Read Cibverano Cipsa Cisena Mab. 19 Bible Online

Mab. 19 - Cibverano Cipsa Cisena bible

Mab. 19

¹Apolo mukhakhala iye mu nzinda wa Korintu, Paulu apita na m'pisa pinango pya Azya, mbafika ku Efesu. Kweneko agumana anyakutowera Yezu angasi,

²mbaabvundza tenepa: “Kodi pidatawira imwe, mwatambira Nzimu Wakucena?” Iwo atawira kuti: “Nkhabe, ife tidzati na kuubva kwene kuti ulipo Nzimu Wakucena.”

³Paulu aabvundza pontho kuti: “Mphapo mwatambira batixmu yanji?” Iwo atawira kuti: “Tatambira batixmu ya Juwau.”

⁴Penepo Paulu aapanga kuti: “Batixmu ya Juwau ikhali ninga cidzindikiro ca kuchunyuka. Iye akhapanga mbumba kuti itawire ule anafuna kudza n'nduli mwace. Unowu, ndi Yezu.”

⁵Anthu mudamala iwo kubva penepi, atambiriswa batixmu na dzina ya Mbuya Yezu.

⁶Penepo Paulu aaikha manja, Nzimu Wakucena mbudza kuna iwo, onsene mbatoma kulonga malongero anango akukhonda kudziwika, pontho na kulonga ciporofeta.

⁷Onsene, panango anacita amuna khumi na awiri.

⁸Paulu apita n'nyumba ya kuphemberera ya madjuda, mwenemu mbalonga na ntima wace onsene, pa myezi mitatu mbakhaketesana na iwo, mbakhasaka kuakonesa pa thangwi ya Umambo wa Mulungu.

⁹Mbwenye anango pakati pawo auma mitima mbakhonda kutawira. Na tenepo, iwo atoma kulonga kuipa Njira ya Mbuya pamaso pa mwinji wa anthu. Penepo, Paulu abuluka pa nsoka pawo mbakwata anyakutowera Yezu mbaenda na iwo kaapfundzisa ntsiku zonsene mu Xikola ya mamuna m'bodzi anacemerwa Tiranu.

¹⁰Amala pyaka piwiri mbakhacita penepi, mpaka kufikira kuti madjuda onsene na agerego akhakhala mu Azya, abva fala ya Mbuya.

¹¹Mulungu akhacita pirengo pyakudzumisa na manja a Paulu.

¹²Anthu akhafikira kukwata nguwo zikhaphata basa na Paulu, mbaenda nazo kuna atenda. Iwo angazikhuya akhawanga, pontho mizimu ya kuipa ikhabuluka muna iwo.

¹³Madjuda anango akhafamba mbabulusa mizimu ya kuipa, akhaleserambo kucita pibodzi-bodzi na dzina ya Mbuya Yezu kuna ale ana mizimu ya kuipa, mbakhalonga kuti: “Ndisakuthamangisani na dzina ya Yezu unowu analonga Paulu.”

¹⁴Amuna enewa akhacita penepi akhali ana anomwe a Seva, nkulu m'bodzi wa anyantsembe a madjuda.

¹⁵Ntsiku ibodzi nzimu wa kuipa waatawira tenepa: “Ine ndisan'dziwa Yezu, pontho ine ndisadziwambo mbani Paulu. Mbwenye imwembo ndimwe ani?”

¹⁶Na tenepo, mamuna akhakhala na nzimu wa kuipa aanumphira mbaakunda, mbaamenya na mphambvu zonsene mbaaphekesa, iwo mbabuluka n'nyumba mbathawa cipezi-pezi.

¹⁷Anthu onsene akhakhala mu Efesu, madjuda na agerego, apibva penepi mbagopa pikulu kakamwe. Penepo, dzina ya Mbuya Yezu ikhakuzwa.

¹⁸Anthu azinji akhatawira, akhabwera mbadambula pamaso pa anthu onsene pinthu pyakuipa pikhacita iwo.

¹⁹Pontho anthu azinji akhacita masalapita, agumanya mabukhu awo akhacita na iwo masalapita, mbaabweresa toera apiswe pamaso pa anthu onsene. Penepo, ungasangizwa ntengo wa mabukhu onsene, ukhakwana pikwi na pikwi pya kobiri za parata.

²⁰Na tenepo, fala ya Mbuya ikhamwazika mbisimbiswa pikulu kakamwe.

²¹Mudamala citika penepi, Paulu anyerezera muntima mwace kwenda ku Djerusalema, mbapita na m'pisa pya Masedhonya na pya Akaya. Iye akhalonga tenepa: “Ndingabuluka ku Djerusalema, ndisatongwa ndiyende ku Roma.”

