Read Cibverano Cipsa Cisena Lk. 24 Bible Online

Lk. 24 - Cibverano Cipsa Cisena bible

Lk. 24

¹Pa ntsiku ya Dimingu, m'bambakuca, akazi aenda ku nthumbi ikhadaikhwa Yezu na mafuta akununkhira akhadasasanyira iwo.

²Iwo agumana mwala wabuluswa pa nthumbi.

³Mbwenye mudapita iwo, hadaagumana manungo a Mbuya Yezu tayu.

⁴Iwo adzumatirwa napyo, mbacimwana kudziwa pikhafuna iwo kucita. Na mwansanga, aona amuna awiri na nguwo zikhayetimira ninga dzuwa, mbalimira n'khundu mwawo.

⁵Na kugopa kukhacita iwo, akazi atsolomisa nkhope zawo pantsi, amuna mbaapanga tenepa: “Thangwi yanji imwe muli kusaka pakati pa anyakufa, munthu ali m'maso?

⁶Iye nkhabepo pano! Alamuka pa kufa! Kumbukani pikhakupangani Iye mbali na imwe ku dziko ya Galileya kuti:

⁷‘Ine, Mwana wa Munthu ndisafunika kuti ndiperekwe m'manja mwa amuna anyakudawa, ndikhomerwe pa ntanda, toera ntsiku ya citatu ndilamuke pa kufa.’ ”

⁸Na tenepo, iwo akumbuka mafala a Yezu.

⁹Mudabwerera iwo buluka ku nthumbi, akazi alonga pinthu pyonsene ipi kuna apoxtolo khumi na m'bodzi, na kuna onsene anango.

¹⁰Akazi adalonga pinthu penepi kuna apoxtolo ndi awa: Mariya Madhalena, Juwana, Mariya mai wace Tiyago, na akazi anango akhakhala na iwo.

¹¹Mbwenye iwo akhaapokanya akazi. Pikhalonga iwo, akhaabva ninga madzemwa.

¹²Mbwenye Pedhru alamuka, mbathamanga kwenda ku nthumbi. Mudakotama iye, aona mithambo yakucena basi. Abuluka mbabwerera na kudzumatirwa na pidacitika.

¹³Ntsiku ibodzi ene, anyakupfundza awiri a Yezu akhaenda ku cisa cibodzi cinacemerwa Emausi. Kubulukira ku Emausi mpaka ku Djerusalema, pakhali na nsindzo khumi na ubodzi wa makilometuru.

¹⁴Mukhaenda iwo na njira, akhaenda mbalonga na thangwi ya pyonsene pikhadacitika.

¹⁵Mukhaceza iwo mbakhaketesana, Iye ene Yezu aafendedzera dhuzi mbakhaenda na iwo pabodzi.

¹⁶Iwo akhamuona, mbwenye akhacimwana kun'dzindikira.

¹⁷Yezu aabvundza tenepa: “Mphyanji pinafamba imwe mbamuketesana na njira?” Iwo alimira na kutsukwala.

¹⁸M'bodzi wawo anacemerwa Kelopasi, am'bvundza kuti: “Ndiwe wekha basi nfambi mu Djerusalema muno, anacimwana kudziwa pinthu pinacitika mwenemu ntsiku zino?”

¹⁹Iye abvundzisa kuti: “Pinthu pyanji?” Iwo atawira tenepa: “Pidacitika na Yezu wa ku Nazareti. Iye akhali mporofeta wa mphambvu pa mafala na pa mabasa, patsogolo pa Mulungu na pa anthu onsene.

²⁰Akulu aanyantsembe pabodzi na atongi athu, ampereka toera aphiwe, mban'khomera pa ntanda.

²¹Na tenepo, ife tikhadikhira kuti Iye ndiye anadza kafuna kuombola Izarayeli. Pontho na lero kwapita ntsiku zitatu penepyo mbapidamala kucitika kale.

²²Akazi anango a pa nsoka wathu, lero atitutumusa. Abesa na macibese ene mbaenda ku nthumbi.

²³Kweneko iwo hadaagumana manungo ace tayu. Abwerera mbatipanga kuti ninga ndoto, aona maanju adaapanga kuti Yezu ali m'maso.

²⁴Andzathu anango aenda ku nthumbi, mbagumana pyonsene sawa-sawa ninga mukhadapilongera akazi, mbwenye Yezu hadamuona tayu.”

²⁵Yezu aapanga tenepa: “Pisakunentsani tani kubvesesa, pontho mbamudembuka na kutawira pire pyonsene pidalongwa na maporofeta!

