Read Cibverano Cipsa Cisena Lk. 4 Bible Online

Lk. 4 - Cibverano Cipsa Cisena bible

Lk. 4

¹Yezu abuluka mu nyandza ya Djorodani wakudzala na Nzimu Wakucena, mbakwatiwa kwenda n'thando na Nzimu ubodzi-bodzi wa Mulungu.

²Mwenemu n'thando, Yezu anyengererwa na Dyabu ntsiku makumanai. Pa ntsiku zenezi, nkhabe cinthu cidadya Iye. Na tenepo, pakumala ntsiku zenezo Iye abva njala.

³Penepo Sathani ampanga kuti: “Ngakhala Iwe ndiwe Mwana wa Mulungu, panga mwala uyu kuti usanduke ubwere nkate.”

⁴Mbwenye Yezu antawira tenepa: “Pyalembwa m'Bukhu ya Mulungu kuti: ‘Si cakudya basi tayu cinapulumusa munthu.’ ”

⁵Penepo Dyabu akwata Yezu mbaenda na iye pa mbuto yakulapha, mbampangisa n'dzidzi ubodzi ene, umambo onsene wa pantsi pano,

⁶mbampanga kuti: “Ine ndinakupasa mphambvu ya utongi na mbiri yonsene iyi. Thangwi pyonsene ipi ndapasiwa, pontho ndinakwanisa kupasa anafuna ine.

⁷Na tenepo, ungandigodamira mbundilambira, pyonsene ipi pinakhala pyako.”

⁸Yezu antawira tenepa: “Pyalembwa kuti: ‘Lambira Mbuya Mulungu wako, mbuphatira basa Iye ekha basi.’ ”

⁹Buluka penepo, Dyabu ankwata mbaenda na iye ku Djerusalema, ankwiza padzulu kakamwe pa Nyumba ya Mulungu mbampanga tenepa: “Ngakhala iwe ndiwe Mwana wa Mulungu, numpha padzulu pano ugwe pantsi.

¹⁰Thangwi pyalembwa kuti: “ ‘Mulungu anadza kapanga anju zace, pa thangwi yako toera akukoye.

¹¹Pontho, iwo anakugampha na manja awo, toera ukhonde kuphekeka na myala.’ ”

¹² Yezu antawira tenepa: “Pyalongwa kuti: ‘Leka kunyengerera Mbuya Mulungu wako.’ ”

¹³Pakumala manyengerero onsene awa, Sathani ansiya Yezu mbadikhira n'dzidzi unango.

¹⁴Na tenepo, Yezu abwerera ku Galileya wakudzala na mphambvu za Nzimu Wakucena, mbiri yace mbibvekera n'cisa ceneco consene.

¹⁵Iye akhapfundzisa n'kati mwa nyumba za kuphemberera za madjuda, anthu onsene mbakhansimba.

¹⁶Yezu aenda ku Nazareti kudakula Iye. Ntsiku ya Sabudu, Iye apita n'nyumba ya kuphemberera ya madjuda ninga nsambo wace. Penepo, Iye alamuka toera kuona pidalembwa m'Bukhu ya Mulungu.

¹⁷Na tenepo, Yezu apasiwa bukhu ya mporofeta Izaya. Aifungula, mbagumana mbuto ikhadalembwa tenepa:

¹⁸“Nzimu wa Mbuya uli na Ine, thangwi iye andidzodza toera ndilonge Mphangwa Zadidi kuna anyakucherenga. Iye andituma toera ndikhadziwise adamangwa kuti asudzulwa, pontho kuti maboli-boli akwanise kuona, na kuombola anyakupondererwa.

¹⁹Pontho na kudziwisa caka ca ntsisi za Mbuya.”

²⁰Na tenepo, afunga Bukhu mbaibweza pontho kuna nyabasa wa mwenemu, mbakhala pyace pantsi. Onsene akhali mu nyumba ya kuphemberera atoma kumulang'anisa.

²¹Penepo, Yezu atoma kuapanga kuti: “Lero pyasimbiswa ipi pidamala imwe kubva m'Bukhu ya Mulungu.”

²²Onsene atoma kunsimba Yezu mbakhadzumatirwa na mafala a kukoma ntima kwa Mulungu akhabuluka pa mulomo pace, mbakhabvundza kuti: “Kodi siye unowu tayu mwana wa Zuze?”

²³Na tenepo, Yezu aapanga kuti: “Ndimo mwene, imwe munati mundilongere nsanje unalonga kuti: ‘Iwe nkondzi, kondzeka wekha. Citambo muno n'dziko mwako, pire pidabva ife kuti wapicita mu Kafaranaumi.’ ”

²⁴Yezu athimiza pontho mbalonga kuti: “Ndimo mwene ndisakupangani kuti: Nkhabe mporofeta m'bodzi anatambirwa mwadidi ku dziko kwace.

