Read Cibverano Cipsa Cisena Mab. 4 Bible Online

Mab. 4 - Cibverano Cipsa Cisena bible

Mab. 4

¹Mukhalonga Pedhru na Juwau mafala awa kuna mbumba, afika anyantsembe na nkulu wa anyakuonera Nyumba ya Mulungu, pabodzi pene na nsoka unango wa madjuda unacemerwa asadhusi.

²Iwo akhadaipirwa pikulu kakamwe, thangwi Pedhru na Juwau akhapfundzisa mbumba mbakhalonga kuti, na kulamuka pa kufa kwa Yezu, pisapangisa kuti anyakufa analamuka.

³Penepo, aamanga mbaaikha n'kaidi mpaka mangwana mwace, thangwi dzuwa ikhadadoka.

⁴Mbwenye anthu azinji akhabva fala ya Mulungu, aitawira. Pa onsene adatawira, nsoka wawo ukhali dhuzi na kukwana pikwi pixanu pya amuna.

⁵Mangwana mwace, atongi a madjuda, na mathubu, pabodzi pene na anyakudziwisa a Mwambo, agumanyikana ku Djerusalema.

⁶Pa nsonkhano unowu, akhalipombo Anasi, nkulu wa anyantsembe, Khaifasi, Juwau, Alixande, na onsene ale akhali a dzindza ya nkulu wa anyantsembe.

⁷Penepo, iwo aakwata apoxtolo mbaiyikha patsogolo pawo, mbaabvundza tenepa: “Ndi mphambvu za ani, peno ndi na dzina ya ani inacita na imwe pinthu penepi?”

⁸Na tenepo, Pedhru adzala na Nzimu Wakucena, mbaatawira tenepa: “Imwe atongi na mathubu!

⁹Ngakhala ife lero tiri kubvundziwa na thangwi ya udidi udacitirwa mamuna m'bodzi wa ntenda kuti iye apulumuswa tani,

¹⁰dziwani imwe na mbumba yonsene ya Izarayeli, kuti mamuna uyu anaona imwe pano, awangiswa na dzina ya Yezu Kirixtu wa ku Nazareti, unowu adakhomera imwe pa ntanda, Mulungu mbamulamusa pa kufa.

¹¹Yezu unowu, ndiwo “ ‘mwala udakhondiwa na imwe anyakumanga nyumba, pontho mbudza kakhala mwala wakufunika kakamwe.’

¹²Nkhabebve upulumuki muna munthu unango, thangwi nkhabe dzina inango pantsi pano idapaswa anthu, kuti inakwanisa kutipulumusa.”

¹³Na kuona cipapu ca Pedhru na ca Juwau, pontho na kuadziwa kuti ndi anthu ene pyawo akukhonda kupfundza, adzumatirwa napyo, mbaadzindikira kuti iwo akhali atowereri a Yezu.

¹⁴Mbwenye iwo akhacimwana kupokanya Pedhru na Juwau, thangwi mamuna akhadawangiswa ule, akhali penepo dzololo pabodzi na iwo.

¹⁵Na tenepo, iwo apanga Pedhru na Juwau kuti abuluke mu nyumba ikhatongera iwo miseru, mbatoma kubverana okha-okha

¹⁶kuti: “Tinacitanji na amuna awa? Thangwi anthu onsene mu Djerusalema muno, asapidziwa kuti iwo acita cirengo cikulu, ca kuti ife nkhabe kwanisa kucikhonda.

¹⁷Mbwenye toera pinthu penepi pileke mwaziwa kuna mbumba, mbatiathuuseni akhonde pangabve munthu dzina eneyi.”

¹⁸Na tenepo, aacemera pontho, mbaakhondesa kuti aleke kulonga na kupfundzisa pontho cinthu na dzina ya Yezu.

¹⁹Mbwenye Pedhru na Juwau aatawira tenepa: “Nyerezerani mwadidi, ngakhala mphyakulungama pamaso pa Mulungu, kubvera imwe mbatikhonda kubvera Mulungu.

²⁰Thangwi ife tinacimwana khonda kupilonga pire pidaona ife na pidabva ife.”

²¹Pakumala kuathusa pontho, aasiya mbaenda, mbakhasowa thangwi ya kuathabusa nayo, thangwi mbumba yonsene ikhakuza Mulungu na pire pikhadacitika.

²²Thangwi mamuna uyu akhadawangiswa na cirengo ici, akhadapiringana pyaka makumanai pyakubalwa.

²³Mudasiyiwa iwo mbaenda, Pedhru na Juwau abwerera kuna andzawo, mbalonga pyonsene pidapangwa iwo na akulu aanyantsembe pontho na mathubu.

²⁴Mudabva iwo penepyo, onsene pabodzi pene, aphembera Mulungu mbalonga tenepa: “Mbuya, imwe ndimwe adacita kudzulu na pantsi, na bara na pyonsene piri mwenemu!

²⁵Imwe mwalonga na Nzimu wanu, na mulomo wa nyabasa wanu baba wathu Dhavidhi kuti: “ ‘Thangwi yanji anthu adakhonda kukhala madjuda asaipirwa pikulu kakamwe, pontho thangwi yanji mbumba zisabverana kucita pyapezi?

²⁶Amambo a dziko asasasanyira, pontho atongi asagumanyikana, toera acite nkhondo na Mbuya, pontho na Misiya wanu.’

²⁷Ndimo mwenedi, Herodhi na Ponsyo Piratu agumanyikana mu nzinda muno pabodzi na anthu adakhonda kukhala madjuda, na mbumba ya Izarayeli, mbazonda Yezu nyabasa wanu wakucena adadzoza imwe.

²⁸Iwo acita pire pidatonga imwe kale kuti picitike na mphambvu zanu, na kufuna kwanu.

²⁹Cincino Mbuya onani kuthusa kunacita iwo. Pasani ndzeru anyabasa anu, toera akwanise kumwaza fala yanu na cipapu,

³⁰mbamukhafuthula djanja yanu, kuti mukondze na kucita pidzindikiro pontho na pirengo, na dzina ya Yezu nyabasa wanu wakucena.”

³¹Mudamalisa iwo kuphembera, penepo pakhali iwo patekenyeka. Na tenepo onsene adzazwa na Nzimu Wakucena, mbatoma kumwaza fala ya Mulungu na cipapu.

³²Pa onsene adatawira, akhakhala ninga ana ntima ubodzi na ndzeru zibodzi. Nkhabe munthu akhalonga kuti pinthu ipi mphyanga. Mbwenye akhagawana m'bodzi na m'bodzi pyonsene pikhakhala na iwo.

³³Na mphambvu zikulu apoxtolo akhaenda mbalonga na thangwi ya kulamuka pa kufa kwa Mbuya Yezu. Na tenepo, mwa iwo onsene mukhagumanika kukoma ntima kukulu kwa Mulungu.

³⁴Pa nsoka wawo pakhali nkhabe nyakucherenga. Thangwi ale akhakhala na minda yawo peno nyumba zawo, akhazigulisa mbakhadzesa kobiri yace,

³⁵mbakhaipereka kuna apoxtolo, iwombo akhaigawiza mbakhalang'ana kusowa kwa m'bodzi na m'bodzi.

³⁶Mbwenye Zuze, m'bodzi wa dzindza ya Levi, wa ku ntsuwa ya Xipere, ule adapaswa dzina ya Bharnabhasi na apoxtolo, dzina inalongera “Nyakupasa cipapu,”

³⁷agulisa munda wace, kobiri yace mbaidzesa kuna apoxtolo.