Read Cibverano Cipsa Cisena Mab. 28 Bible Online

Mab. 28 - Cibverano Cipsa Cisena bible

Mab. 28

¹Mudapulumuswa ife, ndi mudadzindikira ife kuti ntsuwa eneyi isacemerwa Malata.

²Anthu a pa ntsuwa eneyi, apangisa kuna ife kukoma ntima kwawo kukulu kakamwe. Iwo atitambira mwadidi mwene, mbatigasira moto, thangwi ikhali ntsiku ya mitambo, pontho kukhatonthola.

³Paulu, agumanya nsumbu wa nkhuni. Mukhaziyikha iye pa moto, nyoka ya m'bobo, na kuthawa kupisa kwa moto, yabuluka mbimpyangirira pa nkono.

⁴Anthu a pa ntsuwa eneyi, mudaona iwo nyoka ya m'bobo iri dedzu-dedzu m'manja mwa Paulu, atoma kulonga m'bodzi na m'bodzi kuti: “Ndimo mwenedi, mamuna uyu ndi phanga. Thangwi apulumuka m'bara, na lero mulungu wathu wakulungama nkhabe funa kunsiya kuti akhale m'maso.”

⁵Mbwenye Paulu aigubudza nyoka pa moto, mbakhonda citika cinthu cibodzi cakuipa.

⁶Iwo akhadikhira kuti iye anadza kabzimba, peno pa n'dzidzi ubodzi-bodzi, anaferatu. Mbwenye pidadikhira iwo n'dzidzi ukulu ene mbaona kuti nkhabe cibodzi cakuipa cidacitika kuna iye, atoma kunyerezera pinango mbalonga tenepa: “Mamuna uyu ndi mulungu!”

⁷Dhuzi na penepo, pakhali na zunde ya mamuna m'bodzi anacemerwa Pubhilyo, nkulu wa ntsuwa eneyi. Iye atitambira mwadidi mwene, mbatikhala ntsiku zitatu pa nyumba pace.

⁸Baba wace akhali pa bonde, thangwi akhadaferuka pontho akhaphandza. Paulu, apita mwenemu kwenda kamuona, am'phemberera na kumuikha manja, mbamuwangisa.

⁹Buluka penepo, atenda a pa ntsuwa akhabwera kuna Paulu, mbakhawangiswa.

¹⁰Iwo akhatilemedza mbakhatiphedza pikulu kakamwe. Pontho mukhafuna ife kwenda, atipaka na pyonsene pikhafuna ife pa ulendo wathu.

¹¹Pakumala myezi mitatu, tapakira xitima ya m'madzi ikakhala pa ntsuwa pa n'dzidzi wa khoni. Xitima eneyi ikhali ya ku nzinda wa Alixandiriya. Iyo ikhali na cidzindikiro ca dzimunthu ya alungu a mamphasa anacemerwa Kaxitori na Poluxu.[18]

¹²Mudafika ife mu nzinda wa Sirakusa, tamalamo ntsiku zitatu.

¹³Buluka penepo, tapitiriza ulendo wathu mbatifika ku nzinda wa Rejyo. Mangwana mwace, yatoma kumenya mphepo ya bangwe, mbatifika ku Putiyoli pa ntsiku yaciwiri.

¹⁴Mu nzinda unowu, tagumanamo abale angasi, adatiphemba kuti tikhale na iwo pabodzi sumana yamumphu. Buluka penepo taenda ku Roma.

¹⁵Abale a ku Roma mudabva iwo kuti ife tiri kufika, iwo abwera mpaka pa nsika wa Apyu, na ku nyumba zitatu za kutambira alendo, toera tionane na iwo. Paulu na kuaona, awanga manungo mbapereka takhuta kuna Mulungu.

¹⁶Mudafika ife ku Roma, Paulu atawirirwa kukhala pa nyumba yace ekha, mbakhaonererwa na nyankhondo m'bodzi.

¹⁷Mudamala ntsiku zitatu, Paulu acemeresa atsogoleri a madjuda. Mudagumanyikana iwo, iye aapanga tenepa: “Abale anga, nkhabe cibodzi cidadawisa ine kuna mbumba yathu, peno kuna mitemo idatambira ife na akulu athu akale. Mbwenye madjuda andimanga ku Djerusalema, mbandipereka m'manja mwa anthu a ku Roma.

¹⁸Iwo andibvundzisa, mbakhafuna kundibulusa n'kaidi, na kuti nkhabe thangwi ibodzi ikhadaona iwo ya kundipha nayo.

¹⁹Mbwenye madjuda akhakhonda. Na thangwi eneyo, ndaphemba kuti nditongwe na mambo Sezari. Mbwenye sikulongera kuti ndisafuna ndisumire mbumba yanga tayu.

²⁰Na thangwi eneyi, ndakuphembani kuti ndionane na imwe pontho ticeze. Pidamangirwa ine, ndi thangwi ya cidikhiro ca mbumba ya Izarayeli.”

²¹Penepo iwo atawira tenepa: “Nkhabe tsamba ibodzi ya ku Djudeya idatambira ife idatipanga penepi, peno mbilonga na thangwi yako. Pontho nkhabe m'bale m'bodzi adabuluka kweneku mbatipanga na thangwi ya kuipa kudacita iwe.

²²Mbwenye tisafuna tibvembo pa mulomo pako, ninji pinanyerezera iwe. Thangwi tisapidziwa kuti m'mbuto zonsene, kuna anthu analonga kuipa nsoka unowu wa ndale.”

²³Na tenepo, iwo abverana ntsiku kuti adze kagumane na Paulu. Ntsiku eneyi, mwinji wa anthu waenda kudafikira Paulu. Iye akhaapanga mbakhaacitira umboni wa Umambo wa Mulungu, mbakhasaka ndzeru za kuti iwo atawire pya Yezu, na kuapangisa Mwambo wa Mozesi na wa Maporofeta, kutomera ca macibese mpaka ca maulo.

²⁴Anango apitawira pikhalonga iye, mbwenye anango apikhonda.

²⁵Na tenepo, iwo atoma kuketesana okha-okha. Mbwenye mukhabuluka iwo, Paulu alonga mafala akumalisa kuti: “Ndimo mwene pidalonga Nzimu Wakucena kuna a mbuya anu na mulomo wa mporofeta Izaya kuti:

²⁶“ ‘Ndoko kuna mbumba iyi ukhaipange kuti: Imwe munabva, mbwenye nkhabe kudza kabvesesa tayu. Munaona, mbwenye nkhabe kudza kaonesesa tayu.

²⁷Thangwi mbumba iyi yauma ntima. Afunga makutu, mbaphopa maso. Mbapidakhonda kukhala tenepa, maso awo mbadaona, makutu awo mbadabva, pontho mbadakwanisa kudzindikira na ndzeru zawo, mbabwera kuna Ine, tenepa Ine mbindiawangisa.’

²⁸“Mphapo dziwani kuti upulumuki unowu wa Mulungu watumizwa kuna ale adakhonda kukhala madjuda. Iwo anaubva!”

²⁹[Mudamala kulonga Paulu penepi, madjuda amwazana mbaenda na kuketesana pikulu kakamwe okha-okha.[19]]

³⁰Paulu amala kweneku pyaka piwiri mbakhakhala pa nyumba ya kulipwa kobiri. Iye akhatambira onsene akhadza kamuona.

³¹Akhalonga Umambo wa Mulungu, pontho mbakhapfundzisa pya Mbuya Yezu Kirixtu pakweca, mbakhonda kupingizwa.