Read Cibverano Cipsa Cisena Mab. 20 Bible Online

Mab. 20 - Cibverano Cipsa Cisena bible

Mab. 20

¹Pidamala cinkutubvu ceneco, Paulu acemeresa anyakutowera Yezu mbaapasa cipapu. Buluka penepo apanganizana na iwo mbaenda ku Masedhonya.

²Iye afamba cisa cenecire consene, mbakhapasa cipapu abale anyakutawira na mafala mazinji. Pakumalisa afika ku dziko ya Geresya.

³Kweneko iye amala myezi mitatu. Mukhadamala iye kupaka ulendo wace kuti aende ku Sirya, abva kuti madjuda amala kubverana kuti ancite kuipa. Na thangwi eneyo, anyerezera kuti abwerere pontho na ku cisa ca Masedhonya.

⁴Pa ulendo unowu akhaperekerwa na Sopateri, mwana wa Piru, wa ku nzinda wa Bhereya. Pontho akhaperekerwa na Arixitariku na Sekundu, a ku Tesalonika, na Gayo wa ku Dherbhi, na Timoti, pabodzi na Tikiku na Torofimu, a ku dziko ya Azya.

⁵Amuna awa atsogola mbaenda katidikhira ku Thorowadhi.

⁶Mudamala phwandu ya mikate ya kusowa ntombwe wakutupisa, ife tapakira xitima ya m'madzi buluka ku nzinda wa ku Filipi. Pakumala ntsiku zixanu tagumanikana pontho na iwo ku Thorowadhi. Kweneko tamalako ntsiku zinomwe.

⁷Ntsiku ya Dimingu, ife tagumanyikana toera timenye nkate. Paulu alonga kuna mbumba mpaka chiti-chiti, thangwi mangwana mwace akhali na ulendo.

⁸N'nyumba ya n'dzulu mukhakhala ife, mukhali na nyale zizinji zikhagaka.

⁹M'phale m'bodzi anacemerwa Eutiku, akhakhala nawa pa janera. Mukhapitiriza Paulu na kulonga, m'phale aodzira. Iye aphatwa na citulo cikulu, mbagwa buluka n'nyumba ya n'dzulu kudza pantsi. Mudanthukula iwo, iye akhadafa.

¹⁰Na tenepo, Paulu achita pantsi, agodama mbakhumbatira m'phale, mbalonga tenepa: “Lekani gopa, iye ali m'maso.”

¹¹Buluka penepo, Paulu akwira pontho, mbamenya nkate mbadya. Aphuphudza na kulonga mpaka kuca. Pidamala iye mbaenda pyace.

¹²Penepo iwo, ankwata m'phale mbaenda na iye wa m'maso. Penepi iwo amatamizika napyo pikulu kakamwe.

¹³Mbwenye ife taenda mpaka ku xitima ya m'madzi mbatipakira kwenda ku nzinda wa Aso, kule kudaenda ife katambira Paulu. Iye akhadatipanga kuti ticite tenepo, thangwi akhafuna bwera na kuntunda.

¹⁴Mudatigumana iye ku Aso, ife tantambira mu xitima ya m'madzi, mbatipitiriza na ulendo wathu mpaka ku nzinda wa Mitileni.

¹⁵Buluka penepo, mangwana mwace tapita dhuzi na ntsuwa ya Kiyo. Nkucauno mwace tawambuka mbatiyenda pa ntsuwa ya Samu. Pakupita ntsiku ibodzi, mangwana mwace tafika pa gombe ya Miletu.

¹⁶Thangwi Paulu akhadalonga kale kuti tikhonde kulimira mu nzinda wa Efesu, toera akhonde kudembuka n'dziko ya Azya, thangwi akhathamangira kuti pingakwanisika, afike ku Djerusalema phwandu ya Pentikoxti mbidzati.

¹⁷Paulu mukhakhala iye ku Miletu, acemeresa akulu a gereja ya ku Efesu.

