Read Cibverano Cipsa Cisena Jw. 19 Bible Online

Jw. 19 - Cibverano Cipsa Cisena bible

Jw. 19

¹Na tenepo, Piratu ankwapulisa Yezu.

²Anyankhondo aluka nthimba ya minga, amuikha munsolo mwace mbam'bvazika nguwo ya ropa.

³Iwo afika dhuzi na Iye mbakhalonga kuti: “Bweraniko, mambo wa madjuda!” Mbakhampasa mbama.

⁴Piratu abuluka pontho kunja mbalonga kuna madjuda tenepa: “Lang'anani, ine ndiri kudza na iye kunja kuno, toera imwe mudziwe kuti ine nkhabe kuiona thangwi idaipisa Iye.”

⁵Yezu mudabuluka Iye kunja, mbadamala bvazikwa nthimba ya minga na nguwo ya ropa, Piratu aapanga tenepa: “Lang'anani, ali pano mamuna uyu!”

⁶Pidamuona iwo, akulu aanyantsembe na anyakuonera, atoma kukhuwa mbalonga kuti: “N'khomereni pa ntanda! N'khomereni pa ntanda!” Mbwenye Piratu atawira kuti: “Nkwateni imwe munkhomere. Ine nkhabe kuiona thangwi idaipisa Iye.”

⁷Mphapo madjuda alonga kuti: “Ife tina mwambo, na mwambo unowu iye asatongwa aphiwe, thangwi alonga kuti: ‘Ine ndine Mwana wa Mulungu.’ ”

⁸Piratu pidabva iye penepi, agoperatu pikulu kakamwe.

⁹Iye abwerera pontho n'nyumba mukhakhala Yezu, mbam'bvundza kuti: “Iwe wabuluka kupi?” Mbwenye Yezu hadantawira tayu.

¹⁰Piratu ampanga kuti: “Iwe nkhabe funa kunditawira? Nkhabe dziwa kuti ine ndina mphambvu za kukubulusa na za kukukhomeresa pa ntanda?”

¹¹Yezu antawira kuti: “Nkhabe mphambvu ibodzi ya utongi ikhafuna kukhala na iwe kuna ine, mbudakhonda paswa na Mulungu. Na thangwi eneyo, ule adandipereka kuna iwe ndiye adadawa pikulu.”

¹²Buluka penepo, Piratu akhasaka kusudzula Yezu, mbwenye madjuda akhakhuwa mbakhalonga tenepa: “Ungasudzula mamuna uyu, siwe xamwali wa Sezari[36] tayu, thangwi ule anacitika mambo, ndi nyamalwa wa Sezari.”

¹³Piratu na kubva penepyo, abweresa Yezu kunja mbakhala pa mpando wa kutonga, pa Mbuto yakusasanyiwa na Myala, (na malongero a madjuda ndi Gabata.)

¹⁴Ikhali ntsiku ya kusasanyira sumana ya phwandu ya Paxkwa, pa n'dzidzi khumi na uwiri wa masikati. Na tenepo, Piratu alonga kuna madjuda kuti: “Lang'anani, ali pano mambo wanu.”

¹⁵Mbwenye iwo akhuwa kuti: “M'buluseni! M'buluseni! N'khomereni pa ntanda!” Piratu alonga kuti: “Ndikhomere mambo wanu?” Akulu aanyantsembe atawira tenepa: “Ife nkhabe mambo unango, mambo wathu ndi Sezari basi.”

¹⁶Pakumalisira, Piratu ampereka Yezu kuna iwo kuti akhomerwe pa ntanda. Na tenepo, anyankhondo ankwata.

¹⁷Yezu akwata ntanda wace, abuluka mbaenda ku mbuto inacemerwa Kavera,[37] (Na malongero a madjuda ndi Gologota.)

¹⁸Kweneko iwo an'khomera pa ntanda, pabodzi na anthu anango awiri, m'bodzi ku nkono wa madyo, unango ku nkono wa bzere, Yezu pakati.

¹⁹Piratu asasanyisa tabwa, aikhomera pa ntanda mbailemba tenepa: “YEZU WA KU NAZARETI, MAMBO WA MADJUDA.”

²⁰Madjuda azinji akhalang'ana pidalembwa pa citabwa, thangwi mbuto idakhomerwa Yezu pa ntanda, ikhali dhuzi na nzinda. Pa tabwa, pakhadalembwa na malongero matatu. A ciebhereu, a cilatii na a cigerego.

²¹Akulu aanyantsembe alonga kuna Piratu kuti: “Leka kulemba ‘Mambo wa madjuda,’ mbwenye lemba kuti Iye akhalongeka ekha kuti Ine ndine mambo wa madjuda.”

²²Na tenepo, Piratu atawira kuti: “Pidalemba ine, ndapilemba.”

