Read Cibverano Cipsa Cisena Mab. 7 Bible Online

Mab. 7 - Cibverano Cipsa Cisena bible

Mab. 7

¹Na tenepo, nkulu wa anyantsembe abvundza Xitevau kuti: “Pinalongwa ipi ndimo mwene?”

²Xitevau atawira tenepa: “Abale na ababa, bveserani! Mulungu wa mbiri aonekera kuna baba wathu Abharaamu pikhakhala iye ku dziko ya Mezopotamya, mbadzati kwenda kakhala ku nzinda wa Arani.

³Mulungu ampanga tenepa: ‘Buluka ku dziko yako, pakati pa abale ako, uyende ku dziko inafuna kudza kakupangisa Ine.’

⁴“Na tenepo, Iye abuluka ku dziko ya Kalidheya mbaenda kakhala ku nzinda wa Arani. Pa kufa kwa baba wace, Mulungu am'bweresa Abharaamu ku dziko ino inakhala imwe lero.

⁵Mulungu akhonda kunsiyira unthaka pontho na thanyo ene ibodzi ya mataka. Mbwenye Mulungu ampikirira kuti anadza kampasa dziko yonsene ya Khanani, kuti ikhale yace na ya dzindza yace, Abharaamu mbadzati kukhala na ana.

⁶Mulungu alonga kuna Abharaamu kuti: ‘Dzindza yako inadza katamira ku dziko inango. Pontho iyo inadza kacitwa udzakazi, mbiyoneswa nyatwa pa pyaka madzana manai.

⁷Mbwenye Ine ndinati ndiithabuse dziko eneyi inafuna kuacita udzakazi. Angamala, anabuluka kweneko mbadza kandilambira pa mbuto ino.’

⁸Mulungu acita cibverano na Abharaamu, ca kusidza. Na thangwi eneyo, pakupita ntsiku zisere Izaki mbadamala kubalwa, Abharaamu ansidza. Izaki asidzambo Djakobo, iyembo acitambo sawa-sawa kuna anace khumi na awiri, makholo a madzindza.

⁹“Iwo akhali na bibvu na m'bale wawo Zuze, mban'gulisa ninga n'dzakazi ku dziko ya Idjipitu. Mbwenye Mulungu akhali na iye,

¹⁰mbampulumusa pa nyatwa zace zonsene, am'bvera ntsisi, mbampasa udziwisi patsogolo pa Farau, mambo wa ku Idjipitu. Iye Farau mbansankhula kuti akhale ntongi wa dziko ya Idjipitu, na nyumba yace yonsene.

¹¹“Buluka penepo mwaoneka njala idadzesa nyatwa ikulu mu Idjipitu na ku Khanani, ambuya athu mbasowa na cakudya cene.

¹²Mbwenye mudabva Djakobo kuti mu Idjipitu muna phoso, pa ulendo wakutoma, atuma ambuya athu mbaenda kweneku.

¹³Pa ulendo wawo waciwiri, Zuze apangizika kuna abale ace toera an'dzindikire. Na tenepo, Farau adza kaadziwambo abale a Zuze.

¹⁴Buluka penepo, Zuze acemeresa Djakobo, baba wace, na dzindza yace yonsene toera aende ku Idjipitu. Onsene akhali anthu makumanomwe na axanu.

¹⁵Na tenepo, Djakobo aenda ku Idjipitu. Kweneku ndiko kudafa iye na ambuya athu ene.

¹⁶Manungo awo akwatwa mbaenda ku Sikee, mbaaikha n'nthumbi ikhadagula Abharaamu na kobiri zingasi kuna ana a Amori, ku Sikee.

¹⁷“Mukhakwana n'dzidzi wa kuti Mulungu acite pikhadapikirira Iye Abharaamu, mbumba yadza kakula mbinjipiratu mu Idjipitu.

¹⁸Na tenepo, mambo unango akhakhonda dziwa Zuze, atoma kutonga dziko ya Idjipitu.

¹⁹Mambo unowu, na ucenjeri wace wa kuipa, akhazonda mbumba yathu mbakhathabusa ambuya athu, mbakhaapanga na kuakakamiza kusiya akhombwani awo, kuti afe.

²⁰“Pa n'dzidzi unowu abalwa Mozesi, mwana wakubalika kakamwe pamaso pa Mulungu. Iye abiswa myezi mitatu n'nyumba, mbakhalerwa na ababa ace.

