Read Cibverano Cipsa Cisena Jw. 5 Bible Online

Jw. 5 - Cibverano Cipsa Cisena bible

Jw. 5

¹Buluka penepo, Yezu aenda ku Djerusalema ku phwandu ya madjuda.

²Ku Djerusalema, dhuzi na Nsuwo wa Mabira, kuna thawala[11] ibodzi inacemerwa nciebhereu, Bhetsaidha. N'khundu mwace mukhali na makumbi maxanu.

³Mwenemu mukhakhala atenda azinji: maboli-boli, anyakulamala, anyampfutete,

⁴[mbakhadikhira kutekenyeka kwa madzi. Midzidzi inango, anju m'bodzi wa Mbuya akhachita n'thawala mbakhabvundula madzi. Munthu wakutoma anagwera, pakumala kubvundulwa madzi na anju, akhawangiswa nthenda yace ipi na ipi.[12]]

⁵Penepo pakhali na mamuna m'bodzi akhali na pyaka makumatatu na pisere mbali na utenda.

⁶Yezu mudamuona iye mbakhagona, pontho na kun'dziwa kuti iye ali na utenda unowu pyaka pizinji, am'bvundza kuti: “Iwe usafuna uwange?”

⁷Nyampfutete antawira kuti: “Mbuya, nkhabe munthu wa kundiphedza kugwera n'thawala madzi angabvundulwa. N'dzidzi unaenda ine kagwera, asatoma ndi unango ine mbindisati kufika.”

⁸Na tenepo Yezu ampanga kuti: “Lamuka, kwata khangala yako uyende.”

⁹Na mwansanga mamuna awanga, akwata khangala yace mbatoma kufamba. Penepi pyacitika ntsiku ya Sabudu.

¹⁰Na thangwi eneyo, madjuda alonga kuna mamuna akhadawangiswa kuti: “Lero ndi Sabudu, nkhabe tawiriswa kuti ukwate khangala.”

¹¹Mbwenye iye aatawira tenepa: “Mamuna adandiwangisa andipanga kuti: ‘Kwata khangala yako uyende.’ ”

¹²Na tenepo, iwo am'bvundza kuti: “Mbani mamuna unowu adakupanga kwata khangala yako uyende?”

¹³Mbwenye iye hakhandziwabve mbani adamuwangisa tayu, thangwi Yezu akhadabuluka mbakhonda kuoniwa pakati pa mwinji wa anthu akhali penepo.

¹⁴Buluka penepo, Yezu adza kan'gumana ali mu Nyumba ya Mulungu mbampanga kuti: “Lang'ana, iwe wawanga. Leka kudawa pontho, toera uleke kucitikirwa na pinango pyakupiringana penepi.”

¹⁵Mamuna aenda mbapanga madjuda, kuti ndi Yezu adamuwangisa.

¹⁶Na thangwi eneyo, madjuda atoma kuzonda Yezu, thangwi Iye akhacita penepi ntsiku ya Sabudu.

¹⁷Mbwenye Yezu aapanga tenepa: “Baba wanga na lero ali ciriri na kuphata basa, na Inembo na lero ndiri ciriri na kuphata basa.”

¹⁸Na thangwi eneyo, madjuda akhatekereratu kakamwe kusaka kumupha. Si thangwi ya kupwaza Sabudu basi tayu, mbwenye pontho akhalonga kuti Mulungu ndi Baba wace, mbacitika sawa-sawa na Mulungu.

¹⁹Mbwenye Yezu aatawira tenepa: “Ndimo mwene, ndimo mwene ndisakupangani kuti Mwana nkhabe kwanisa kucita cinthu ekha ene. Anacita pire basi pinaona Iye Baba wace mbacita. Thangwi pinacita Baba, Mwana asapicitambo.

²⁰Thangwi Baba asafuna Mwana wace, mbampangisa pyonsene pinacita Iye. Pontho anati ampangize mabasa makulu kupiringana awa, toera imwe mudzumatirwe.

²¹Thangwi sawa-sawa ninga Baba asalamusa anyakufa mbaapasa upulumuki, Mwana anapasambo upulumuki, ule anafuna Iye.

²²Pontho, Baba nkhabe tonga munthu, mbwenye mphambvu zonsene za utongi azipasa Mwana wace.