¹⁸Mudafika iwo, Paulu aapanga tenepa: “Imwe musadziwa kukhala kukhacita ine pakati panu, kubulukira ntsiku yakutoma idafika ine mu dziko ino ya Azya.

¹⁹Ndaphatira basa Mbuya na kupicepesa konsene, pontho na misozi ya kuleserwa kukulu pa makunje adacitirwa ine na madjuda.

²⁰Imwe musadziwa kuti ine sidasiya tayu kukupangani pire pyonsene pyadidi, mbwenye ndakupfundzisani pyonsene pakweca, pontho nyumba na nyumba.

²¹Ine ndaafotokozera madjuda na agerego, kuti iwo asafuna achunyuke kudawa kwawo, mbabwerera kuna Mulungu, mbakhulupira Mbuya wathu Yezu. [Kirixtu.[14]]

²²“Cincino, na kukakamizwa na Nzimu Wakucena, ndiri kwenda ku Djerusalema, mbandikhonda kupidziwa mphyanji pinafuna kundicitikira kweneku.

²³Pinadziwa ine ndi kuti m'mizinda monsene Nzimu Wakucena usandipangisa kuti, kupita n'kaidi pontho na nyatwa, pisandidikhira.

²⁴Mbwenye upulumuki wanga pa nyama, ine sinawo basa tayu. Cikulu kwa ine nkhufikisa pa nkhomu basa idandipasa Mbuya Yezu kuti ndiicite. Basa ya kumwaza Mphangwa Zadidi za kukoma ntima kwa Mulungu.

²⁵“Cincino ndisadziwa kuti, kuli imwe monsene adamwazira ine Umambo wa Mulungu, nkhabe kudza kaionabve nkhope yanga.

²⁶Na tenepo, lero ndisakudumbirirani kuti, m'bodzi wanu angataika, thangwi si yanga tayu.

²⁷Thangwi sidasiya tayu kukupangani pyonsene pidapaka Mulungu.

²⁸M'bodzi na m'bodzi mbapilang'anire ekha ene, pontho alang'anirembo nkumbi onsene wa mabira udaikhirwa imwe na Nzimu Wakucena kuti mukhale anyakuonerera abale a gereja, idagula Iye na ciropa cace.

²⁹Thangwi ndisadziwa kuti pa kubuluka kwanga, inabwera mibindzi pakati panu, mbileka kukhala na ntsisi na nkumbi wa mabira.

³⁰Pakati panu, anadza kaoneka anthu anadza kalonga pya uthambi, toera akwate anyakutowera Yezu aende kuna iwo.

³¹Na tenepo, lang'anirani! Kumbukani kuti ndamala pyaka pitatu mbandikhonda puma kukucenjezani na misozi m'maso kuna m'bodzi na m'bodzi, masiku na masikati.

³²“Mphapo cincino, ine ndiri kukuperekani m'manja mwa Mulungu na mwa fala ya kukoma ntima kwace. Iye anakucitani kuti mukule mu Nzimu, na kukupasani unthaka pakati pa onsene anyakulungama.

³³Ine sidasirira parata, peno oro, peno nguwo za munthu.

³⁴Imwe ene musadziwa kuti ine ndaphata basa na manja anga, toera ndikwanise pikhasowa ine, pontho na pikhasowa andzanga.

³⁵Pa pyonsene pidacita ine, ndakupangisani kuti tingaphata basa, tisatongwa kuphedza anyakucherenga. Kumbukani mafala adalonga Mbuya Yezu kuti: ‘Kupasa kusatsandzaisa pikulu kakamwe kupiringana kutambira.’ ”

³⁶Paulu mudamala iye kulonga penepi, agodama pabodzi pene na abale, iye mbaphembera.

³⁷Na tenepo, onsene alira pikulu kakamwe, mban'khumbatira na kumpsompsona.

³⁸Pidaatsukwalisa pikulu, ndi kulonga kudacita iye kuti nkhope yanga munadza kaionabve tayu. Buluka penepo, amperekera mpaka pa xitima ya m'madzi.