Read Cibverano Cipsa Cisena Jw. 18 Bible Online

Jw. 18 - Cibverano Cipsa Cisena bible

Jw. 18

¹Yezu pidamala Iye kuphembera, abuluka pabodzi na anyakupfundza ace mbawambuka gowa ya Khedhoroni, mbaenda ntunda unango. Kweneko kukhakhala na tapada ibodzi, Iye mbapita mwenemu pabodzi na anyakupfundza ace.

²Djuda nyakusandukira Yezu, akhaidziwa mbuto eneyo, thangwi Yezu kazinji kene akhagumanyikana kweneko pabodzi na anyakupfundza ace.

³Na tenepo, Djuda aenda ku tapada eneyi mbakwata nsoka wa anyankhondo a ku Roma, na anango anyakuonera Nyumba ya Mulungu adatumwa na akulu aanyantsembe na afarisi. Iwo akwata pida pya nkhondo, nyale na ntsakali.

⁴Yezu, na kudziwa pyonsene pikhafuna kuncitikira, aafendedzera mbaabvundza kuti: “Mbani anasaka imwe?”

⁵Iwo atawira kuti: “Tiri kusaka Yezu wa ku Nazareti.” Yezu atawira kuti: “Ndine pano.” (Djuda, nyakusandukira Yezu, akhali pabodzi na iwo.)

⁶Pidatawira Yezu kuti ndine pano, iwo abwerera n'nduli, mbagwa pantsi.

⁷Yezu aabvundza pontho kuti: “Mbani anasaka imwe?” Iwo alonga kuti: “Tiri kusaka Yezu wa ku Nazareti.”

⁸Yezu aatawira tenepa: “Ine ndakupangani kale kuti ndine pano. Ngakhala muli kusaka Ine, siyani amuna awa aende pyawo.”

⁹Penepyo pyacitika toera asimbiswe mafala akhalonga Iye kuti: “Adandipasa imwe, nkhabe m'bodzi adataya Ine.”

¹⁰Penepo, Simau Pedhru, abulusa tarasada ikhali na iye, mbaphekesa nyabasa wa nkulu wa anyantsembe, mban'gwanda khutu ya madyo. Nyabasa unowu akhacemerwa Maliko.

¹¹Mbwenye Yezu ampanga Pedhru kuti: “Koya tarasada yako! Ndiko iyi ya nyatwa idandipasa Baba, Ine nkhabe kudza kaimwa?”

¹²Na tenepo, anyankhondo, na nkulu wa nyankhondo, na anyakuonera atongi a madjuda, amphata Yezu mbamanga.

¹³Pakutoma ankwata mbaenda na iye kuna Anasi, akhali tebzala wa Khaifasi, nkulu wa anyantsembe pa caka ceneco.

¹⁴Khaifasi ndiye akhadalonga kuna madjuda kuti, mphyadidi munthu m'bodzi afe, fera mbumba.

¹⁵Simau Pedhru na nyakupfundza unango m'bodzi, akhatowera Yezu. Nyakupfundza unowu, na kudziwika kukhacita iye na nkulu wa anyantsembe, apita pabodzi na Yezu n'khonde mwa n'nyumba ya nkulu wa anyantsembe.

¹⁶Mbwenye Pedhru asala kunja, pa nsuwo. Nyakupfundza wa Yezu akhadziwika na nkulu wa anyantsembe, abwerera mbalonga na nyabasa wankazi akhaonera pa nsuwo, mbakwata Pedhru mbapita na iye n'kati.

¹⁷Na tenepo, nyabasa wankazi abvundzisa Pedhru kuti: “Iwe siwe m'bodzi wa anyakupfundza a mamuna uyu tayu?” Pedhru antawira kuti: “Sine tayu.”

¹⁸Na thangwi ya kutonthola, anyabasa na anyakuonera aphatisa moto wa makala mbakhaotha. Pedhru akhalipombo penepo dzololo, mbakhaotha pabodzi na iwo.

¹⁹Na tenepo, nkulu wa anyantsembe abvundzisa Yezu pa thangwi ya anyakupfundza ace, na mapfundzisiro akhacita Iye.

²⁰Yezu antawira tenepa: “Ine ndalonga pakweca kuna anthu. Kazinji kene ndikhapfundzisa m'manyumba akuphemberera na mu Nyumba ya Mulungu, mukhagumanyikana madjuda onsene. Nkhabe cibodzi cidalonga Ine n'cibiso-biso.

