Read Cibverano Cipsa Cisena Jw. 6 Bible Online

Jw. 6 - Cibverano Cipsa Cisena bible

Jw. 6

¹Buluka penepo, Yezu aenda kuntunda unango wa nyandza ya Galileya, inadziwika pontho na dzina ya Tibheriyadhi.

²Mwinji ukulu wa anthu ukhantowera, thangwi akhadaona pidzindikiro pya pirengo pikhacita Iye kuna atenda.

³Na tenepo, Yezu akwira pa phiri, mbakhala pantsi pabodzi na anyakupfundza ace.

⁴Phwandu ya Paxkwa ya madjuda ikhali dhuzi.

⁵Yezu pidalang'ana Iye mbaona mwinji wa anthu mbukhanfendedzera, Iye alonga kuna Filipi kuti: “Ndi kupi kunafuna ife gula mikate kuti anthu awa adye?”

⁶Iye acita m'bvundzo uyu kuna Filipi toera kumulesera, thangwi iye Yezu akhapidziwa kale pikhafuna iye kucita.

⁷Filipi antawira kuti: “Na ntengo wa madzana mawiri a kobiri ya parata,[14] mbatigula mikate toera munthu m'bodzi na m'bodzi atambire phindi yace, mbapidakwana tayu.”

⁸Nyakupfundza wace unango anacemerwa Andereya, m'bale wace Simau Pedhru, atawirambo mbalonga kuti:

⁹“Pano alipo m'phale m'bodzi ana mikate[15] mixanu na nyama ziwiri za m'madzi. Mbwenye pinakwananji penepi kuna anthu onsene?”

¹⁰Yezu alonga kuti: “Akhazikeni anthu pantsi.” Anthu onsene akhala pantsi, thangwi pakhali na cimbanjiri cizinji. Penepo pakhali na amuna akuthamangira pikwi pixanu (5.000).

¹¹Na tenepo, Yezu akwata mikate mbapereka takhuta kuna Mulungu, mbaigawira anthu ninga mukhafunira iwo. Iye acitambo penepyo sawa-sawa na nyama za m'madzi.

¹²Onsene pidamala iwo kudya mbakhuta, Yezu apanga anyakupfundza ace kuti: “Gumanyani mapindi adasala. Lekani kutaya cinthu.”

¹³Na tenepo, iwo agumanya mapindi akhadasala a mikate mixanu ikhadadya iwo, mbadzaza na iwo pitundu khumi na piwiri.

¹⁴Pakumala kuona cidzindikiro ca cirengo cidacita Yezu, mbumba yatoma kulonga tenepa: “Ndimo mwenedi, uyu ndiye Mporofeta akhadikhirwa pa dziko.”

¹⁵Yezu na kupidziwa kuti iwo akhafuna kudza kankwata na mphambvu kuti amuikhe ninga Mambo, apotoka pyace ekha ene mbaenda pontho ku phiri.

¹⁶Pidadoka dzuwa, anyakupfundza ace achitira mbaenda ku nyandza.

¹⁷Apakira m'bote mbawambuka kwenda ku Kafaranaumi. Kunja kukhadaswipa, Yezu akhasati kwenda kagumana na iwo.

¹⁸Na tenepo, yaoneka mphepo ikulu kakamwe mbikhacita mabimbi.

¹⁹Pakumala kucapa n'nyandza nsindzo wa kukwana makilometuru maxanu peno matanthatu,[16] aona Yezu mbakhafamba padzulu pa madzi, onsene mbagopa.

²⁰Mbwenye Iye aapanga tenepa: “Ndine pano! Lekani kugopa!”

²¹Na tenepo, iwo antambira mwadidi m'bote, na mwansanga mbafika pa gombe ikhaenda iwo.

²²Mangwana mwace, mwinji wa anthu ukhadasala ku ntunda unango wa nyandza, waona kuti penepo pakhali na bote ibodzi basi. Pontho Yezu hadapakira bote pabodzi na anyakupfundza ace tayu, mbwenye anyakupfundza ace akhadaenda okha ene.

²³Na tenepo, mabote anango adabuluka ku nzinda wa Tibheriyadhi afika mbatsama dhuzi na pale pakhadadya mbumba mikate ire ikhadaphembererwa na Mbuya.

²⁴Mbumba pidadziwa iyo kuti nkhabepo penepo Yezu peno anyakupfundza ace, yapakira m'mabote mbiyenda na saka Yezu ku Kafaranaumi.

