Read Cibverano Cipsa Cisena Jw. 15 Bible Online

Jw. 15 - Cibverano Cipsa Cisena bible

Jw. 15

¹“Ine ndine mutidi wa mauva, Baba wanga ndi nyakulima.

²Nthawi zonsene ziri muna Ine, zinakhonda bala misapu, Iye anazigwanda. Pontho, nthawi zonsene zinabala misapu, anazisadzulira toera zibale misapu mizinji.

³Imwe mwaceneswa kale na fala idakupangani Ine.

⁴Khalani muna Ine, Ine ndinakhalambo muna imwe. Nkhabe nthawi inabala misapu yokha, ingakhonda kukhala pa muti wa mauva. Sawa-sawambo na imwe, nkhabe kubala misapu mungakhonda kukhala muna Ine.

⁵“Ine ndine muti wa mauva, imwe ndimwe nthawi. Ule anakhala muna Ine, Ine mbandikhala muna iye, unowu anabala misapu mizinji. Thangwi imwe mwekha ene, nkhabe cinthu cibodzi cinafuna cita imwe.

⁶Ule anakhonda khala muna Ine, anakhala ninga nthawi idataiwa kunja mbiuma. Nthawi zenezo zinakwatiwa, mbaziponyiwa pa moto mbazipya.

⁷Imwe mungakhala muna Ine, mafala anga mbakhala muna imwe, munaphemba pinafuna imwe mbamupicitirwa.

⁸Baba wanga anapaswa mbiri imwe mungabala misapu mizinji, pontho munakhala anyakupfundza anga.

⁹“Ninga Baba wanga andifuna, Ine ndakufunanimbo. Khalani n'kati mwa mafuniro anga.

¹⁰Imwe mungakoya mitemo yanga, munakhala n'kati mwa mafuniro anga, sawa-sawa ninga Ine ndisakoya mitemo ya Baba wanga, mbandikhala n'kati mwa mafuniro ace.

¹¹Ndakupangani mafala awa, toera kutsandzaya kwanga kukhale na imwe, pontho kutsandzaya kwanu kukwane.

¹²Mwambo wanga ndi uxu: Mufunane m'bodzi na m'bodzi ninga Ine ndakufunani.

¹³Nkhabe munthu anako kufuna kukulu kupiringana ule anafera axamwali ace.

¹⁴Imwe munakhala axamwali anga, mungacita pire pinakupangani Ine.

¹⁵Ine nkhabe kukucemeranibve anyabasa tayu, thangwi nyabasa nkhabe dziwa pinacita mbuya wace. Ndinakucemerani axamwali. Thangwi pyonsene pidabva Ine na Baba, ndakupangani.

¹⁶Simwe adandisankhula tayu, mbwenye ndine adakusankhulani mbandikutumani kuti mwende, pontho mubale misapu, misapu yakukhaliratu, toera Baba akupaseni pinaphemba imwe, na dzina yanga.

¹⁷Matongero anga mbawa: Funanani m'bodzi na m'bodzi.

¹⁸“Ngakhala dziko isakuzondani, dziwani kuti yatoma kuzonda Ine.

¹⁹Imwe mbumudakhala a padziko, dziko mbidakufunani ninga anthu awo. Mphapo imwe simwe a padziko tayu, mbwenye Ine ndakusankhulani mbandikubulusani pa dziko. Na thangwi eneyo, dziko isakuzondani.

²⁰Kumbukani mafala adakupangani Ine kuti: Nkhabe nyabasa m'bodzi anapita mbuya wace. Ngakhala Ine andizonda, anakuzondanimbo. Ngakhala Ine andibvera mafala anga, anabverambo mafala anu.

²¹Mbwenye anakucitani tenepo na thangwi ya dzina yanga, thangwi iwo nkhabe kun'dziwa ule adandituma.

²²Ine mbandidakhonda kubwera mbandiapanga, mbadapaswa mphoswa ya kudawa tayu. Mbwenye cincino iwo nkhabebve pakutunira madawi awo.

²³Ule anandizonda, ali kuzondambo Baba wanga.

²⁴Ine mbindidakhonda kucita mabasa pakati pawo adakhonda kucitwa na unango, iwo mbadakhala na mphoswa ya kudawa tayu. Mbwenye cincino iwo aaona mabasa anga, mbazonda Ine na Baba wanga ene.

²⁵ Mbwenye penepi pyacitika toera pisimbiswe pire pidalembwa mu Mwambo wawo kuti: ‘Andizondera pezi.’

²⁶“Angabwera M'matamisi anafuna kukutumirani Ine bulukira kuna Baba, Nzimu unadzesa undimo mwene unabuluka kuna Baba, Iwo unandicitira umboni.

²⁷Imwe munati mucitembo umboni, thangwi muli na Ine kutomera pakutoma.”