²¹Thangwi yanji usandibvundza? Bvundza ale adapibva pidalonga Ine. Iwo asapidziwa mwadidi mwene pidaapanga Ine.”

²²Yezu pidamala Iye kulonga penepyo, nyakuonera m'bodzi akhakhala dhuzi na penepo, ampasa mbama mbalonga kuti: “Unatawira tenepa nkulu wa anyantsembe?”

²³Yezu atawira kuti: “Ngakhala ndalonga pyakuipa, longa uipi udacita Ine. Mbwenye ngakhala ndalonga mwadidi, thangwi yanji wandimenya?”

²⁴Na tenepo, Anasi aendesa Yezu mbadamala mangwa mikono, kuna Khaifasi, nkulu wa anyantsembe.

²⁵Penepo akhalipombo Simau Pedhru, mbakhaotha moto. Iye abvundziwa kuti: “Kodi iwe siwe nyakupfundza m'bodzi wa Yezu tayu?” Pedhru akhonda mbalonga kuti: “Sine tayu.”

²⁶Mbwenye nyabasa m'bodzi wa nkulu wa anyantsembe, m'bale wa mamuna adagwandiwa khutu na Pedhru, am'bvundza kuti: “Ine sidakuona tayu n'tapada pabodzi na Iye?”

²⁷Mbwenye Pedhru akhonda pontho. Pa n'dzidzi ubodzi-bodzi, dzongwe yalira.

²⁸Buluka ku nyumba ya Khaifasi, iwo ankwata Yezu mbaenda na iye ku nyumba yakutongera miseru. Kunja kukhaeca. Madjuda akhonda kupita n'nyumba ikhakhala ntongi wa ku Roma,[35] thangwi akhagopa numpha mwambo wawo, toera akwanise kudya phwandu ya Paxkwa.

²⁹Na tenepo, ntongi Piratu abuluka toera alonge na iwo, mbaabvundza kuti: “Adawanji mamuna uyu anasumira imwe?”

³⁰Iwo atawira tenepa: “Iye mbadakhonda cita cakuipa, mbatidampereka kuna imwe tayu.”

³¹Piratu aapanga kuti: “Nkwateni muntonge ninga munalongera mwambo wanu.” Madjuda atawira tenepa: “Ife nkhabe tawirirwa kupha munthu.”

³²Penepi pyacitika toera kusimbisisa mafala akhadalonga Yezu, mbakhapangisa mafero akhafuna kucita Iye.

³³Na tenepo, Piratu abwerera pontho mu nyumba ya kutongera miseru, acemera Yezu mbam'bvundza kuti: “Iwe ndiwe mambo wa madjuda?”

³⁴Yezu atawira tenepa: “M'bvundzo unowu ndi wako ene, peno alipo anango adakupanga na thangwi yanga?”

³⁵Piratu antawira tenepa: “Kodi usanyerezera kuti ine ndine n'djuda? Ndi akulu aanyantsembe na mbumba yako idakupereka kuna ine. Wacitanji iwe?”

³⁶Yezu atawira kuti: “Umambo wanga si wa padziko ino tayu. Mbudakhala ndi wa padziko ino, anyabasa anga mbadamenyana na iwo, toera madjuda akhonde kundimanga. Mbwenye cincino umambo wanga si wa dziko ino tayu.”

³⁷Piratu alonga kuti: “Na tenepo, Iwe ndiwe mambo!” Yezu antawira tenepa: “Iwe ndiwe anapilonga kuti Ine ndine Mambo. Ande, ndi thangwi eneyo ndabalwa, pontho mbandibwera pa dziko toera ndicite umboni wa undimo mwene. Onsene a ndimo mwene asandibva.”

³⁸Piratu abvundza kuti: “Ndi ninji undimo mwene?” Pidamala iye kubvundza abuluka pontho kunja kukakhala madjuda, mbalonga tenepa: “Nkhabe kuiona thangwi idaipisa Iye.

³⁹Mbwenye ninga pinalongera mitemo yanu, ine ndisatongwa kubulusa munthu m'bodzi n'kaidi n'dzidzi wa phwandu ya Paxkwa. Apo lero imwe musafuna ndikubulusireni mambo wa madjuda?”

⁴⁰Na tenepo, onsene atoma kukhuwa pontho kuti: “Iye nkhabe. Tibulusireni Bharabhasi.” Mphapo Bharabhasi akhali phanga.