²⁵Anthu pidan'gumana iwo Yezu kuntunda unango wa nyandza, am'bvundza tenepa: “Mpfundzisi, mwafika lini pano?”

²⁶Yezu atawira kuti: “Ndimo mwene, ndimo mwene kuti imwe musandisaka, si thangwi ya kuona pidzindikiro pya pirengo tayu, mbwenye ndi thangwi mwadya mikate mbamukhuta.

²⁷Lekani kuphatira basa na thangwi ya cakudya cinamala, mbwenye phatirani cakudya cinakhonda kumala cinakhala na upulumuki wa kwenda na kwenda unafuna kukupasani Ine, Mwana wa Munthu. Thangwi Mulungu Baba amuikha cidhindo cakuntawirira.”

²⁸Na tenepo, iwo am'bvundza kuti: “Ticitenji toera tiphate mabasa anafuna Mulungu?”

²⁹Iye atawira kuti: “Basa ya Mulungu ndi ixi: Kutawira kuna ule adatuma Iye.”

³⁰Na tenepo iwo am'bvundza kuti: “Ndi cidzindikiro canji ca cirengo cinafuna kutipangisa iwe, toera ticione pontho tikutawire? Ndi ninji pinafuna cita iwe?

³¹Ambuya athu adya manaa n'thando ninga mudalemberwa ipyo kuti: ‘Iye aadyesa nkate wa kudzulu.’ ”

³²Yezu aapanga kuti: “Ndimo mwene, ndimo mwene ndisakupangani kuti: Mozesi siye adaapasa nkate udabuluka kudzulu tayu, mbwenye ndi Baba wanga anakupasani nkatedi wa kudzulu.

³³Thangwi nkate wa Mulungu ndi ule udachita buluka kudzulu mbupasa upulumuki dziko.”

³⁴Iwo alonga tenepa: “Mbuya, tipaseni mphapo nkate unowu ntsiku zonsene!”

³⁵Na tenepo, Yezu aapanga kuti: “Ine ndine nkate wa upulumuki. Ule anadza kuna Ine, na lini anadza kabva pontho njala. Ule ananditawira, na lini anadza kabva pontho nyota.

³⁶Ninga ndakupangani kale, imwe musandiona, mbwenye nkhabe kunditawira.

³⁷Ale onsene anandipasa Baba, anadza kuna Ine. Ule anabwera kuna Ine, cipo ndinadza kan'khonda.

³⁸Thangwi Ine ndachita buluka kudzulu sidabwera kudza kacita kufuna kwanga tayu, mbwenye ndabwera kacita kufuna kwa ule adandituma.

³⁹Kufuna kwa ule adandituma ndi uku: kuti Ine ndikhonde taya munthu m'bodzi kwa ale adandipasa Iye, mbwenye ndialamuse pa kufa ntsiku yakumalisa.

⁴⁰Thangwi kufuna kwa Baba wanga ndi kuti onsene ale analang'ana kuna Mwana mbantawira, anakhala na upulumuki wakukhonda kumala pontho Ine, ndinaalamusa pa ntsiku yakumalisa.”

⁴¹Na penepi, madjuda atoma kudungunya na thangwi ya kulonga kudacita Yezu kuti: “Ine ndine nkate udabuluka kudzulu.”

⁴²Iwo akhalonga tenepa: “Kodi unowu siye tayu Yezu mwana wa Zuze? Baba wace na mai wace ife nkhabe kuadziwa? Mphapo thangwi yanji cincino asalonga kuti: ‘Ndachita buluka kudzulu?’ ”

⁴³Yezu aatawira tenepa: “Matamani. Lekani kudungunya mwekha ene.

⁴⁴Nkhabe anakwanisa kudza kuna Ine angakhonda bwereswa na Baba adandituma, pontho Ine ndinadza kamulamusa pa kufa ntsiku yakumalisa.

⁴⁵Pyalembwa m'mabukhu a Maporofeta kuti: ‘Onsene anadza kapfundziswa na Mulungu.’ Mphapo onsene anabva Baba mbapfundza na Iye, anadza kuna Ine.

⁴⁶Sikulongera kuti alipo adaona Baba tayu, mbwenye Ule basi adabuluka kuna Mulungu, ndiye ekha adaona Baba.

