Read Cibverano Cipsa Cisena Mab. 6 Bible Online

Mab. 6 - Cibverano Cipsa Cisena bible

Mab. 6

¹Pa ntsiku zenezo, nsoka wa anthu akhatowera Yezu ukhainjipiratu kakamwe. Na tenepo, madjuda akhalonga cigerego, akhadungunya okha-okha kudungunyira madjuda akhalonga ciebhereu. Thangwi akazi a dzindza ya agerego adaferwa na amuna awo, akhaduwalika pa kutambiriswa pinthu pyakudya ntsiku zonsene.

²Na thangwi eneyo, apoxtolo khumi na awiri a Yezu, agumanya anyakupfundza a Yezu onsene mbalonga tenepa: “Si pyadidi tayu kuti ife tisiye kumwaza fala ya Mulungu, mbatitsalakana basi kugawiza pyakudya kuna anthu.

³Mbwenye abale, sankhulani pakati panu amuna anomwe ananyindira imwe, akudzala na Nzimu Wakucena pontho na udziwisi, toera tiasiyire basa iyi.

⁴Mbwenye ife, tinapitiriza basi na basa yathu ya kuphembera na ya kumwaza fala ya Mulungu.”

⁵Onsene apitawira pidalonga apoxtolo. Na tenepo, asankhula Xitevau, mamuna wakudzala na cikhulupiro na Nzimu Wakucena. Asankhulambo pontho Filipi, Porokoru, Nikanori, Timoni, Parimenasi, na Nikolau munthu wa ku Antiyokiya akhadapita mu mwambo wa madjuda.

⁶Amuna awa aenda kaikhwa patsogolo pa apoxtolo, iwo mbakhaaphemberera na kuaikha manja.

⁷Na tenepo, fala ya Mulungu ikhaenda mbibalalika. Mu Djerusalema, nsoka wa anyakutowera Yezu ukhakuleratu na mwansanga, pontho anyantsembe azinji a madjuda, akhatawirambo cikhulupiro ca anyakutawira Yezu.

⁸Xitevau, mamuna wakudzala na kukoma ntima pontho na mphambvu za Mulungu, akhacita pinthu pikulu pyakudzumisa, na pirengo pakati pa mbumba.

⁹Mbwenye amuna anango a nyumba ya kuphemberera ya madjuda ikhacemerwa ya “anthu akusudzulwa mu udzakazi,” na madjuda a dziko ya Sirene na a ku Alixandiriya, pontho na a ku dziko ya Silisya na a ku Azya, atoma kuketesana na Xitevau.

¹⁰Mbwenye iwo akhacimwana kunkonesa Xitevau, na thangwi ya udziwisi pontho na Nzimu Wakucena ukhalonga na iye.

¹¹Na tenepo, iwo adyekera amuna angasi toera alonge kuti: “Ife tamubva mamuna uyu mbakhaxola Mozesi na Mulungu ene.”

¹²Na thangwi eneyo, mathubu na anyakudziwisa a Mwambo anyengerera mbumba kuti icite cikuti. Na tenepo, apomokera Xitevau, mbankwata na mphambvu mbaenda na iye kuna nsoka wa akulu anyakutonga miseru.

¹³Penepo, abweresa anyamaso authambi mbalonga tenepa: “Mamuna uyu nkhabe puma kuxola Nyumba ya Mulungu na mwambo wa Mozesi.

¹⁴Ife tamubva mbakhalonga kuti Yezu wa ku Nazareti anaifudza Nyumba ya Mulungu mbacinja mitemo idatipasa Mozesi.”

¹⁵Na tenepo, onsene akhali nawa-nawa mu nyumba ya kutongera miseru, amulang'anisa, mbaona kuti nkhope yace ikhali ninga nkhope ya anju.