Read Cibverano Cipsa Cisena Mab. 21 Bible Online

Mab. 21 - Cibverano Cipsa Cisena bible

Mab. 21

¹Mudamala ife kupanganizana na iwo, tapakira xitima ya m'madzi mbatiyenderatu ku ntsuwa ya Khosi. Mangwana mwace taenda ku ntsuwa ya Rodhi. Buluka penepo mbatifika ku Patara.

²Kweneko tagumana xitima ya m'madzi ikhaenda ku dziko ya Finisya, mbatipakira mbatiyenda ulendo wathu.

³Mukhaona ife ntsuwa ya Xipere na kutali, mbatikhaenda na kukhundu ya ku bangwe, taenda katsamira ku Sirya. Buluka penepo, tachita ku Tiru, kule kukhafuna chitisa mitolo xitima ya m'madzi.

⁴Mu nzinda unowu, tagumana anyakutowera Yezu, mbatikhala na iwo pabodzi ntsiku zinomwe. Na tenepo, iwo na kucenjezwa na Nzimu Wakucena, apanga Paulu kuti akhonde kwenda ku Djerusalema.

⁵Mbwenye mudakwana ntsiku yathu ya kwenda, tabuluka mbatipitiriza na ulendo wathu. Penepo, abale onsene anyakutowera Yezu na akazi awo, pabodzi na ana awo, atiperekera mpaka kunja kwa nzinda. Kweneko ku gombe, tonsene tagodama mbatiphembera.

⁶Pidamala ife panganizana, tapakira xitima ya m'madzi iwo mbabwerera kwenda ku nyumba kwawo.

⁷Buluka penepo, tapitiriza na ulendo wathu, tabuluka ku Tiru mbatifika ku Potolemaidha. Kweneko tamwanyikana na abale, mbatikhala na iwo pabodzi ntsiku yamumphu.

⁸Mangwana mwace tabuluka mbatifika ku Sezareya, mbatikhala ku nyumba kwa Filipi nyakumwaza Mphangwa Zadidi, m'bodzi wa pa nsoka wa anomwe.

⁹Iye akhali na ana ace anai amyali, akhalonga ciporofeta.

¹⁰Pidamala ife ntsiku zizinji, afika kweneko mporofeta m'bodzi adabuluka ku Djudeya, anacemerwa Agabhu.

¹¹Iye afika dhuzi na ife, akwata bhande ya Paulu mbamangika ekha ene myendo yace na mikono yace, mbalonga tenepa: “Nzimu Wakucena usalonga kuti: ‘Mwanacinthu bhande iyi, madjuda anati am'mange tenepa ku Djerusalema, mbampereka m'manja mwa ale adakhonda kukhala madjuda.’ ”

¹²Mudabva ife penepi, ife na abale a kweneko tikhaphemba Paulu kuti aleke kwenda ku Djerusalema.

¹³Penepo Paulu, atitawira tenepa: “Thangwi yanji imwe musalira mbamutsukwalisa pikulu ntima wanga? Ine ndiri dzololo, si toera kumangwa basi tayu, mbwenye na kufa kwene mu Djerusalema na thangwi ya dzina ya Mbuya Yezu.”

¹⁴Mbwenye na kukhonda kutibvera, ife tansiya mbatilonga tenepa: “Mbuya mbacite kufuna kwace.”

¹⁵Pakumala penepyo, tasasanyira ulendo wathu mbatiyenda ku Djerusalema.

¹⁶Abale anango adatawira Yezu a ku Sezareya, atiperekera mbatikwata mpaka ku nyumba kwa Manasoni, kukhafuna kufikira ife. Manasoni akhali wa ku Xipere. Iye akhali m'bodzi wakutoma kutawira Yezu.

¹⁷Mudafika ife ku Djerusalema, abale atitambira na kukomerwa konsene.

¹⁸Mangwana mwace, Paulu aenda na ife pabodzi toera akhaonane na Tiyago. Akulu onsene a nsoka wa anyakutawira Yezu, akhali kweneko.

¹⁹Na tenepo, Paulu aamwanyika mbaapanga cibodzi na cibodzi, pyonsene pikhadacita Mulungu na basa yace, pakati pa anthu adakhonda kukhala madjuda.

²⁰Mudabva iwo penepyo, onsene akuza Mulungu mbalonga kuna Paulu kuti: “Lang'ana m'bale, kuna pikwi na pikwi pya madjuda adatawira Kirixtu, pontho asakakamira Mwambo wa Mozesi.

²¹Iwo asabva mbapilongwa kuti imwe musapfundzisa madjuda ali pabodzi na ale adakhonda kukhala madjuda, kuti asiye Mwambo wa Mozesi, mbamuapanga kuti iwo akhonde kusidza ana awo, pontho na kuakhondesa kutoweza mitemo yathu ya kale.

²²Iwo anati abve kuti imwe mwafika muno. Mphapo tinacita tani?

²³Na tenepo, cita pinafuna ife kukupanga. Tinawo pano amuna anai adacita cidumbiriro kuna Mulungu.

