Read Cibverano Cipsa Cisena Jw. 11 Bible Online

Jw. 11 - Cibverano Cipsa Cisena bible

Jw. 11

¹Akhalipo mamuna m'bodzi akhacemerwa Lazaru. Iye akhali wa ku Bhetanya, cisa cikhakhala anakazi ace Mariya na Marita. Ntsiku inango Lazaru aphatwa na nthenda.

²Mariya unowu akhali na m'bale wace Lazaru akhabva kupha, ndi m'bodzi ene adadzoza Yezu mafuta akununkhira, mbampukuta myendo na tsisi yace.

³Na tenepo, anakazi ace Lazaru, atuma anthu kwenda kalonga kuna Yezu kuti: “Mbuya, xamwali wanu ule anafuna Imwe, ali kubva kupha.”

⁴Yezu pidabva iye penepi, alonga tenepa: “Nthenda iyi si ya kufa nayo tayu, mbwenye ndi ya mbiri ya Mulungu, toera Mwana wa Mulungu apaswe nayo mbiri.”

⁵Mphapo Yezu akhafuna onsene, Marita, Mariya na Lazaru.

⁶Yezu na kubva kuti Lazaru ali kuduwala, amala pontho ntsiku ziwiri mbakhonda kwendako.

⁷Buluka penepo aapanga anyakupfundza ace kuti: “Tendeni tibwerere ku Djudeya.”

⁸Mbwenye anyakupfundza ace ampanga kuti: “Mpfundzisi, madjuda akhafuna kukumenyani cincino na myala, musafuna kwenda pontho kweneku?”

⁹Yezu aatawira kuti: “Kodi ntsiku iri na midzidzi khumi na miwiri tayu? Anafamba na masikati nkhabe gwegweduka, thangwi asaona cieza ca dziko ino.

¹⁰Mbwenye anafamba na masiku anagwegweduka, thangwi muna iye nkhabe cieza.”

¹¹Pakumala kulonga penepyo, Yezu athimiza na kulonga kuti: “Xamwali wathu Lazaru agona, mbwenye ndiri kwenda kweneku kamulamusa!”

¹²Mphapo anyakupfundza ace alonga tenepa: “Ngakhala Lazaru agona, analamuka.”

¹³Yezu akhaapanga na thangwi ya kufa kwa Lazaru, mbwenye anyakupfundza ace akhanyerezera kuti akhalongera na thangwi ya citulo.

¹⁴Na tenepo, Yezu aapanga pakweca kuti: “Lazaru afa.

¹⁵Na thangwi yanu, Ine ndakomerwa thangwi sikhali kweneku tayu, toera imwe mutawire. Mbwenye tendeni kweneko kuna iye.”

¹⁶Tomasi, anacemerwa Dhidhimu,[25] alonga kuna anyakupfundza andzace kuti: “Tendenimbo tikhafe na iye pabodzi.”

¹⁷Pidafika Yezu ku Bhetanya, agumana Lazaru akhali na ntsiku zinai mbali n'nthumbi.

¹⁸Buluka ku Bhetanya mpaka ku Djerusalema, pakhali na nsindzo wa makilometuru matatu,[26]

¹⁹pontho azinji madjuda akhadaenda kamatamisa Marita na Mariya, na thangwi ya kufa kwa m'bale wawo.

²⁰Na tenepo, Marita pidabva iye kuti Yezu ali kufika, aenda kagumana na iye, mbwenye Mariya akhadasala nawa pa nyumba.

²¹Marita alonga kuna Yezu kuti: “Mbuya, mbamudakhala pano m'bale wanga mbadafa tayu.

²²Mbwenye ine ndisadziwa kuti mungafuna cincino, Mulungu anakupasani pyonsene pinafuna phemba imwe.”

²³Yezu alonga kuti: “M'bale wako analamuka.”

²⁴Marita atawira tenepa: “Ine ndisadziwa kuti iye analamuka pa kulamuka pa kufa kwa anthu ntsiku yakumalisa.”

²⁵Yezu ampanga kuti: “Ine ndine kulamuka pa kufa na upulumuki. Ule ananditawira, peno mbadafa, anakhala m'maso.

²⁶Ule ali m'maso, anganditawira, nkhabe kudza kafabve. Iwe unatawira penepi?”

²⁷Marita atawira kuti: “Ande Mbuya, ine ndisatawira kuti Imwe ndimwe Kirixtu, Mwana wa Mulungu akhafuna bwera pa dziko.”

²⁸Pidamala Marita kulonga penepi, aenda kuna Mariya m'bale wace mbancemera pa khundu, mbampanga kuti: “Mpfundzisi abwera, asakucemera.”

²⁹Na tenepo Mariya na kubva mphangwa zenezi, alamuka na mwansanga, mbaenda kagumana na Yezu.

³⁰Yezu akhadzati kupita n'cisa, mbwenye akhakhala pale pakhadan'gumana Marita.

³¹Madjuda akhali penepo pa nyumba toera kumatamisa Mariya, pidamuona iwo kuti alamuka na mwansanga mbabuluka, antowera mbanyerezera kuti ali kwenda kalira ku nthumbi.

