Read Cibverano Cipsa Cisena Mab. 23 Bible Online

Mab. 23 - Cibverano Cipsa Cisena bible

Mab. 23

¹Na tenepo, Paulu aalang'anisa mwadidi mwene akulu anyakutonga miseru, mbalonga tenepa: “Abale anga! Mpaka lero ndisacita pinafuna Mulungu na manyerezero anga adidi onsene a muntima.”

²Mbwenye Ananiya, nkulu wa anyantsembe, apanga anthu akhali dhuzi na Paulu kuti am'menye pa mulomo.

³Na tenepo, Paulu ampanga Ananiya kuti: “Ndiwe nyauthambi. Mulungu anakuonesa nyatwa. Iwe wakhala penepo toera unditonge ninga munalongera mwambo, mphapo iwe usandimenyesa pontho? Penepi si pya mwambo tayu!”

⁴Amuna akhali dhuzi na Paulu alonga tenepa: “Iwe, uli kutikana nkulu wa anyantsembe wa Mulungu?”

⁵Paulu atawira tenepa: “Abale anga, ine sikhapidziwa tayu kuti iye ndi nkulu wa anyantsembe. Thangwi Bukhu ya Mulungu isalonga kuti: ‘Leka kulonga pyakuipa kuna atongi a mbumba yako.’ ”

⁶Na tenepo, Paulu na kudziwa kuti anango pa anyakutonga miseru akhali a nsoka wa ndale wa asadhusi, anango akhali a nsoka wa ndale wa afarisi, akhuwa mbalonga tenepa: “Abale anga, ine ndine nfarisi, pontho ndine mwana wa afarisi. Ndisatongwa pano, na thangwi ya cidikhiro cina ine ca kuti anyakufa analamuka!”

⁷Mudamala iye kulonga penepi, afarisi na asadhusi atoma kuketesana, nsoka wa anyakutonga mbugawana.

⁸(Thangwi asadhusi nkhabe tawira kuti anyakufa analamuka, pontho nkhabe tawira kuti alipo maanju peno mizimu. Mbwenye afarisi asatawira pyonsene ipi.)

⁹Na tenepo, onsene atoma kukhuwa pikulu kakamwe. Penepo, anyakudziwisa anango a Mwambo a nsoka wa ndale wa afarisi, alamuka mbatoma kuketesana pikulu kakamwe, mbalonga tenepa: “Nkhabe cakuipa cibodzi cidaona ife kuna mamuna uyu. Mbani anapidziwa kuti ndi anju peno ndi nzimu udampanga penepi?”

¹⁰Kuketesana kweneku kukhadatekereratu kakamwe, kufikira kuti nkulu wa cikwi ca anyankhondo mbakhagopa kuti Paulu anati aphiwe na manja. Na thangwi eneyo, apanga anyankhondo kuti achite toera am'buluse Paulu na mphambvu pakati pawo, ankwate aende na iye mu mpanda wa nyumba ya anyankhondo.

¹¹Na masiku mwace, Mbuya abwera kuna Paulu mbampanga tenepa: “Leka gopa! Ninga umboni udandicitira iwe mu Djerusalema muno, usafunika uyende kandicitirembo ku Roma.”

¹²Mangwana mwace na macibese, madjuda abverana kucita makunje, mbadumbira pamaso pa Mulungu kuti iwo nkhabe kumwa peno kudya cinthu mbadzati kupha Paulu.

¹³Amuna akhadabverana kucita makunje enewa, akhadapiringana makumanai.

¹⁴Iwo aenda kalonga na akulu aanyantsembe, na mathubu kuti: “Ife tadumbira pamaso pa Mulungu mbatipikira kuti nkhabe kudya cinthu, mbatidzati kupha Paulu.

¹⁵Cincino, imwe na akulu anyakutonga miseru, phembani nkulu wa cikwi ca anyankhondo kuti an'dzese Paulu patsogolo panu, mucite ninga musafuna kuubvesesa mwadidi nseru wace. Iye mbadzati kufika pano, ife anatigumana tamala sasanyira kuti timuphe.”

¹⁶Mbwenye n'dzukulu wace Paulu wa mamuna, kubala kwa mwana-nkazi wace, aabva makunje enewa. Penepo, abuluka mbapita mu mpanda wa nyumba ya anyankhondo, mbalonga pyonsene kuna Paulu.