²³Penepyo toera kuti onsene alemedze Mwana ninga munalemedza iwo Baba. Ule anakhonda kulemedza Mwana, asakhondambo kulemedza Baba adatuma Mwana.

²⁴“Ndimo mwene, ndimo mwene ndisakupangani kuti: Ule anabva fala yanga mbatawira kuna ule adandituma, ana upulumuki wakukhonda kumala, pontho nkhabe kudza kakoneswa, mbwenye abuluka pa kufa kwenda pa upulumuki.

²⁵Ndimo mwene, ndimo mwene ndisakupangani kuti n'dzidzi uli kufika, iwo wafika kale, wa kuti anyakufa anadza kabva fala ya Mwana wa Mulungu. Ale anaibva, anapulumuka.

²⁶Thangwi ninga Baba ana upulumuki muna Iye ene, apasambo Mwana kuti akhale na upulumuki muna iyembo.

²⁷Pontho ampasa mphambvu za kutonga thangwi Iye ndi Mwana wa Munthu.

²⁸“Lekani dzumatirwa na penepi, thangwi n'dzidzi uli kufika, wa kuti onsene ali n'zinthumbi anati aibve fala yace,

²⁹mbabuluka. Ale adacita udidi analamuka pa kufa toera akhale m'maso. Ale adacita pyakuipa analamuka pa kufa toera aoneswe nyatwa.

³⁰Ndekha ene nkhabe cinafuna kwanisa ine kucita. Ine ndisatonga ninga pidabva ine basi, pontho kutonga kwanga ndi kwakulungama, thangwi nkhabe saka cita kufuna kwanga tayu, mbwenye kwa ule adandituma.”

³¹“Ndingapicitira umboni ndekha, umboni wanga ndi wa pezi.

³²Alipo unango anandicitira umboni, pontho ndisadziwa kuti umboni unandicitira iye ndi wa ndimo mwene.

³³“Imwe mwatuma atumwi kuna Juwau,[13] pontho iye acita umboni wa ndimo mwene.

³⁴Si kuti ndisafuna umboni wa munthu tayu, mbwenye ndisalonga penepi toera imwe mupulumuke.

³⁵Juwau akhali nyale ibodzi ikhagaka mbikhamwinikira. Imwe mwafuna kutsandzaya pikulu na cieza cace pa n'dzidzi ung'ono.

³⁶“Mbwenye Ine ndina umboni ukulu kupita wa Juwau. Thangwi mabasa anacita Ine, adandipasa Baba kuti ndiamalise, iwo asacita umboni kuti Baba andituma.

³⁷Baba adandituma, Iye ene acita umboni na thangwi yanga. Imwe cipo mwabva fala yace, pontho nkhabe kun'dziwa akhala tani.

³⁸Pontho fala yace nkhabe khala muna imwe, thangwi imwe nkhabe kuntawira ule adatuma Iye.

³⁹Imwe musaipfundza mwadidi mwene Bukhu ya Mulungu, thangwi musanyerezera kuti n'kati mwayo, munagumanamo upulumuki wakukhonda kumala. Apo ndiyo Bukhu eneyo inacita umboni na thangwi yanga.

⁴⁰Mbwenye imwe nkhabe funa bwera kuna Ine toera mukhale na upulumuki.

⁴¹“Ine nkhabe saka mbiri ya anthu,

⁴²mbwenye Ine ndisakudziwani. Ndisadziwa kuti imwe nkhabe funa Mulungu.

⁴³Ine ndabwera na dzina ya Baba, imwe mwakhonda kunditambira, mbwenye angabwera unango na dzina yace ekha, munantambira.

⁴⁴Munakwanisa tani kutawira, ngakhala imwe musapasana mbiri mwekha ene, mbwenye mbamukhonda kusaka mbiri inabuluka kuna Mulungu m'bodzi ekha?

⁴⁵“Lekani kunyerezera kuti ndinakusumirani kuna Baba. Anafuna kukusumirani ndi Mozesi, ule ananyindira imwe.

⁴⁶Thangwi imwe mbamudatawira Mozesi, mbamudatawirambo Ine, thangwi iye alemba na thangwi yanga.

⁴⁷Mbwenye ngakhala imwe mwakhonda pidalemba iye, munatawira tani mafala anga?”