²⁵Ndimo mwene, ndinakudziwisani kuti: Pa midzidzi ya Eliya, akhalipo akazi azinji adaferwa na amuna awo mu dziko ya Izarayeli, caka cidaoneka cilala cidamala pyaka pitatu na hafu, mbakuoneka njala ikulu n'dziko yonsene.

²⁶Apo nkhabe nkazi m'bodzi adaferwa na mamuna wace wa ku Izarayeli, adatumirwa Eliya. Mbwenye iye atumiwa kwenda ku dziko inango kuna nkazi m'bodzi basi adaferwa na mamuna wace, wa ku Sarapeta, ku cisa ca Sidhoni.

²⁷Pontho akhalipombo anyamatanya azinji ku Izarayeli pa midzidzi ya mporofeta Elizeu, mbwenye nkhabe m'bodzi wawo adawangiswa. Adadza kawangiswa ndi Namani basi wa ku dziko ya Sirya.”

²⁸Anthu onsene akhali n'nyumba ya kuphemberera, aipirwa pikulu na kubva penepyo.

²⁹Na tenepo, anthu onsene alamuka mban'thamangisa mu nzinda, mbankwata mpaka padzulu pa phiri pakhadamangwa nzinda unowu, toera am'bhomere pantsi.

³⁰Mbwenye Yezu apita na pakati pawo mbaenda pyace.

³¹Na tenepo, Yezu aenda ku Kafaranaumi ku nzinda wa Galileya, mbatoma kupfundzisa mbumba ntsiku ya Sabudu.

³²Anthu onsene akhadzumatirwa na mapfundzisiro ace, thangwi akhalonga na mphambvu za utongi.

³³N'nyumba ya kuphemberera, mukhali na mamuna m'bodzi akhadaphatwa na dimonyo, nzimu wa kuipa, mbakhuwa na mphambvu kuti:

³⁴“Ha! Yezu wa ku Nazareti, musafunanji na ife? Mwabwera kudza katifudza? Ine ndisakudziwani kuti ndimwe ani. Ndimwe Wakucena wa Mulungu!”

³⁵Penepo Yezu aupwekera nzimu wa kuipa, mbaupanga kuti: “Matama, pontho buluka muna munthu uyu!” Na tenepo, nzimu wa kuipa wam'bhoma munthu pantsi, pamaso pa anthu onsene, mbubuluka m'manungo mwace, munthu mbakhonda kuphekeka.

³⁶Onsene anthu adzumatirwa napyo mbakhalonga okha-okha tenepa: “Mafala anji enewa anatonga na Iye mizimu ya kuipa na mphambvu na utongi, iyo mbibulukadi?”

³⁷Na tenepo, mbiri yace Yezu ikhabvekera m'pisa pyonsene pya dhuzi.

³⁸Yezu abuluka ku nyumba ya kuphemberera, mbaenda ku nyumba ya Simau. Mebzala wace Simau akhadaferuka pikulu pyene. Iwo aphemba kuna Yezu kuti am'phedze.

³⁹Yezu alimira n'khundu mwa ntenda, akotama mbapwekera nthenda, iyo mbinsiya. Pa n'dzidzi ubodzi-bodzi ntenda alamuka, mbatoma kuaphatira basa.

⁴⁰Mukhadoka dzuwa, mbumba ikhadzesa onsene akhakhala na nthenda zawo za kusiyana-siyana, kuna Yezu. Penepo Iye akhaawangisa na kuaikha manja m'bodzi na m'bodzi.

⁴¹Pontho, anthu azinji akhabuluka mizimu ya kuipa mbikhakhuwa tenepa: “Iwe ndiwe Mwana wa Mulungu!” Mbwenye Yezu akhaipwekera mbakhaikhondesa kulonga, thangwi iyo ikhadziwa kuti Iye ndi Kirixtu.

⁴²Pidaca kunja, Yezu abuluka mbaenda kutali na anthu, pace ekha. Apo mbumba yatoma kunsaka. Mudafika iwo pakhakhala Iye, ankakamiza kuti akhonde kuasiya.

⁴³Mbwenye Yezu aapanga tenepa: “Pisafunika kuti ine ndiyendembo kamwaza Mphangwa Zadidi za Umambo wa Mulungu m'mizinda inango. Thangwi ndipyo pidatumirwa Ine.”

⁴⁴Na tenepo, Yezu akhaenda basi mbalonga Mphangwa Zadidi m'manyumba a kuphemberera a dziko ya Djudeya.