Read Cibverano Cipsa Cisena Mab. 1 Bible Online

Mab. 1 - Cibverano Cipsa Cisena bible

Mab. 1

¹Tiyofilu, mu bukhu yanga yakutoma, ndalemba pyonsene pidatoma kucita Yezu na pidapfundzisa Iye,

²mpaka ntsiku idakwatwa Iye kwenda kudzulu, pakumala kupfundzisa na mphambvu za Nzimu Wakucena apoxtolo[1] ace akhadasankhula Iye.

³Pakumala kuona nyatwa, Yezu abulukira kuna apoxtolo ace, mbaapasa pidzindikiro pizinji pinakhonda kupokanyika kuti Iye ali m'maso. Abulukira kuna iwo pa ntsiku makumanai, mbakhalonga kuna iwo na thangwi ya Umambo wa Mulungu.

⁴Ntsiku ibodzi Yezu mukhadya Iye na apoxtolo ace, aapasa ntemo uxu: “Lekani buluka mu Djerusalema, mbwenye dikhirani pidakupikirirani Baba wanga, pire pidakupangani Ine.

⁵Thangwi Juwau atambirisa batixmu na madzi, mbwenye mbazidzati kumala ntsiku zizinji, imwe munadza katambiriswa batixmu na Nzimu Wakucena.”

⁶Na tenepo, ale akhadagumanyikana am'bvundza kuti: “Mbuya, ndi cincino munafuna imwe bwezera umambo kuna mbumba ya Izarayeli?”

⁷Yezu aatawira tenepa: “Pya kudziwa midzidzi peno ntsiku zidapaka Baba na mphambvu zace za utongi, penepi si pyanu tayu.

⁸Mbwenye imwe munadza katambira mphambvu za Nzimu Wakucena, ungadza kachita kuna imwe, mbamudza kakhala amboni anga ku Djerusalema, ku Djudeya na ku Samariya, mpaka kunadhroma dziko.”

⁹Yezu pidamala Iye kulonga penepi, akwatiwa kwenda kudzulu, iwo mbakhamulang'ana. Penepo khole ibodzi yan'gudumira, mbakhonda kuoneka.

¹⁰Mukhalang'anisa iwo kudzulu Yezu mbakhakwira, na mwansanga abulukira amuna awiri akhadabvala nguwo zakucena,

¹¹mbaapanga tenepa: “Imwe amuna a ku Galileya, thangwi yanji musalang'anisa kudzulu? Yezu unowu adakwatiwa pakati panu kwenda kudzulu, anati abwere pontho sawa-sawa ninga mudamuonera imwe mbakhakwira.”

¹²Na tenepo iwo abwerera kwenda ku Djerusalema, bulukira ku phiri inacemerwa Mulivera, iri dhuzi na nzinda,[2] pa nsindzo wa kilometuru ibodzi.

¹³Mudafika iwo kweneko, akwira n'nyumba ya n'dzulu ikhafikira iwo. Akhali na anthu penepo Pedhru, Juwau, Tiyago, Andereya, Filipi, Tomasi, Bhatolomeu, Mateu, Tiyago mwana wa Alufeu, Simau nyakukakamira mwambo wa Mulungu,[3] na Djuda, mwana wa Tiyago.

¹⁴Onsene awa kazinji kene akhagumanyikana pabodzi pene pa kuphembera, na abale ace Yezu na Mariya mai wace Yezu, na akazi anango.

¹⁵Pa ntsiku zenezo, Pedhru alimira pakati pa abale a nsoka wakukwana dzana na makumawiri wa anthu,

¹⁶mbaapanga tenepa: “Abale anga, pikhatongwa kuti pisimbiswe pire pidalonga Nzimu Wakucena m'Bukhu ya Mulungu, pa mulomo wa mambo Dhavidhi na thangwi ya Djuda, ule adatsogolera ale anthu adamanga Yezu.

¹⁷Iye akhadalengeswa ninga m'bodzi wathu, pontho akhacitambo basa yathu.”

¹⁸(Djuda agula munda na kobiri ikhadatambira iye na kudawa kwace. Ndi mwenemu mudagwa iye, manungo ace mbasweka nakati-na-kati, utumbo wace onsene mbumwazika.

¹⁹Anthu onsene a ku Djerusalema apidziwa penepi. Na thangwi eneyo munda unowu aupasa dzina ya Akelidama na malongero awo. Kweneko ndi kubveka munda wa ciropa.)

²⁰Pedhru athimiza na kulonga tenepa: “Thangwi pyalembwa m'bukhu ya Masalimu kuti: “ ‘Mbuto yace mbikhale dembe, mbasoweka na m'bodzi ene anafuna kuikhala.’ Panango palembwa tenepa: “ ‘Basa yace ya utsogoleri mbapite munthu unango. ’

²¹Na tenepo, tisatongwa tisankhule mamuna m'bodzi, akhakhala na ife pa midzidzi yonsene ikhakhala Mbuya Yezu na ife,

²²kutomera pa n'dzidzi ukhatambirisa Juwau batixmu, mpaka ntsiku idakwatwa Yezu pakati pathu mbaenda kudzulu, m'bodzi wawo akhale mboni pabodzi na ife wa kulamuka kwace pa kufa.”

²³Na tenepo, asankhulwa amuna awiri. Zuze, anacemerwa Bharisabha, akhadziwika na dzina ya Djuxtu, na Matiya.

²⁴Buluka penepo, aphembera mbalonga tenepa: “Mbuya, Imwe ndimwe anadziwa mitima ya onsene. Cincino tipangizeni pa awiri awa, ndi ani adasankhula imwe.

²⁵Toera akhale pa mbuto ya basa ya upoxtolo idasiya Djuda, mbaenda pyace ku mbuto idankwanira.”

²⁶Na tenepo, iwo amenya ntsango, mbawina ndi Matiya. Penepo iye aikhwa pa nsoka wa apoxtolo khumi na m'bodzi.