Read Cibverano Cipsa Cisena Jw. 17 Bible Online

Jw. 17 - Cibverano Cipsa Cisena bible

Jw. 17

¹Pakumala kulonga penepi, Yezu alang'ana kudzulu mbaphembera tenepa: “Baba, wakwana n'dzidzi. Pasa mbiri Mwana wako, toera Mwana wako akupasembo mbiri.

²Thangwi Imwe mwapasa Mwana wanu mphambvu za kutonga anthu onsene[33] kuti apase upulumuki wakukhonda kumala kuna ale onsene adampasa imwe.

³Upulumuki wakukhonda kumala ndi uyu: Akudziweni kuti ndimwe ene basi Mulungu wa ndimo mwene, pontho na kudziwambo Yezu Kirixtu adatuma imwe.

⁴Ine ndakupasani mbiri pantsi pano, mbandimalisa basa idandipasa imwe kuti ndiicite.

⁵Na tenepo, cincino Baba, ndipaseni mbiri pamaso panu, mbiri ikhakhala na Ine pamaso panu, dziko mbidzati kucitwa.

⁶“Ine ndapangisa dzina yanu kuna anthu adabulusa imwe pa dziko mbamundipasa. Iwo akhali anu. Imwe mwaapasa Ine, iwo asabvera fala yanu.

⁷Cincino iwo asadziwa kuti pyonsene pidandipasa imwe pyabuluka kuna imwe.

⁸Thangwi Ine ndaapanga mafala adandipasa imwe, iwo aatawira. Ndimo mwene, iwo adzindikira kuti Ine ndabuluka kuna imwe, pontho atawira kuti ndimwe adandituma.

⁹Ine ndisaaphemberera. Siri kuphemberera dziko tayu, mbwenye ndisaphemberera ale adandipasa imwe, thangwi ndi anthu anu.

¹⁰Pyonsene pina Ine mphyanu, na pyonsene pina imwe mphyanga. Na tenepo, Ine ndisapaswa mbiri na thangwi yawo.

¹¹Sinadza kakhala pontho pa dziko tayu, mbwenye iwo na lero ali pano pa dziko, pontho Ine ndiri kudza kuna imwe. Baba wakulungama, akoyeni mu dzina yanu, dzina ire idandipasa imwe, toera iwo akhale cinthu cibodzi, ninga ife ndife cibodzi.

¹²Pa n'dzidzi ukhakhala Ine na iwo, Ine ndaalang'anira mbindiakoya mu dzina yanu idandipasa imwe. Nkhabe m'bodzi wawo adataika. Adataika ndi ule basi akhadapambulika kale kuti ataike[34] toera pisimbiswe pire pikhadalembwa m'Bukhu ya Mulungu.

¹³“Cincino ndiri kudza kuna imwe, mbwenye ndisalonga pinthu penepi mbandiri pano pa dziko, toera kutsandzaya kwanga kukwane muna iwo ene.

¹⁴Ine ndaapasa fala yanu, mbwenye dziko yaazonda, thangwi iwo si a padziko tayu, ninga Inembo sine wa padziko tayu.

¹⁵Siri kuphemba kuti muabuluse pa dziko tayu, mbwenye kuti muabvunulire mu mphambvu za Nyakuipa.

¹⁶Iwo si a padziko tayu, ninga inembo sine wa padziko tayu.

¹⁷Aciteni kuti aperekeke mwakukwana kuna imwe, thangwi fala yanu nja ndimo mwene.

¹⁸Sawa-sawa ninga mudandituma imwe kudza pa dziko, Ine ndisaatumambo kwenda n'dziko.

¹⁹Na thangwi ya iwo, Ine ndisaperekeka mwakukwana kuna imwe, toera iwo aperekekembo mwakukwana kuna imwe.

²⁰“Maphembero anga sisaacitira kuli iwo basi tayu. Ndisaphemberambo kuli ale anafuna kudza kanditawira na thangwi ya fala yawo,

²¹toera onsene akhale cibodzi. Baba, ninga imwe muli muna Ine, pontho Ine ndiri muna imwe. Kuti iwo akhalembo muna ife, toera dziko itawire kuti imwe mwandituma.

²²Ine ndaapasa mbiri idandipasa imwe, kuti iwo akhale cibodzi, ninga ife ndife cibodzi.

²³Ine muna iwo, imwe muna Ine, kuti akwane pa kuphatana, toera dziko idziwe kuti mwandituma, pontho kuti mwaafuna sawa-sawa ninga imwe mwandifuna.

²⁴“Baba, ndisafuna kuti ale adandipasa imwe akhale pale pana Ine kuti aone mbiri yanga, mbiri idandipasa imwe na kundifuna kwanu, dziko mbidzati kucitwa.

²⁵“Baba wakulungama, dziko nkhabe kukudziwani, mbwenye Ine ndisakudziwani. Awa asadziwa kuti ndimwe adandituma.

²⁶Ine ndaadziwisa kuti imwe ndimwe ani, pontho ndinathimiza basi na kuadziwisa, toera kufuna kudandicita imwe kukhale muna iwo, pontho Ine ndikhalembo muna iwo.”