Read Cibverano Cipsa Cisena Aroma 4 Bible Online

Aroma 4 - Cibverano Cipsa Cisena bible

Aroma 4

¹Na tenepo, tinalonga kuti baba wathu wa pa nyama Abharaamu akwanisanji?

²Ngakhala Mulungu alungamisa Abharaamu na mabasa, iye anakwanisa kugaya, mbwenye si pamaso pa Mulungu tayu.

³Apo Bukhu ya Mulungu isalonganji? “Abharaamu akhulupira Mulungu, penepi pyancita kuti iye akhale wakulungama.”

⁴Lang'anani, kobiri inatambiriswa nyabasa si ya kupaswa pezi tayu, mbwenye yakhala ninga mangawa.

⁵Mbwenye kuna ule anakhonda phata basa mbakhulupira Mulungu analungamisa nyakudawa, na kukhulupira kwace, asatawirirwa ninga nyakulungama.

⁶Ndipyo pidalonga Dhavidhi, pa thangwi ya kutsandzaya kwa munthu anatawirirwa na Mulungu kulungama kwace kudakhonda kucitika na thangwi ya mabasa, mbalonga kuti:

⁷“Mbatsandzaye ale adalekererwa kudodomesa kwawo, mbafudzirwa madawi awo.

⁸Mbatsandzaye ule anakhonda kupaswa thangwi na Mbuya.”

⁹Kodi kutsandzaya kweneku kwadzera anyakusibza[5] basi, peno na alembo adakhonda kusibza? Tapilonga kale kuti pa thangwi ya Abharaamu, kukhulupira kwace kwacita kuti adziwikembo ninga wakulungama.

¹⁰Pyacitika tani penepi? Abharaamu mbadamala kusibza kale, peno mbadzati kusibza? Ndimo mwene, pyacitika mbadzati kusibza.

¹¹Abharaamu atambira kusibza, ninga cidzindikiro pontho ninga cidhindo cakulungama cikhakhala na iye pa kukhulupira kwace, mbadzati kusibza. Na tenepo, iye ndi baba wa onsene ale anatawira mbakhonda kusibza, toera atawirirwembo kulungama kwawo.

¹²Pontho ndiye m'bodzi ene baba wa anyakusibza. Si thangwi kukhala anyakusibza basi tayu, mbwenye asafambambo na njira ibodzi ene ya kukhulupira, idafamba na Abharaamu baba wathu, mbadzati kusibza.

¹³Si thangwi ya mwambo tayu, idacita kuti Abharaamu na dzindza yace apikirirwe kupaswa unthaka wa dziko, mbwenye ndi thangwi ya kulungama kudabulukira pa kukhulupira.

¹⁴Thangwi ngakhala anacinthu unthaka ndi ale basi anatoweza mwambo, kukhulupira nkhwapezi, pontho cipikiriro nkhabe basa.

¹⁵Thangwi mwambo usadzesa kuipirwa kwa Mulungu. Mbwenye panakhonda kukhala mwambo, nkhabepo kudodomesa mwambo.

¹⁶Na tenepo, cipikiriro cabulukira pa kukhulupira, toera cikhale sawa-sawa na kukoma ntima kwa Mulungu, pontho toera cikhale cakunyindirika kuna dzindza yonsene ya Abharaamu. Si thangwi ya kukhala mu mwambo basi tayu, mbwenye anacombo cikhulupiro ca Abharaamu, baba wa ife tonsene.

¹⁷Ninga pinalonga Bukhu ya Mulungu kuti: “Ine ndakuikha kuti ukhale baba wa madziko mazinji.” Iye ndi baba wathu pamaso pa Mulungu adatawira iye, Mulungu analamusa anyakufa, pontho adacita kuti pioneke pinthu pidakhonda kukhalapo, mbapikhala ninga piripo.

¹⁸Abharaamu atawira mbadikhira pinthu pikhakhonda iye kudikhira kuti pinacitika. Na tenepo, iye adza kakhala baba wa madziko mazinji ninga munalongera Bukhu ya Mulungu na thangwi yace kuti: “Dzindza yako inadza kainjipa tenepa.”

¹⁹Abharaamu akhadziwa kuti manungo ace akhadakalamba, mbakhathamangira pyaka dzana pyakubalwa. Pontho akhadziwa kuti Sara, nkazi wace, pyaka pyace pyakubala pikhadapita. Mbwenye iye hadamala mphambvu pa kukhulupira tayu.

²⁰Abharaamu pa cidumbiriro cidacitirwa iye na Mulungu, hadapenula na kukhonda kukhulupira tayu. Mbwenye na cikhulupiro cace, adzala na mphambvu mbapasa mbiri Mulungu.

²¹Thangwi iye akhanyindira pikulu kakamwe kuti, Mulungu ana mphambvu za kucita pyonsene pidan'dumbirira Iye.

²²Na thangwi ya kukhulupira kwace, iye atawirirwa na Mulungu ninga wakulungama.

²³Mafala awa analonga kuti “iye atawirirwa’’ hadalemberwa na thangwi ya Abharaamu basi tayu.

²⁴Mbwenye asalongerambo ife anafuna kudza katawirirwambo. Ife adatawira Mulungu adalamusa pa kufa Yezu Mbuya wathu.

²⁵Yezu unowu, adaperekwa mbaphiwa na thangwi ya kudawa kwathu, pontho mbalamuswa pa kufa toera tikhale akulungama.