Read Cibverano Cipsa Cisena Jw. 20 Bible Online

Jw. 20 - Cibverano Cipsa Cisena bible

Jw. 20

¹M'bambakuca mwa ntsiku ya Dimingu, na macibese ene kunja mbakudaswipa, Mariya Madhalena aenda ku nthumbi mbaona kuti mwala ukhadaikhwa pa nsuwo wabuluswa.

²Na tenepo, Mariya Madhalena athamanga mbaenda kagumana na Simau Pedhru na nyakupfundza unango, ule akhafuniwa maka na Yezu, mbaapanga kuti: “Mbuya abuluswa n'nthumbi, ife nkhabe dziwako kudamuikha iwo.”

³Pedhru na nyakupfundza unango, abuluka mbaenda ku nthumbi.

⁴Anyakupfundza awa awiri akhathamanga pabodzi, mbwenye unango athamanga pikulu kupita Pedhru, mbatoma kufika ndiye pa nthumbi.

⁵Iye akotama mbalang'anisa n'kati mbaona mithambo yakucena iri mwenemu, mbwenye hadapitamo tayu.

⁶Buluka penepo, Simau Pedhru akhabwera n'nduli mwace, afika mbapita n'nthumbi, mbaona mithambo yakucena

⁷na nguwo ing'ono ikhadagudumira nsolo wa Yezu. Iyo ikhadamala funyiwa mbiyikhwa pa khundu pa mithambo yakucena.

⁸Buluka penepo, nyakupfundza unango, ule akhadafika pakutoma mbalimira kunja, apitambo. Iye aona, mbatawira.

⁹( Thangwi iwo akhadasati kupibvesesa mwadidi pikhadalembwa m'Bukhu ya Mulungu kuti, Yezu akhatongwa alamuke pa kufa.)

¹⁰Na tenepo, anyakupfundza abwerera mbaenda kunyumba.

¹¹Mbwenye Mariya asala dhuzi na pa nsuwo wa nthumbi mbakhalira. Mukhalira iye, akotama mbalang'ana mu nthumbi,

¹²mbaona anju awiri akhadabvala nguwo zakucena, mbali nawa pale pakhakhala manungo a Yezu. M'bodzi akhali ku misolo, unango ku myendo.

¹³Maanju am'bvundza kuti: “Nkaziwe, usaliranji?” Iye atawira tenepa: “Anthu akwata Mbuya wanga, kudamuikha iwo ine nkhabe dziwako.”

¹⁴Pakumala kulonga penepyo Mariya azungunuka mbaona Yezu akhadalimira penepo. Mbwenye Mariya acimwana kun'dzindikira.

¹⁵Yezu am'bvundza kuti: “Nkaziwe, usaliranji? Mbani anasaka iwe?” Mariya na kunyerezera kuti ndi nyabasa wa n'dimba ya maluwa, ampanga tenepa: “Ngakhala ndimwe adankwata, ndipangeni kudamuikha imwe, ine ndinenda kankwata.”

¹⁶Yezu ampanga kuti: “Mariya!” Na tenepo, Mariya azungunuka kuna Iye, mbakhuwa na malongero a madjuda kuti: “Rabhoni!” (Ndiko kubveka, “Mpfundzisi.”)

¹⁷Yezu alonga kuti: “Leka kundiphata, thangwi ndidzati kukwira kuna Baba wanga. Mbwenye ndoko kuna abale anga ukhaapange kuti Ine ndiri kukwira kwenda kuna Baba wanga, ndiyembo Baba wanu. Kuna Mulungu wanga, ndiyembo Mulungu wanu.”

¹⁸Mariya Madhalena aenda kaapanga anyakupfundza a Yezu kuti: “Ine ndamuona Mbuya!” Mbalonga pikhadampanga Yezu.

¹⁹Na maulo a ntsiku ya Dimingu, anyakupfundza a Yezu akhadagumanyikana pabodzi pene n'nyumba, misuwo mbidamala kufungwa na thangwi ya kugopa madjuda. Yezu apita, akhala pakati pawo mbalonga kuti: “Ntendere mbukhale na imwe!”

²⁰Pakumala kulonga penepyo, aapangisa manja ace na pa khundu pace. Na tenepo, anyakupfundza ace na kuona Mbuya, akomerwa pikulu kakamwe.

²¹Yezu aapanga pontho kuti: “Ntendere mbukhale na imwe! Ninga Baba andituma, Ine ndinakutumanimbo.”

²²Pidamala Iye kulonga penepi, aapupusira mbalonga kuti: “Tambirani Nzimu Wakucena.

²³Mungalekerera anthu kudawa kwawo, iwo analekererwambo madawi awo, mungakhonda kualekerera, iwo nkhabe kulekererwambo.”

²⁴Apo pidabwera Yezu, Tomasi akhacemerwa Dhidhimu, m'bodzi wa anyakupfundza khumi na awiri a Yezu, akhali pabodzi na iwo tayu.

²⁵Anyakupfundza andzace ampanga kuti: “Ife tamuona Mbuya!” Mbwenye iye atawira tenepa: “Ndingakhonda kuona mule mudapholwa iye na maperego m'manja mwace mbindipitisa cala canga, mbindikhonda kuikha djanja yanga pa khundu pace, ine cipo ndinadza katawira.”

²⁶Pakumala sumana ibodzi,[43] anyakupfundza a Yezu agumanyikana pontho n'nyumba ibodzi-bodzi, misuwo mbidamala fungwa. Pa n'dzidzi unowu, Tomasi akhali na anthu. Yezu apita mbakhala pakati pawo mbalonga kuti: “Ntendere mbukhale na Imwe!”

²⁷Na tenepo, Yezu alonga kuna Tomasi kuti: “Pitisa cala cako apa. Lang'ana manja anga. Futhula djanja yako uipitise pa khundu panga. Siya kupenula, mbwenye tawira.”

²⁸Tomasi atawira tenepa: “Mbuya wanga na Mulungu wanga!”

²⁹Penepo Yezu ampanga kuti: “Watawira thangwi pidandiona iwe? Mbatsandzaye ale anatawira mbakhonda kundiona.”

³⁰Yezu acita pidzindikiro pinango pizinji pya pirengo pamaso pa anyakupfundza ace, pidakhonda kulembwa mu bukhu iyi.

³¹Mbwenye ipi pyalembwa toera imwe mutawire kuti Yezu ndi Kirixtu Mwana wa Mulungu, pontho mungatawira mukhale na upulumuki mu dzina yace.