²³Pidamala iwo kun'khomera pa ntanda, anyankhondo akwata nguwo za Yezu mbagawana anthu anai, m'bodzi na m'bodzi mbakwata phindi yace, mbisala nguwo ibodzi inacemerwa tunika. Nguwo eneyi ikhali na nsono tayu, ikhali nguwo ibodzi basi, buluka padzulu mpaka pantsi.

²⁴Anyankhondo abverana okha-okha mbalonga tenepa: “Mbatilekeni kuipandula tayu. Tendeni timenye ntsango, tione mbani anafuna kuikwata.” Penepi pyacitika toera pisimbiswe pidalembwa m'Bukhu ya Mulungu kuti: “Iwo agawana nguwo zanga okha-okha, mbamenyera ntsango tunika yanga.” Ndi penepi pidacita anyankhondo.

²⁵Dhuzi na ntanda wa Yezu, pakhali na akazi anai: Mai wace Yezu, na m'bale wa mai wace, Mariya nkazi wa Kolopasi, na Mariya Madhalena.

²⁶Yezu pidaona iye mai wace penepo, pontho mbaona dhuzi na mai wace nyakupfundza m'bodzi akhafuna Iye, apanga mai wace kuti: “Nkaziwe, mwana wako uxu.”

²⁷Buluka penepo alonga kuna nyakupfundza kuti: “Mai wako uxu.” Kutomera n'dzidzi unowu mpaka kutsogolo, nyakupfundza ule akwata mai wace Yezu mbakhala na iye pa nyumba pace.

²⁸Buluka penepo, Yezu na kudziwa kuti pyonsene pyamala kale, toera kusimbisa pidalembwa m'Bukhu ya Mulungu, alonga tenepa: “Ndina nyota.”

²⁹Penepo pakhali na combo cakudzala na vinagiri.[38] Na tenepo, iwo abvika thonje mwenemu, mbaipfeka kuntsonga kwa muti unacemerwa isopo, mbaikha pa mulomo wa Yezu.

³⁰Iye aimwa pang'ono mbalonga kuti: “Pyonsene pyamala!” Na tenepo, akotamisa nsolo wace, mbafa.[39]

³¹Na tenepo, madjuda na kuona kuti ikhali ntsiku ya kusasanyira phwandu ya Paxkwa, pontho toera manungo aleke kukhala pa ntanda ntsiku ya Sabudu, thangwi Sabudu eneyi ikhali Sabudu ikulu, aphemba Piratu kuti anthu aswiwe magogodo a myendo yawo,[40] abuluswe pa ntanda.

³²Na tenepo, anyankhondo abwera mbakhumula myendo ya mamuna wakutoma adakhomerwa pa ntanda pabodzi na Yezu, buluka penepo mbaenda kakhumula myendo ya mamuna unango.

³³Mudafika iwo pana Yezu, na kumuona kuti akhadafa kale, acimwana kuswa magogodo a myendo yace.

³⁴Mbwenye m'bodzi wa anyankhondo akwata dipa mbam'phola pa khundu. Pa n'dzidzi ubodzi ene, penepo pabuluka ciropa na madzi.

³⁵Ule adapyona ndiye adalonga umboni wa penepi. Umboni wace ndi wa ndimo mwene. Iye asadziwa kuti asalonga pya ndimo mwene, toera imwe mutawirembo.

³⁶Pinthu penepi pyacitika toera pisimbiswe pidalembwa m'Bukhu ya Mulungu kuti: “Nkhabe gogodo yace ibodzi inafuna swiwa.”

³⁷Pontho, pa mbuto inango Bukhu ya Mulungu yalonga kuti: “Anati amuone ule adalasa iwo na dipa.”

³⁸Pakumala penepyo, abwera Zuze wa ku nzinda wa Arimateya, kudza kaphemba manungo a Yezu kuna Piratu. Zuze akhali nyakupfundza wa Yezu, n'cibiso-biso, thangwi akhagopa madjuda. Penepo, Piratu antawirisa, Zuze mbakwata manungo a Yezu mbaenda na iwo.

³⁹Nikodhemu, ule akhadaenda na masiku kalonga na Yezu, aenda pabodzi na Zuze, mbakwata makilu makumatatu na manai[41] a pinthu pyakununkhira pyakubvungazwa na alowesi na mira.[42]

⁴⁰Na tenepo, amuna awa awiri akwata manungo a Yezu mbaapyangirira na mithambo yakucena, mbaadzodza na mafuta akununkhira, ninga nsambo wawo madjuda pakuikha kwawo munthu wa kufa.

⁴¹Pa mbuto pakhadakhomerwa Yezu pa ntanda, pakhali na dimba ibodzi ya maluwa. Pontho mwenemu mukhali na nthumbi ibodzi ipsa ya kuti cipo ikhadadzati ikhwa munthu.

⁴²Yezu aikhiwa mwenemu, thangwi nthumbi ikakhala dhuzi, pontho ntsiku eneyo ikhali ntsiku ya kusasanyira madjuda phwandu ya Paxkwa.