⁴⁷Ndimo mwene, ndimo mwene ndisakupangani kuti: Ule ananditawira, ana upulumuki wakukhonda kumala.

⁴⁸Ine ndine nkate wa upulumuki.

⁴⁹Ambuya anu adya manaa n'thando, mbwenye adza kafa.

⁵⁰Mbwenye pano ulipo nkate udabuluka kudzulu, toera ale anaudya akhonde kufa.

⁵¹Ine ndine nkate wa m'maso udachita buluka kudzulu. Anadya nkate unowu, ana upulumuki wakukhonda kumala. Nkate unowu unafuna kuapasa Ine, ndi nyama yanga ene, inafuna kuapasa ine toera dziko ipulumuke.”

⁵²Na tenepo madjuda atoma kuketesana okha-okha mbalonga kuti: “Pinacitika tani kuti mamuna uyu atidyese nyama ya manungo ace?”

⁵³Yezu aapanga kuti: “Ndimo mwene, ndimo mwene Ine ndisakupangani kuti, mungakhonda kudya nyama ya Ine Mwana wa Munthu, pontho mbamukhonda kumwa ciropa canga, muna imwe nkhabe kudza kakhala na upulumuki.

⁵⁴Munthu onsene anadya nyama yanga mbamwa ciropa canga, ana upulumuki wakukhonda kumala, pontho ndinamulamusa pa ntsiku yakumalisa.

⁵⁵Thangwi nyama yanga ndico cakudyadi kakamwe, na ciropa canga ndico cakumwadi kakamwe.

⁵⁶Munthu onsene anadya nyama yanga mbamwa ciropa canga, anakhala muna Ine, Inembo ndinakhala muna iye.

⁵⁷Sawa-sawa ninga Baba ali m'maso andituma, pontho Ine ndiri m'maso na thangwi ya Baba, na tenepo, ule anandidya anadza kakhala m'maso na thangwi yanga.

⁵⁸Uyu ndiwo nkate udabuluka kudzulu, wakusyana na ule udadya a mbuya anu mbamala kufa, mbwenye ule anadya nkate uyu anakhala na upulumuki wakukhonda kumala.”

⁵⁹Yezu alonga penepi mukhapfundzisa Iye mu nyumba ya kuphemberera ya ku Kafaranaumi.

⁶⁰Anyakupfundza azinji a Yezu, mudabva iwo penepi alonga kuti: “Mafala awa anentsa! Mbani anakwanisa kupibvesa?”

⁶¹Yezu na kudziwa muntima mwace kuti anyakupfundza ace akhadungunya na thangwi ya mafala adalonga Iye, aapanga kuti: “Imwe mwaipirwa na pidalonga Ine?

⁶²Ndiye tani imwe mungaona Ine, Mwana wa Munthu mbandikwira kwenda kukhakhala Ine kale ene?

⁶³Nzimu usapasa upulumuki. Nyama nkhabe pinacita iyo. Mafala adakupangani Ine ndiwo nzimu na upulumuki.

⁶⁴Mbwenye alipo anango pakati panu asakhonda kutawira.” Thangwi Yezu akhapidziwa kale ene mbani akhakhonda kutawira, pontho mbani akhafuna kunsandukira.

⁶⁵Yezu athimiza mbalonga kuti: “Ndi thangwi eneyi pidakupangani Ine kuti, nkhabe munthu anafuna bwera kuna Ine angakhonda kupaswa penepi na Baba.”

⁶⁶Bulukira n'dzidzi unowu kwenda kutsogolo, azinji anyakupfundza ace abwerera n'nduli mbakhonda kuntowera.

⁶⁷Yezu abvundza anyakupfundza ace khumi na awiri kuti: “Imwe nkhabe funa kwendambo?”

⁶⁸Penepo Simau Pedhru antawira kuti: “Mbuya tinenda kuna ani? Imwe ndimwe muna mafala anapasa upulumuki wakukhonda kumala.

⁶⁹Ife tisatawira pontho tisadziwa kuti imwe ndimwe Wakucena wa Mulungu.”

⁷⁰Na tenepo, Yezu aatawira kuti: “Ine sidakusankhulani khumi na awiri tayu? Mbwenye m'bodzi wanu ana Dyabu.”

⁷¹(Iye akhalongera Djuda mwana wa Simau Xikariyoti, m'bodzi wa anyakupfundza ace khumi na awiri, ule adadza kansandukira.)