Read Cibverano Cipsa Cisena Aroma 13 Bible Online

Aroma 13 - Cibverano Cipsa Cisena bible

Aroma 13

¹Anthu onsene asatongwa kubvera utongi wa dziko. Thangwi nkhabe utongi udakhonda buluka kuna Mulungu. Utongi onsene uli pa dziko waikhwa na Mulungu.

²Na tenepo, ule anakhonda kubvera utongi, asakhonda kubvera pire pidaikhwa na Mulungu, pontho ale anacita penepi anadza kakoneswa.

³Thangwi atongi nkhabe funika kuti agopeke na ale anacita udidi, mbwenye na ale anacita kuipa. Kodi iwe usafuna kuti ukhonde kugopa atongi? Cita pyadidi, iwo anakusimba.

⁴Thangwi utongi ndi nyabasa wa Mulungu, toera udidi uoneke kuna iwe. Mbwenye iwe ungacita kuipa, khala mbugopa, thangwi mphambvu zakuthabusa zina utongi ndi zakulungama.[21] Utongi ndi nyabasa wa Mulungu, nyakutonga miseru toera kuthabusa ale anacita kuipa.

⁵Na tenepo, pisafunika kuti ife tibvere utongi. Si kugopera kuthabuswa basi tayu, mbwenye pontho manyerezero athu a muntima, asatipanga kuti tiabvere.

⁶Pontho ndi thangwi eneyo imwe musalipa misonkho, thangwi atongi asaphatira basa Mulungu ntsiku zonsene, mbakakamira kuphata basa eneyi.

⁷Alipeni onsene pire pinatongwa iwo kulipwa. Ngakhala ndi nsonkho, lipani nsonkho. Ngakhala ndi nsonkho-nsonkho, citani nsonkho-nsonkho. Ngakhala ndi kugopa, agopeni. Ngakhala ndi kulemedza, alemedzeni.

⁸Lekani kukhala na mangawa na munthu. Mangawa anafuna khala na imwe mbakufunana m'bodzi na m'bodzi. Thangwi ule anafuna ndzace, asalemedza Mwambo.

⁹Thangwi matongero analonga kuti: “Leka kucita upombo,” “Leka kupha munthu,” “Leka kuba,” “Leka sirira,” pontho na matongero anango, onsene asalongera ncigwagwa kuti: “Funa ndzako ninga iwe ene. ”

¹⁰Anafuna ndzace nkhabe kuncitira kuipa. Na tenepo, kufunana ndiko kumalisira kwa mwambo.

¹¹Citani penepi mbamudziwa n'dzidzi una ife. Wafika n'dzidzi wanu wa kulamuka n'citulo, thangwi cincino upulumuki wathu uli dhuzi kakamwe kupiringana ntsiku idatawira ife Yezu.

¹²Masiku ali kumala, kunja kuli kuca. Na tenepo, mbatisiyeni mabasa a n'cidima, tikwate piphano pya cieza.

¹³Mbatifambeni na makhaliro adidi, ninga anthu anafamba na masikati, mbatisiya kuledzera na maphwandu akunyanyasa, lukwali, pyakupasa manyadzo, kucita nthonga, na bibvu.

¹⁴Mbwenye bvalani Mbuya Yezu Kirixtu. Lekani kukhala mbamunyerezera kucita pinafuna nyama.