Read Cibverano Cipsa Cisena Jw. 3 Bible Online

Jw. 3 - Cibverano Cipsa Cisena bible

Jw. 3

¹Akhalipo nfarisi m'bodzi akhacemerwa Nikodhemu, n'tsogoleri wa madjuda.

²Iye abwera kuna Yezu na masiku, mbalonga kuti: “Rabhii, ife tisadziwa kuti Imwe ndimwe Mpfundzisi adabuluka kuna Mulungu. Thangwi nkhabe m'bodzi anakwanisa kucita pidzindikiro pya pirengo pinacita Imwe, Mulungu angakhonda kukhala na iye.”

³Yezu antawira tenepa: “Ndimo mwene, ndimo mwene ndisakupanga kuti: Nkhabe m'bodzi anakwanisa kuona Umambo wa Mulungu, angakhonda kubalwa kapsa.[8]”

⁴Nikodhemu abvundza kuti: “Munthu anabalwa tani, Iye mbali nkhalamba? Kodi anapita pontho m'mimba mwa mai wace mbabalwa kacikawiri?”

⁵Yezu atawira tenepa: “Ndimo mwene, ndimo mwene ndisakupanga kuti: Nkhabe m'bodzi anakwanisa kupita mu Umambo wa Mulungu, angakhonda kubaliwa m'madzi pontho na mu Nzimu Wakucena.

⁶Anabalwa mu nyama ndi wa nyama, anabalwa mu Nzimu ndi wa nzimu.

⁷Leka kudzumatirwa na pidalonga Ine kuti: Pisafunika kuti imwe mubalwe kapsa.

⁸Mphepo isaenda kunafuna iyo. Iwe usaibva, mbwenye nkhabe kuidziwa iri kubuluka kupi peno iri kwenda kupi. Tenepa pisacitikambo na onsene anabalwa mu Nzimu.”

⁹Nikodhemu abvundza tenepa: “Pinacitika tani penepi?”

¹⁰Yezu ampanga tenepa: “Iwe ndiwe mpfundzisi wa Izarayeli, nkhabe kupidziwa pinthu penepi?

¹¹Ndimo mwene, ndimo mwene ndinakupanga kuti ife tisalonga pire pinadziwa ife pontho mbaticita umboni wa pire pidaona ife, mbwenye imwe nkhabe kutawira umboni wathu.

¹²Ine ndakupangani pire pya pantsi pano, imwe mwakhonda kupitawira. Munadza katawira tani ndingakupangani pya kudzulu?

¹³Nkhabe m'bodzi adakwira kudzulu, mbwenye ule basi adabwera buluka kudzulu, Ine Mwana wa Munthu.[9]

¹⁴Sawa-sawa ninga Mozesi alamusa nyoka n'thando, tenepa pisafunikambo kuti Ine Mwana wa Munthu ndilamuswembo,

¹⁵toera onsene ale anantawira akhale na upulumuki wakukhonda kumala.

¹⁶“Thangwi Mulungu afuna dziko, mbafikira kupereka Mwana wace m'bodzi basi, toera ale onsene anantawira aleke kufa, mbwenye akhale na upulumuki wakukhonda kumala.

¹⁷Thangwi Mulungu atuma Mwana wace pa dziko, si kuti adze katonga miseru ya dziko tayu, mbwenye toera dziko ipulumuswe na Iye.

¹⁸Ule anantawira nkhabe kutongwa, mbwenye ule anakhonda kuntawira amala kutongwa kale, na thangwi yakukhonda kutawira kwace dzina ya Mwana m'bodzi basi wa Mulungu.

¹⁹Kutongwa kwace ndi uku: Cieza cabwera pa dziko, mbwenye anthu afuna cidima mbakhonda cieza, thangwi mabasa awo akhali a kuipa.

²⁰Ule anacita pyakuipa asazonda cieza, pontho nkhabe fendedza pa cieza, gopa mabasa ace anaonekera pakweca.

²¹Mbwenye ule anacita pya ndimo mwene asabwera pa cieza, toera mabasa ace aoneke pakweca kuti asacitwa na mphambvu za Mulungu.”

²²Buluka penepo, Yezu aenda na anyakupfundza ace ku dziko ya Djudeya. Kweneko akhala na iwo pabodzi, mbakhatambirisa anthu batixmu.

²³Juwau akhatambirisambo batixmu ku Enomi, dhuzi na ku Salimi, thangwi kweneku kukhali na madzi mazinji, pontho mbumba ikhabwera penepo toera kutambira batixmu.

²⁴(Penepi pyacitika Juwau mbadzati kupita n'kaidi.)

²⁵Na tenepo, yasoseka mphoka pakati pa anyakupfundza a Juwau na n'djuda m'bodzi, na thangwi ya kuceneswa kwa madjuda.

²⁶Iwo aenda kuna Juwau mbampanga kuti: “Mpfundzisi, mamuna ule akhakhala na imwe ntunda unango wa nyandza ya Djorodani, ule adaticitira imwe umboni, ali kutambirisa batixmu pontho anthu onsene ali kwenda kuna Iye!”

²⁷Juwau atawira tenepa: “Munthu anatambira pire basi pidapaswa iye kudzulu.

²⁸Imwe ene ndimwe anyamaso a pire pidalonga ine kuti: Ine sine Kirixtu tayu, mbwenye ndine ule adatumwa patsogolo pace.

²⁹Mwanaciro mwali wankazi, ndi mwali wa mamuna. Xamwali wa mwali wa mamuna anam'phedza pontho mbam'bvesera, asakomerwa pikulu kakamwe angabva fala ya mwali wa mamuna. Uku ndi kutsandzaya kwanga kunadzadziswa cincino.

³⁰Pisafunika kuti Iye akuzwe, ine ndicepeswe.

³¹“Ule adabuluka kudzulu ali padzulu pa onsene. Ule wa pantsi pano ndi wa pantsi pano, pontho asalonga pire pya pantsi pano. Ule adabuluka kudzulu ali padzulu pa onsene.

³²Iye asacita umboni wa pire pidaona iye na pidabva iye, mbwenye nkhabe munthu anautawira umboni wace.

³³Ule anautawira umboni unowu, asasimbisa kuti Mulungu ndi wamaso.

³⁴Thangwi ule adatumwa na Mulungu asalonga Mafala a Mulungu, thangwi Mulungu asampasa Nzimu wace wa kusoweka n'dida.

³⁵Baba asafuna Mwana wace mbampasa pyonsene m'manja mwace.

³⁶Ule anatawira Mwana, ana upulumuki wakukhonda kumala. Mphapo ule anakhonda Mwana, nkhabe kudza kaona upulumuki, mbwenye kuipirwa kwa Mulungu kunakhala na iye.”