Read Cibverano Cipsa Cisena Aroma 11 Bible Online

Aroma 11 - Cibverano Cipsa Cisena bible

Aroma 11

¹Apo cincino funa ndibvundze: Kodi nkhulongera kuti Mulungu aikhonda mbumba yace? Nkhabe citika! Ine ene ndine muizarayeli, dzindza ya Abharaamu, nkhonde ya Bhenjamini.

²Mulungu hadaikhonda tayu mbumba yace idadziwa Iye kale ene. Kodi imwe nkhabe kupidziwa pidalonga Eliya kuna Mulungu kusumira Izarayeli, ninga mudalembwa ipyo m'Bukhu ya Mulungu kuti:

³“Mbuya, awa apha maporofeta anu mbafudza maguwa anu a ntsembe. Adasala ndine basi, pontho cincino asasaka kupha na ine ene?”

⁴Mphapo Mulungu antawira tani? Antawira tenepa: “Ndapambula pikwi pinomwe pya amuna adakhonda godamira mulungu wapezi anacemerwa Bhaali.”

⁵Ndi penepi pinacitikambo na lero. Asala ana adasankhulwa na thangwi ya kukoma ntima kwa Mulungu.

⁶Ngakhala pyacitika na thangwi ya kukoma ntima kwa Mulungu, pinacitikabve na thangwi ya mabasa tayu. Mbapidakhala ndi na mabasa, kukoma ntima kwa Mulungu mbukudakhalabve kukoma ntima tayu.

⁷Tinalonganji mphapo? Tinalonga kuti mbumba ya Izarayeli apicimwana pire pikhasaka iwo, mbwenye ale adasankhulwa apikwanisa. Anango aumiswa mitima,

⁸ninga munalongera Bukhu ya Mulungu kuti: “Mulungu aapasa nzimu wa citulo. Aapasa maso akukhonda kuona, na makutu akukhonda kubva, mpaka lero.”

⁹Pontho Dhavidhi alonga kuti: “Pa thando inadyera iwo, mbapakhale ninga ukonde, ninga nsampha, cakugwegwedusa na cakubwezera nyatwa kuna iwo.

¹⁰Maso awo mbakhale na cidima toera acimwane kuona, na misana yawo mbikhale yakukotama kwenda na kwenda.”

¹¹Mphapo cincino funa ndibvundze pontho kuti: Kodi iwo agwegweduka toera agwe mbacimwana kulamuka pontho? Nkhabe citika! Mbwenye na thangwi ya kudodomeka kwawo, ndiko kudabweresa upulumuki kuna ale adakhonda kukhala madjuda, toera mbumba ya Izarayeli ikhale na bibvu.

¹²Mbwenye ngakhala kudodomeka kwawo ndi mpfuma kuna dziko, pontho kupolola kwawo ndi mpfuma kuna ale adakhonda kukhala madjuda, ndiye tani n'dzidzi wawo ungakwana!

¹³Cincino ndisalonga na imwe adakhonda kukhala madjuda. Thangwi ndine mpoxtolo wa Yezu, kuna ale adakhonda kukhala madjuda, ndisapasa mbiri basa yanga,

¹⁴mbandidikhira kuti panango ndikwanise kucitisa mbumba yanga kuti ikhale na bibvu, anango mbapulumuka.

¹⁵Thangwi ngakhala kukhondiwa kwawo na Mulungu kwadzesa kusekesana kwa dziko na Mulungu, ndiye tani kutawirirwa kwawo? Kunapulumusa anyakufa.

¹⁶Ngakhala phindi ya nkate wa pyakudya pyakutoma pya m'munda waceneswa, na nkate ene onsene waceneswambo. Ngakhala n'chici waceneswa, na nthawi zace zene zaceneswambo.