²⁴Ndoko ukhacite na iwo pabodzi ntsembe ya kuceneswa kwawo, uwabulusire ndiwe ntengo wawo wa kulipa, toera apalwe tsisi. Na tenepo, onsene anapidziwa kuti pikhakulongera anthu mphya uthambi, pontho anapidziwa kuti iwe usakakamira mbutoweza Mwambo wa Mozesi.

²⁵Mbwenye kuli ale adatawira Kirixtu adakhonda kukhala madjuda, ife tamala kualembera kale tsamba mbatiapanga pidabverana ife, kuti iwo akhonde kudya nyama ya pinyama pidaikhirwa ntsembe alungu apezi, akhonde kudya ciropa, akhonde kudya nyama ya pinyama pya kucita bubunyulwa khosi, pontho akhonde kucita pyalukwali.”

²⁶Mangwana mwace, Paulu akwatana na amuna ale, mbaenda kacita na iwo pabodzi ntsembe ya kuceneswa. Buluka penepo, aenda onsene ku Nyumba ya Mulungu, kwenda kalonga ntsiku inafuna malisirwa iwo kuceneswa na ya kutambira miyoni yawo m'bodzi na m'bodzi.

²⁷Pikhali izo dhuzi na kumala ntsiku zinomwe, madjuda anango a ku Azya, mudaona iwo Paulu mu Nyumba ya Mulungu, anyengerera anthu onsene, mbam'phata,

²⁸mbakhakhuwa tenepa: “Imwe amuna a Izarayeli, tiphedzenimbo! Mamuna uyu ndi unowu anapfundzisa anthu onsene m'mbuto zonsene, pire pinakhonda mbumba yathu, pire pinakhondesa Mwambo wa Mozesi, na pinakhondeswa pa mbuto ino. Sipyo basi tayu. Iye asiya agerego mbapita mu Nyumba ya Mulungu, mbaswipisa mbuto ino yakucena pa mwambo.”

²⁹Iwo alonga penepi, thangwi akhadaona Torofimu mamuna wa ku Efesu mu nzinda, pabodzi pene na Paulu. Na tenepo, akhanyerezera kuti Paulu akhadankwata mbapita na iye mu Nyumba ya Mulungu.

³⁰Uvia-via unowu wamwazika mu nzinda onsene, anthu mbabwera na kuthamanga. Iwo aphata Paulu, mbam'mburutha mpaka kunja kwa Nyumba ya Mulungu, pa n'dzidzi ubodzi-bodzi misuwo mbifungwa.

³¹Mukhafuna iwo kumupha, nkulu wa cikwi ca anyankhondo a ku Roma atambira mphangwa za kuti anthu onsene a mu Djerusalema ali n'cikuti.

³²Iye acemeresa na mwansanga anyankhondo na nkulu wa anyankhondo, mbathamanga na iwo mpaka pakati pa mbumba. Anthu mudaona iwo nkulu wa cikwi ca anyankhondo na anyankhondo ace, asiya kumenya Paulu.

³³Penepo nkulu wa cikwi ca anyankhondo afika dhuzi na Paulu, amphata mbam'manga na unyolo uwiri. Buluka penepo abvundza tenepa: “Mbani mamuna uyu? Acitanji?”

³⁴Pa mwinji wa anthu, anango akhakhuwa ipi, anango akhakhuwa ipi. Nkulu wa cikwi ca anyankhondo, na kukhonda kupidziwa mwadidi pidacitika thangwi ya uvia-via wa anthu, atuma anyankhondo ace kuti akwate Paulu apite na iye mu mpanda wa nyumba ya anyankhondo.

³⁵Mudafika iwo pa nkwiriro wa nyumba ya anyankhondo, Paulu acita kwatiwa na anyankhondo, thangwi cikuti ca mbumba cikhadatekera.

³⁶Mwinji wa anthu ukhantowera, ukhakhuwa tenepa: “Mupheni! Mupheni!”

³⁷Anyankhondo mukhafuna iwo kumpitisa mu mpanda wa nyumba yawo, Paulu abvundza nkulu wa cikwi ca anyankhondo kuti: “Munandisiya kuti ndilonge na imwe?” Nkulu wa cikwi ca anyankhondo antawira mbam'bvundza tenepa: “Iwe usalonga cigerego?

³⁸Siwe tayu mamuna ule wa ku Idjipitu adatoma na cikuti ntsiku izi zidapita, mbukwata pikwi pinai pya mapanga mbuyenda na iwo n'thando?”

³⁹Paulu atawira tenepa: “Ine ndine n'djuda. Ndabalwa ku Tarisu, nzinda wa mbiri ikulu kakamwe wa Silisya. Ndisakuphembani kuti mundisiye ndilonge na mbumba.”

⁴⁰Na tenepo, nkulu wa cikwi ca anyankhondo antawirisa kuti alonge. Paulu alamuka mbalimira pa nkwiriro, mbacita cidzindikiro na manja ace kuna mbumba. Penepo, anthu onsene amatama, Paulu mbatoma kulonga na malongero awo a ciebhereu kuti: