Read Cibverano Cipsa Cisena Aroma 16 Bible Online

Aroma 16 - Cibverano Cipsa Cisena bible

Aroma 16

¹Ndisakutumirani mwana-nkazi wathu Febhe, nyabasa wa abale a gereja ya ku nzinda wa Senkereya,

²muntambire mwadidi mu dzina ya Mbuya ninga munatambirwa mbumba ya Mulungu, pontho m'phedzeni na pyonsene pinadza kafuna iye kwa imwe, thangwi asaphedza anthu azinji, na ine ene.

³Munandiwangisira Pirisila na mamuna wace Akila, anyabasa andzanga muna Kirixtu Yezu.

⁴Iwo hadagopa kuphiwa na thangwi yanga tayu. Ndisapereka takhuta kuna iwo. Sine basi anapereka takhuta tayu, mbwenye na abale onsene a magereja, adakhonda kukhala madjuda.

⁵Munawangisambo abale a gereja anakhala mbagumanyikana pa nyumba pawo. Mbaende kawange Epinetu, m'bale wanga wakufunika wakutoma kutawira Kirixtu mu dziko ya Azya.

⁶Mbaende kawange Mariya, adakuphatirani basa ikulu.

⁷Mbawange Andoroniku na mwana-nkazi wathu Djuniya, andzanga akhakhala na ine pabodzi n'kaidi, a dzindza yanga, anthu akusankhulika pakati pa apoxtolo. Ine mbandidzati kutawira Kirixtu, iwo akhadantawira kale ene.

⁸Mbaende kawange Ampilyatu, m'bale wanga wakufunika muna Mbuya.

⁹Mbawange Urubhanu, nyabasa ndzathu muna Kirixtu, pabodzi na Xitaki m'bale wanga wakufunika.

¹⁰Mbawange Apelesi, adatawirirwa muna Kirixtu. Wangisanimbo anthu a pa nyumba ya Arixitobhulu.

¹¹Mbawange Herodhiyau, wa dzindza yanga. Mbawange anthu ali muna Mbuya pa nyumba ya Narisizu.

¹²Wangisanimbo Tirifena na Tirifoza, akazi anaphata basa ikulu kuna Mbuya. Wangisani mwana-nkazi wathu wakufunika Perisidhe, adaphata basa ikulu kuna Mbuya.

¹³Mbaende kawange Rufu, mamuna adasankhulwa muna Mbuya, na mai wace adakhala ninga ndi mai wangambo.

¹⁴Mbawange Ansikiritu, Felegonte, Erimesi, Patorobha, Erimasi na abale ali na iwo pabodzi.

¹⁵Mbaende kawange Filologu, Djulya, Nereu na m'bale wace wa nkazi, pontho pabodzi na Olimpa, na mbumba ya Mulungu yonsene iri na iwo.

¹⁶Mwanyikanani m'bodzi na m'bodzi na mpsompsono wa ciubale. Magereja onsene a Kirixtu asakumwanyikani.

¹⁷Abale anga, ndisakuphembani kuti mucite mphole-mphole na ale anasaka kuti mugawane pontho mugwegweduke, mbapingiza cipfundzo cidatambira imwe. Enewa athaweni.

¹⁸Thangwi anthu enewa hali kuphatira basa Kirixtu Mbuya wathu tayu, mbwenye asaphatira mimba zawo basi. Na mafala awo akukoma na kutapira kwawo n'kanwa, asanyengerera anthu akufewa ntima.

¹⁹Anthu onsene asakubvani mbamulongwa na thangwi ya kubvera kwanu. Na thangwi eneyo, ndatsandzaya pikulu kakamwe. Mbwenye ndisafuna kuti mukhale anyakudziwisa pa pire pyadidi, mbamusowa ndzeru pa pire pyakuipa.

²⁰Cincino pano, Mulungu wa ntendere anadza kanting'inda Sathani pantsi pa myendo yanu. Kukoma ntima kwa Mbuya wathu Yezu, mbakukhale na imwe.

²¹Timoti, ndzanga wa pabasa, pabodzi na Lusyo, Djasoni na Sosipateri, a dzindza yanga, asakumwanyikani.

²²Ine Terisyo adalemba tsamba iyi, ndisakumwanyikani imwe muna Mbuya.

²³Asakumwanyikani Gayo, panafikira ine, na nsoka onsene wa anyakutawira Yezu. Eraxtu, nyabasa wakukoya kobiri ya mu nzinda, pabodzi na m'bale wathu Kwartu, asakumwanyikani monsene.

²⁴[Kukoma ntima kwa Mbuya wathu Yezu Kirixtu, mbakukhale na imwe monsene. Ameni.[25]]

²⁵Ndi Mulungu, ule anakwanisa kukukhalisani dzololo kakamwe pa kukhulupira, ninga Mphangwa Zadidi zidakupangani ine pontho na fala ya Yezu Kirixtu, sawa-sawa ninga mudadziwiswa ife pinthu pyakubisala kale na kale.

²⁶Mbwenye cincino, pyapangizika mbipidziwiswa na maporofeta m'Bukhu ya Mulungu, pontho na thangwi ya kufuna kwa Mulungu wa kwenda na kwenda, fala eneyi yakubisala yalongwa kuna madzindza onsene, toera afike pakum'bvera na pakun'khulupira.

²⁷Ande, Mulungu ekha basi wa udziwisi, mbapaswe mbiri ya kwenda na kwenda, kubulukira muna Yezu Kirixtu. Ameni.