cakuipa cibodzi cidacita Iye.”

⁴²Na tenepo, alonga kuna Yezu kuti: “Mbuya, ndikumbukirenimbo mungadza kapita mu Umambo Wanu!”

⁴³Yezu atawira tenepa: “Ndimo mwene ndisakupanga kuti lero, iwe unadza kakhala na Ine m'paraizu.”

⁴⁴Dhuzi na n'dzidzi khumi na uwiri wa masikati, mpaka n'dzidzi utatu wa kumaulo, dzuwa yathima, dziko yonsene mbigudumirwa na cidima.

⁴⁵Dzuwa ya thima, nguwo ikhasitira mbuto ya Mulungu mu Nyumba ya Mulungu, yapanduka pakati-na-kati.

⁴⁶Penepo, Yezu akhuwa mbalonga tenepa: “Baba, ndiri kupereka nzimu wanga m'manja mwanu.” Mudamala Iye kulonga penepyo, afa.

⁴⁷Nkulu wa anyankhondo a ku Roma, mudaona iye pidacitika, apasa mbiri Mulungu mbalonga tenepa: “Ndimo mwenedi, mamuna uyu akhali wakulungama!”

⁴⁸Mbumba yonsene ikhadagumanyikana penepo toera kuona pikhacitika, mudaona iwo penepyo abuluka mbakhamenya cifuwa, na kutsukwala.

⁴⁹Mbwenye onsene akhan'dziwa Yezu, na akazi ene akhantowerera kubulukira ku Galileya, akhakhala kutali mbakhalang'anisa pinthu penepi.

⁵⁰Akhalipo mamuna m'bodzi akhacemerwa Zuze. Iye akhali m'bodzi wa nsoka wa akulu anyakutonga miseru, munthu wadidi na wakulungama.

⁵¹Iye akhadakomerwa tayu na kugwandiwa kwa nseru, pontho na pidacita andzace. Zuze akhali wa ku nzinda wa Arimateya, ku Djudeya, iye akhadikhira Umambo wa Mulungu.

⁵²Iye aenda kuna Piratu kaphemba manungo a Yezu.

⁵³Na tenepo, abulusa manungo a Yezu pa ntanda, mbaapyangirira na nguwo yakucena. Penepo aaikha n'nthumbi ibodzi ikhadakumbwa pa mwala, kuti cipo ikhadadzati kuikhwa munthu.

⁵⁴Penepi pyacitika ntsiku ya cixanu, ntsiku ya kusasanyira, thangwi Sabudu ikhafuna kutoma.

⁵⁵Akazi akhaperekera Yezu kubulukira ku Galileya, aenda pabodzi na Zuze mbaonambo kuikhwa kudacitwa manungo a Yezu n'nthumbi.

⁵⁶Buluka penepo, abwerera mbaenda ku nyumba kwawo kasasanyira mafuta akununkhira, toera akhadzoze manungo a Yezu. Mbwenye Nsabudu, iwo apuma, ninga mukhalongera mwambo.