¹⁷Na tenepo, Paulu acemera nkulu m'bodzi wa anyankhondo, mbampanga kuti: “Kwata m'phale uyu uyende na iye kuna nkulu wa cikwi ca anyankhondo. Thangwi iye ana pinthu pyakufuna kumpanga.”

¹⁸Nkulu wa anyankhondo, ankwata mwana mbaenda na iye kuna nkulu wa cikwi ca anyankhondo, mbalonga tenepa: “Paulu adamangiwa ule, andicemera mbandiphemba kuti ndikwate m'phale uyu ndidze na iye kuna imwe, thangwi iye ana pinthu pyakufuna kukupangani.”

¹⁹Nkulu wa cikwi ca anyankhondo, aphata mwana pa nkono mbaenda na iye pa khundu, mbam'bvundza tenepa: “Ninji pinafuna iwe kundipanga?”

²⁰Iye atawira kuti: “Madjuda abverana kukuphembani toera mukwate Paulu mangwana, mwende na iye kuna akulu anyakutonga, mbapambazira kuti asafuna kuubvesesa mwadidi nseru wace.

²¹Mbwenye imwe lekani kupitawira penepi. Thangwi amuna akupiringana makumanai anabisala mbadikhira Paulu kuti ancite makunje. Iwo onsene amala dumbira patsogolo pana Mulungu kuti nkhabe kumwa peno kudya cinthu, mbadzati kupha Paulu. Pa n'dzidzi uno, onsene amala sasanyira kuti acite penepi. Asadikhira imwe basi kuti muatawirise.”

²²Nkulu wa cikwi ca anyankhondo ampanga kuti: “Ndoko pyako. Leka kupanga munthu kuti iwe wandipanga penepi.”

²³Na tenepo, nkulu wa cikwi ca anyankhondo acemera atsogoleri awiri aanyankhondo, mbaapanga kuti: “Gumanyani madzana mawiri a anyankhondo, na anyamakavalo makumanomwe, na madzana mawiri a anyamadipa, toera masiku ano, pa n'dzidzi upfemba, abuluke aende ku nzinda wa Sezareya.

²⁴Sasanyiranimbo makavalo toera Paulu akwatiwe na iwo, mbamumwonerera mwadidi mpaka kuna ntongi Feliji.”

²⁵Buluka penepo, nkulu wa cikwi ca anyankhondo alemba tsamba ikhalonga tenepa:

²⁶“Ndine pano Kalaudhyo Lisiyasi. Ndisakumwanyikani imwe wakulemedzeka, ntongi Feliji.

²⁷Mamuna uyu akhadamangwa na madjuda mbakhafuna kumupha. Ine na anyankhondo anga mudafika ife tampulumusa, thangwi tabva kuti iye ndi wa ku Roma.

²⁸Ine ndikhafuna dziwa kuti ndi thangwi yanji iwo ansumira. Na tenepo, ndanyerezera kunkwata mbandienda na iye kuna nsoka wa akulu awo anyakutonga miseru.

²⁹Penepo ndi padadziwa ine kuti thangwi idansumira iwo ikhali ya mwambo wawo basi. Nkhabe cinthu ca upandu cidacita iye kuti atongerwe kuphiwa, peno apitiswe naco n'kaidi.

³⁰Mudapibva ine kuti madjuda asafuna kuncita makunje, na mwansanga ndantumiza kuna imwe. Pontho ndapanga ale adansumira kuti abwere kuna imwe, adze kalonga thangwi idansumira iwo.”

³¹Na tenepo, anyankhondo acita pire pidapangwa iwo. Ankwata Paulu na masiku, mpaka ku Antipatirisi.

³²Mangwana mwace, asiya anyamakavalo mbapitiriza na ulendo wa kwenda na Paulu, iwo mbabwerera ku mpanda wa nyumba ya anyankhondo.

³³Pidafika iwo ku Sezareya, apereka tsamba na Paulu ene kuna ntongi.

³⁴Ntongi, pakumala kuona tsamba, abvundza Paulu kuti asakhala dziko ipi. Mudan'dziwa iye kuti Paulu ndi wa ku dziko ya Silisya,

³⁵alonga tenepa: “Ale adakusumira angafika pano, ndinadza kaubva nseru wako.” Buluka penepo, abulusa ntemo kuti Paulu aende kaonererwe mu nyumba ya mambo Herodhi.