²²Na tenepo, Paulu atuma andzace akhamphedza awiri, Timoti na Eraxtu kuti aende ku Masedhonya. Mbwenye iye amala pontho ntsiku zingasi mu Azya.

²³Ndi n'dzidzi unowu udaoneka cinkutubvu cikulu mu nzinda wa Efesu na thangwi ya Njira ya Mbuya.

²⁴Mulivi m'bodzi anacemerwa Dhemetiru, ule akhafula pinthu pya parata pyakulandana na nyumba ya ntsembe ya mulungu wankazi anacemerwa Aritemisi, mbakhapfumisa napyo pikulu kakamwe anyabasa akhaphata na iye,

²⁵aagumanya, pabodzi na onsene akhaphata mabasa enewa, mbaapanga tenepa: “Imwe musadziwa kuti mpfuma yathu isabuluka pa basa eneyi.

²⁶Pontho musaona mbamubva pinacita munthu uyu anacemerwa Paulu. Ali kunyengerera na kutaisa mwinji wa anthu, si muno mu Efesu basi tayu, mbwenye na mbuto zizinji za dziko yonsene ya Azya. Iye ali kwenda mbalonga kuti alungu adacitwa na manja a anthu, si alungu tayu.

²⁷Penepi pisacita kuti malonda athu akhonde kufamba mwadidi. Pontho tisagopa kuti nyumba ya ntsembe ya mulungu wankulu wankazi anacemerwa Aritemisi, ikhonde kulemebza. Si penepi basi tayu. Penepi pinacita kuti mulungu wathu analambirwa n'dziko yonsene ya Azya na dziko yonsene ya pantsi, akhonde kupaswa mbiri ya ulungu wace.”

²⁸Mbumba mudabva iyo penepi, yaipirwa mbitoma kukhuwa tenepa: “Nkulu ndi Aritemisi wa maefesu!”

²⁹Pa n'dzidzi ung'ono basi, nzinda onsene ukhali via-via. Pabodzi pene mbumba yaenda na mwansanga pa thando ya kucitira pisango, mbikwekweta Gayo na Arixitariku, amuna awiri a ku Masedhonya akhafamba na Paulu.

³⁰Paulu akhafuna kuti aende kuna mbumba, mbwenye anyakupfundza an'khondesa.

³¹Akulu a utongi a dziko, axamwali ace Paulu, atumiza mphangwa mbaphemba kuti Paulu aleke kwenda ku mbuto inacitirwa pisango.

³²Mukhacitika penepi, mbumba ikhali penepo ikhali via-via. Anango akhakhuwa ipi, anango akhakhuwa pinangombo. Thangwi azinji hakhapidziwa tayu pikhakhalira iwo penepo.

³³Na tenepo, madjuda abulusa Alixande mbam'bhoma kutsogolo. Penepo, Alixande acita cidzindikiro ca kumatamisa anthu, toera akwanise kuapanga mathangwi adapambazirwa iye.

³⁴Mbwenye mudan'dzindikira iwo kuti ndi n'djuda, amala midzidzi miwiri, mbakhakhuwa onsene pabodzi pene kuti: “Nkulu ndi Aritemisi wa maefesu.”

³⁵Nyakulemba wa mu nzinda aamatamisa anthu, mbaapanga tenepa: “Imwe anthu a ku Efesu! Mbani anakhonda dziwa kuti nzinda wathu wa Efesu usakoya nyumba ya ntsembe ya Aritemisi wankulu, na dzimunthu yace idagwa buluka kudzulu?

³⁶Nkhabe m'bodzi anapikhonda penepi. Na tenepo, pfulikani. Lekani thamangira cita cinthu mbamukhonda nyerezera mwadidi.

³⁷Imwe mwaadzesa pezi amuna awa pano. Nkhabe cinthu cidaba iwo mu nyumba ya ntsembe, pontho hadaxola mulungu wathu wankazi tayu.

³⁸Ngakhala Dhemetiru na andzace a basa asafuna kusumira munthu, kuna mbuto zakutongera miseru, pontho akulu anyakutonga alipo. Iwo angafuna, mbaende kasumirane kweneko.

³⁹Mbwenye ngakhala piripo pinango pinafuna imwe, penepi pinagwandika ntsiku ya nsonkhano wa mbumba, ninga munalongera mwambo.

⁴⁰Thangwi pinacitika lero ipi tinadza katongwa napyo, mbatilongwa kuti ndife anadzudzumisa makhaliro adidi a mbumba, mbaticimwana kudza kapitawira kwace. Thangwi nkhabe mathangwi a maso.”

⁴¹Pidamala iye kulonga penepi, apanga anthu kuti amwazike.