¹⁷Ngakhala nthawi zinango zagwandiwa, iwembo ninga muti wa mulivera wa n'tsanga wachekwambo pakati pa nthawi zinango, cincino mbumwambo pabodzi pene nthombvu zinabuluka ku n'chici wa muti wa mulivera wa m'mudzi,

¹⁸leka kupikuza mbupwaza nthawi zenezi zidagwandiwa tayu. Mphapo ungapikuza dziwa kuti anadyesa n'chici siwe tayu, mbwenye n'chici ndiwo unakudyesa.

¹⁹Na tenepo, iwe unati ulonge kuti: “Nthawi zamala gwandiwa, toera ine ndipfekererwe.”

²⁰Ndimo mwene. Iwo agwandiwa na thangwi yakukhonda kutawira kwawo. Mbwenye iwe uciri penepo ndi thangwi ya kukhulupira kwako. Leka kupikuza, mbwenye ugope.

²¹Thangwi ngakhala Mulungu agwanda nthawi zakubalwa penepo, dziwa kuti anakugwandambo.

²²Onani mphapo udidi wa Mulungu na kukala ntima kwace. Asakala ntima na ale adagwa, mbwenye asakoma ntima na iwe, male unganyanya kunyindira kukoma ntima kwace. Pezi pyene, na iwe ene unadza kagwandiwambo.

²³Na iwombo, angasiya kuuma ntima kwawo, anapfekerwambo. Thangwi Mulungu anamphambvu za kuapfekerera pontho.

²⁴Thangwi ngakhala iwe wagwandiwa pa muti wa mulivera wa n'tsanga, mbubuluswa padamera iwe mbupfekererwa pa muti wa mulivera wa m'mudzi, pinthu pyakukhonda kucitika, ndiye tani kuna nthawi za penepo! Zinapfekererwa pontho pa muti ubodzi-bodzi.

²⁵Abale anga, ine nkhabe funa kuti imwe mukhale ninga anthu akukhonda dziwa pinthu ipi pyakubisala pya Mulungu, toera mukhonde nyerezera kuti ndimwe adziwisi. Kuuma ntima uku kung'ono kwabwera kuna mbumba ya Izarayeli, mpaka kufikira wakwana nsoka wa ale adakhonda kukhala madjuda atawirembo Mulungu.

²⁶Na tenepo, mbumba yonsene ya Izarayeli inapulumuswa, ninga mudalemberwa ipyo m'Bukhu ya Mulungu kuti: “Mpulumusi anabuluka ku Siyau, mbadza kabulusa kuipa konsene kwa dzindza ya Djakobo.

²⁷Ici ndi cibverano canga na iwo ndingadza kabulusa madawi awo.”

²⁸Pa Mphangwa Zadidi, iwo mbanyamalwa a Mulungu na thangwi yanu, mbwenye pakusankhulwa na Mulungu iwo ndi anyakufunika, na thangwi ya ambuya awo.

²⁹Thangwi Mulungu nkhabe kutipokosera miyoni idatipasa Iye peno kucemera kudaticita Iye.

³⁰Ninga imwe kale ene mukhakhonda kubvera Mulungu, mbwenye cincino mwatambira ntsisi zace na thangwi yakukhonda kubvera kwa madjuda,

³¹tenepambo, cincino iwo akhonda kubvera Mulungu toera abverwembo ntsisi, na thangwi ya ntsisi za Mulungu zidacita Iye kuna imwe.

³²Thangwi Mulungu aafungira onsene n'kati mwakukhonda kubvera kwawo, toera Iye apangize ntsisi zace kuna onsene.

³³Ho, lang'anani upfumi ukulu, wa udziwisi na ucenjeri wa Mulungu! Mbani anakwanisa kuchulula pinatonga Mulungu! Pontho mbani anadziwa njira zace!

³⁴“Ndi ani anadziwa ndzeru za Mbuya? Peno ndi ani anakwanisa kumulanga?”

³⁵“Mbani adatoma kumpasa cinthu, toera angamala abwezerwe?”

³⁶Thangwi pyonsene pyabuluka kuna Iye, pyacitwa na Iye, pontho pyonsene mphyace. Mbiri kuna Mulungu kwenda na kwenda! Ameni.