²¹Mbwenye mudadza kasiyiwa iye, mwana wace Farau wankazi, amulokota mbanfuya ninga mwana wace wa kubala.

²²Na tenepo, Mozesi apfundziswa udziwisi onsene wa mu Idjipitu, mbakhala munthu wa mphambvu pa kulonga na pa kucita pinthu.

²³“Mukhafungisa Mozesi pyaka makumanai pyakubalwa, anyerezera kuti aende kaona abale ace, ana a Izarayeli.

²⁴Kweneko, mudaona iye ndzawo m'bodzi mbakhathabuswa na mamuna wa ku Idjipitu, aenda kam'bvunulira mbapha mamuna wa ku Idjipitu.

²⁵Mozesi akhanyerezera kuti abale ace anadzindikira kuti iye ndi dombo adatuma Mulungu, toera aaombole. Mbwenye iwo acimwana kupidziwa penepi.

²⁶Mangwana mwace, Mozesi akhaenda kuna ana a Izarayeli awiri akhamenyana. Iye akhasaka kuabvunulira kuti asekesane, mbaapanga tenepa: ‘Amunamwe, imwe ndi ubale wanu. Thangwi yanji musamenyana?’

²⁷“Mbwenye ule akhamenya ndzace abhoma Mozesi kule, mbampanga tenepa: ‘Ndi ani adakuikha ninga n'tsogoleri, pontho ninga ntongi wa miseru yathu?

²⁸Iwe usafuna kundipha ninga pidacita iwe mamuna wa ku Idjipitu dzulo?’

²⁹Mozesi mudabva iye penepi, athawa mu Idjipitu mbaenda kakhala ninga nthami mu dziko ya Midhiyani. Kweneko abala anace awiri amuna.

³⁰“Pakupita pyaka makumanai, anju m'bodzi aonekera kuna Mozesi n'thando, pakati pa malirimi a moto ukhagaka pa thundudzi dhuzi na phiri ya Sinai.

³¹Mozesi adzumatirwa na pikhaona iye, afendedzera dhuzi toera apyonese mwadidi. Penepo abva fala ya Mulungu mbikhalonga tenepa:

³²‘Ine ndine Mulungu wa ambuyako, Mulungu wa Abharaamu, wa Izaki na wa Djakobo.’ Mozesi akhatetemera na kugopa, mbacimwana na kulang'ana kwene.

³³“Na tenepo, Mbuya ampanga kuti: ‘Bulusa ntsapato m'myendo mwako, thangwi mbuto ino ina iwe ndi mbuto yakucena.

³⁴Ndimo mwene, Ine ndaona kuthabuswa kunacitwa mbumba yanga mu Idjipitu. Ndisabva kubulira kwawo, na tenepo ndachita toera ndiapulumuse. Cincino bwera kuno, thangwi ndisafuna kukutuma uyende ku Idjipitu.’

³⁵“Mozesi unowu ndiye akhadakhondiwa na iwo, mbalonga tenepa: ‘Ndi ani adakuikha ninga n'tsogoleri, pontho ninga ntongi wa miseru yathu?’ Iye atumwa na Mulungu toera akhale n'tsogoleri na muomboli wawo, na mphambvu za anju akhadam'bulukira pa thundudzi.

³⁶Ndiye adaabulusa ku Idjipitu, mbacita pinthu pya kudzumisa na pirengo mu Idjipitu, m'Bara ya Kufuira na n'thando, pa pyaka makumanai.

³⁷“Ndiye Mozesi m'bodzi ene adapanga ana a Izarayeli kuti: ‘Pakati pa abale anu, Mulungu anakusankhulirani mporofeta m'bodzi ninga ine.’

³⁸Ndiye Mozesi akhali pabodzi na mbumba n'thando, na anju akhalonga na iye pa phiri ya Sinai, pontho na ambuya athu, mbatambira mafala a upulumuki toera aapangembo ife.

³⁹“Mbwenye ambuya athu akhonda kum'bvera. Mban'khonda mbakhanyerezera m'mitima mwawo kubwerera ku Idjipitu,

⁴⁰mbalonga tenepa kuna Arau: ‘Ticitire alungu toera atitsogolere. Thangwi ife nkhabe kupidziwa pidacitika na Mozesi, adatibulusa ku dziko ya Idjipitu!’