²⁶Kodi pikhafunika tayu kuti Kirixtu aone nyatwa zenezi toera apite mu mbiri yace?”

²⁷Na tenepo, atoma kuapanga pyonsene pidalembwa m'Bukhu ya Mulungu na thangwi yace, kutomera m'mabukhu a Mozesi na m'mabukhu a maporofeta onsene.

²⁸Pakufika dhuzi na cisa cikhaenda iwo, Yezu acita ninga funa apitirire.

²⁹Mbwenye iwo ankakamiza mbampanga kuti: “Khalani na ife thangwi n'dzidzi wa pita, dzuwa iri kudoka.” Na tenepo, Iye apita toera akhale na iwo.

³⁰Mukhakhala iwo pa thando ya kudya, Yezu akwata nkate mbapereka takhuta, mbaumenya mbaapasa.

³¹Na tenepo, maso awo afunguka mban'dzindikira, mbwenye Yezu azambazika pamaso pawo.

³²Iwo akhalonga okha-okha kuti: “Kodi mukhaabva tayu mafala ace akhagaka m'mitima mwathu ninga moto mukhalonga Iye n'njira, mbakhatipanga pidalembwa m'Bukhu ya Mulungu?”

³³Iwo alamuka na mwansanga mbabwerera kwenda ku Djerusalema. Kweneko agumana apoxtolo khumi na m'bodzi na anango akhadagumanyikana,

³⁴mbakhalonga kuti: “Ndimo mwene! Mbuya alamukadi pa kufa, pontho abulukira kuna Simau!”

³⁵Na tenepo, ale awiri atoma kulonga pire pidaacitikira n'njira, pontho mbakhalonga kuti afikira tani kun'dzindikira pa n'dzidzi ukhamenya Iye nkate.

³⁶Mukhalonga iwo pinthu penepyo, Iye ene Yezu abulukira pakati pawo mbalonga kuti: “Ntendere mbukhale na imwe!”

³⁷Iwo atutumuka, pontho mbagopa mbanyerezera ninga asaona nzimu.

³⁸Yezu aapanga kuti: “Ndi thangwi yanji musadzudzumika, pontho ndi thangwi yanji musapenula m'mitima mwanu?

³⁹Lang'anani manja anga na myendo yanga. Ndine ene! Ndiphateni muone. Nzimu nkhabe nyama, pontho nkhabe magogodo ninga kuona kunandicita imwe. Ine ndinapyo.”

⁴⁰Pakumala kulonga penepyo, aapangisa manja ace na myendo yace.

⁴¹Na kukhonda kutawira kwawo, na thangwi ya kudzumatirwa na kukomerwa kukhabva iwo, Yezu abvundza kuti: “Imwe munaco pano cinthu cakudya?”

⁴²Iwo ampasa phindi ibodzi ya nyama ya kuocha ya m'madzi,

⁴³Iye aikwata mbaidya pamaso pawo.

⁴⁴Penepo aapanga kuti: “Ndi penepi pikhakupangani Ine mbandiri na imwe. Pikhafunika kuti picitike pyonsene pidalembwa na thangwi yanga mu Mwambo wa Mozesi, m'mabukhu a maporofeta na m'mabukhu a Masalimu.”

⁴⁵Na tenepo, aapasa kudzindikira toera akwanise kubvesesa mwadidi pidalembwa m'Bukhu ya Mulungu.

⁴⁶Mbaapanga tenepa: “Pyalembwa kuti Kirixtu anati aone nyatwa, mbalamuka pa kufa ingafika ntsiku ya citatu,

⁴⁷pontho kuti na dzina Yace, zimwazwe mphangwa za kuchunyuka toera kulekerera madawi kuna madzindza onsene, kutomera mu Djerusalema.

⁴⁸Imwe ndimwe amboni a pinthu penepi.

⁴⁹Ine ndinakutumirani cipikiriro ca Baba wanga. Mbwenye khalani mu nzinda mpaka kudzabza na mphambvu za kudzulu.”

⁵⁰Yezu aakwata, mbaenda na iwo mpaka dhuzi na nzinda wa Bhetanya, kweneko Iye alamusa manja mbaapasa nkhombo.

⁵¹Yezu mukhaapasa Iye nkhombo, aasiya, Iye mbakwira kudzulu.

⁵²Na tenepo, iwo amulambira mbabwerera na kutsandzaya kukulu mpaka ku Djerusalema.

⁵³Iwo akhakhala mu Nyumba ya Mulungu midzidzi yonsene mbakhakuza Mulungu.