³²Mariya pidafika iye pa mbuto pakhakhala Yezu, na kumuona, amulambira pa myendo pace, mbalonga kuti: “Mbuya, Imwe mbamudakhala pano m'bale wanga mbadafa tayu.”

³³Na tenepo, Yezu pidaona iye Mariya na madjuda akhamperekera mbakhalira, anentseka mbatsukwala pikulu kakamwe.

³⁴Penepo Yezu abvundza kuti: “Mwamuikha papi?” Iwo antawira kuti: “Mbuya, bwerani, muone.”

³⁵Yezu alira.

³⁶Na tenepo, madjuda alonga kuti: “Lang'anani kufuna kukhancita iye!”

³⁷Mbwenye anango pa nsoka wawo alonga kuti: “Iye adawangisa boli-boli, acimwana tani kucita kuti Lazaru akhonde kufa?”

³⁸Yezu atsukwala pikulu kakamwe, mbaenda mpaka ku nthumbi. Nthumbi ikhali ya dzimba, nsuwo wace ukhadafungwa na mwala.

³⁹Yezu alonga kuti: “Bulusani mwala.” Marita m'bale wace Lazaru alonga kuti: “Mbuya, ali kununkha. Thangwi ana ntsiku zinai mbadafa kale.”

⁴⁰Yezu antawira kuti: “Ine sidakupanga tayu kuti iwe ungakhulupira unati uone mbiri ya Mulungu?”

⁴¹Na tenepo, anthu abulusa mwala. Yezu alang'ana kudzulu mbalonga kuti: “Baba, ndinapereka takhuta thangwi mwandibva.

⁴²Ine ndisadziwa kuti imwe musandibva ntsiku zonsene, mbwenye ndalonga penepi thangwi ya mwinji uli pano, toera utawire kuti ndimwe mwandituma.”

⁴³Pakumala kulonga penepyo Yezu akhuwa na mphambvu zonsene mbalonga kuti: “Lazaru, buluka kunja!”

⁴⁴Nyakufa abuluka mbadamala pyangirirwa na miceka, myendo na manja ene, nkhope yace mbifinikizwa na nguwo. Na tenepo, Yezu aapanga kuti: “Nsudzuleni, munsiye aende.”

⁴⁵Madjuda azinji, ale akhadabwera kudza kaona Mariya, na kuona pire pidacitika, atawira Yezu.

⁴⁶Mbwenye madjuda anango, aenda kuna afarisi mbaapanga pikhadacita Yezu.

⁴⁷Na tenepo, akulu aanyantsembe na afarisi, agumanya Nsoka wa Anyakutonga miseru mbalonga kuti: “Mphyanji pinacita ife? Mamuna uyu asacita pidzindikiro pya pirengo pizinji.

⁴⁸Tingansiya tenepa anthu onsene anantawira. Na tenepo, umambo wa ku Roma unabwera mbutikwatira mbuto zathu,[27] pontho mbatikwatira dziko yathu.”

⁴⁹Apo m'bodzi wawo akhacemerwa Khaifasi, pa caka cenecire akhali nkulu wa anyantsembe alonga kuti: “Imwe nkhabe cinthu cinadziwa imwe!

⁵⁰Imwe nkhabe dziwa kuti mphyadidi kuna imwe munthu m'bodzi afe, fera mbumba, toera anthu onsene a dziko yathu akhonde kufa.”

⁵¹Lang'anani, Khaifasi hakhalonga pya munsolo mwace tayu. Mbwenye iye, ninga nkulu wa anyantsembe pa caka ceneco, cikhali ciporofeta ca kuti Yezu anadza kafa fera mbumba ya madjuda.

⁵²Yezu hanadza kafera mbumba eneyo basi tayu, mbwenye anadza kafera ana onsene a Mulungu adabalalika pa dziko yonsene, kuti aagumanye toera akhale mbumba ibodzi.

⁵³Na tenepo, kutomera ntsiku eneyo kwenda kutsogolo, abverana kuti aphe Yezu.

⁵⁴Na thangwi eneyo, Yezu akhafambabve pakweca mbaoneka na madjuda tayu. Mbwenye abuluka mbaenda ku cisa cikhali dhuzi na thando, ku nzinda unacemerwa Efaraimu, mbakhala kweneko na anyakupfundza ace.

⁵⁵Phwandu ya Paxkwa ya madjuda ikhali dhuzi. Anthu azinji akhabuluka m'pisa penepyo mbakhaenda ku Djerusalema kacita mitemo yawo ya kuceneswa, Paxkwa mbidzati kufika.

⁵⁶Madjuda akhansaka basi Yezu, mbakhabvundzana m'bodzi na m'bodzi mu Nyumba ya Mulungu kuti: “Musaona tani? Iye anati abwere ku phwandu?”

⁵⁷Akulu aanyantsembe na afarisi akhadabulusa ntemo wa kuti: “Ule munthu anadziwa kunakhala Yezu mbatipange toera tiyende kam'mange.”