⁴¹Pa ntsiku zenezo, iwo acita dzimunthu ya mwana buru, mbaikhira ntsembe. Buluka penepo acita phwandu ya kulambira dzimunthu ikhadacita iwo na manja awo.

⁴²Mbwenye Mulungu athauka mbaasiya kuti alambire pyawo nyenyezi za kudzulu, ninga mukhadalemberwa ipyo m'bukhu ya maporofeta kuti: “ ‘Imwe mbumba ya Izarayeli! Pinyama pikhapha imwe mbamucita ntsembe pa pyaka makumanai pidamala imwe n'thando, mukhacitira Ine?

⁴³Pontho mwathuka khumbi ya Moloki, na nyenyezi ya mulungu wace Refani, madzimunthu adacita imwe toera kualambira! Na thangwi eneyo, ndinadza kakusiyani mbamutamira kunja kwa Bhabhilonya.’ ”

⁴⁴“N'thando, ambuya athu akhali na khumbi ya ntsembe ya Mulungu ikhalonga umboni, ikhadacitwa ninga mukhadapangwa Mozesi na Mulungu, kuti aicite sawa-sawa ninga mukhadapangizwa iye.

⁴⁵Ambuya athu, pabodzi na Djosuwa, aitambira Nyumba ya Ntsembe mbaikwata, pa n'dzidzi udatapata iwo dziko ya madzindza adathamangisa Mulungu patsogolo pawo. Nyumba ya Ntsembe eneyi yakhala pa dziko eneyo, mpaka pa midzidzi ya Dhavidhi.

⁴⁶Dhavidhi agumana kukoma ntima kwa Mulungu, mbam'phemba kuti ansiye amange Nyumba ya Mulungu wa Djakobo.

⁴⁷Mbwenye ndi Salomau adadza kamanga nyumba eneyi.

⁴⁸“Mphapo Mulungu wa kudzulu kakamwe, nkhabe khala n'nyumba ya kumangwa na anthu. Ninga mudalonga mporofeta kuti:

⁴⁹“Mulungu alonga tenepa: ‘Kudzulu ndi mpando wanga wa umambo. Pantsi pano ndi mbuto ya kupondera myendo yanga. Ndi khaindi yanji ya nyumba inafuna kundimangira imwe? Peno ndi mbuto ipi inafuna Ine kupumira?

⁵⁰Kodi si manja anga awa tayu adacita pinthu pyonsene ipi?’

⁵¹“Imwe mbumba ya upoka, ya kuuma mitima na yakukhonda kubva! Imwe mwalandana na ambuya anu. Muli ciriri basi na kupokanya Nzimu Wakucena!

⁵²Mbani mporofeta adakhonda kuchingwa na ambuya anu? Iwo apha ale akhadza mbalonga na thangwi ya kudza kwa Nyakulungama, Unowu adasandukira imwe mbamum'pha.

⁵³Imwe mudatambira mwambo wa Mulungu na maanju, mbwenye mwacimwana kuukoya.”

⁵⁴Iwo na kubva penepi aipirwa, mbaluma mano lumira Xitevau.

⁵⁵Mbwenye Xitevau, na kudzabza na Nzimu Wakucena, alang'ana kudzulu mbaona mbiri ya Mulungu, pontho aona Yezu ali dzololo ku khundu ya nkono wa madyo wa Mulungu.

⁵⁶Penepo iye alonga tenepa: “Ine ndisaona kudzulu kwafunguka. Mwana wa Munthu ali dzololo ku khundu ya madyo ya Mulungu!”

⁵⁷Mbwenye iwo afunga makutu mbakhakhuwa, onsene pabodzi pene mbanumphira Xitevau.

⁵⁸Buluka penepo ankwekweta mbaenda na iye kunja kwa nzinda, mbatoma kum'menya na myala. Anyamaso asiya nguwo zawo pa myendo pa m'phale m'bodzi anacemerwa Saulo.

⁵⁹Mukhamenyiwa iye na myala, Xitevau akhaphembera mbalonga tenepa: “Mbuya Yezu, tambirani nzimu wanga!”

⁶⁰Na tenepo, agodama mbakhuwa na mphambvu kuti: “Mbuya! Lekani kuapasa thangwi ya kudawa kwawo uku!” Pidamala iye kulonga penepi, agona muna Mbuya.