Read Cibverano Cipsa Cisena 1 Akorintu 15 Bible Online

1 Akorintu 15 - Cibverano Cipsa Cisena bible

1 Akorintu 15

¹Abale, ndisafuna ndikukumbuseni Mphangwa Zadidi zidakupangani ine. Mphangwa zenezi ndizo zidatambira imwe, pontho ndi mwenemu munalimirira imwe.

²Na Mphangwa izi Zadidi, imwe mwapulumuswa, male mungaikoya mwadidi fala eneyo ninga mudakupangirani ine. Mungakhonda kucita penepyo, mwatawira pa pezi.

³Thangwi pire pidakupangani ine pakutoma, ndipyo pidatambirambo ine kuti: Kirixtu afera madawi athu, ninga munalongera Bukhu ya Mulungu.

⁴Ayikhwa n'nthumbi, ntsiku ya citatu mbalamuswa pa kufa, ninga mudalongera Bukhu ya Mulungu.

⁵Iye aonekera kuna Pedhru, pakumala mbaonekerambo kuna Apoxtolo khumi na awiri.

⁶Buluka penepo, aonekera kuna abale akupiringana madzana maxanu pa n'dzidzi ubodzi ene. Azinji awo ali m'maso, mbwenye anango amala kufa.[17]

⁷Buluka penepo, aonekera kuna Tiyago na kuna apoxtolo onsene.

⁸Pakumalisira aonekerambo kuna ine, ninga ine ndine mwana wakubaliwa ntsiku zanga mbazidzati kukwana.

⁹Ndimo mwene, ine ndine mwana kakamwe pa apoxtolo, pontho nkhabe kukwanira na pang'ono pene kuti ndicemerwe mpoxtolo, thangwi ndazonda abale a gereja ya Mulungu.

¹⁰Mbwenye na thangwi ya kukoma ntima kwa Mulungu, cincino ndiri ninga munandionera imwe. Pontho, kukoma ntima kudandipasa Iye si kwa pezi tayu. Mbwenye ndaphata basa ikulu kakamwe kupiringana iwo onsene. Mphapo sine tayu, ndi kukoma ntima kwa Mulungu kuli na ine.

¹¹Na tenepo, peno ine, peno iwo, penepi ndipyo pinamwaza ife, pontho ndi penepi pidatawira imwe.

¹²Lang'anani, ngakhala mphangwa ziri kumwazwa kuti Kirixtu alamuswa pa kufa, asalongeranji andzanu anango kuti nkhabepo kulamuka kwa anyakufa?

¹³Ngakhala nkhabepo kulamuka kwa anyakufa, Kirixtu hadalamuswambo pa kufa tayu.

¹⁴Pontho ngakhala Kirixtu hadalamuswa pa kufa tayu, na tenepo pinamwaza ife mphyapezi, pontho cikhulupiro canumbo nchapezi.

¹⁵Pontho tenepa, tinaoniwa ninga ndife amboni authambi a Mulungu. Thangwi talonga umboni wa uthambi kuna Mulungu kuti Iye alamusa Kirixtu pa kufa. Mbwenye ngakhala ndimodi kuti anyakufa nkhabe kulamuswa, Mulungu hadalamusambo Kirixtu pa kufa tayu.

¹⁶Thangwi anyakufa ngakhala nkhabe kulamuswa, na Kirixtu ene hadalamuswambo pa kufa tayu.

¹⁷Apo ngakhala Kirixtu hadalamuswa tayu pa kufa, kukhulupira kwanu nkhwapezi, pontho madawi anu muciri na iwo.

¹⁸Na tenepo, ale adagona muna Kirixtu amala kutaikambo.

¹⁹Ngakhala cidikhiro cathu muna Kirixtu ndi ca makhaliro a dziko ino basi, ndife acherengi kupiringana anthu onsene.

²⁰Mbwenye ndimo mwene, Kirixtu alamukadi pa kufa. Iye ndiye wakutoma kulamuka pakati pa anyakufa.[18]

²¹Thangwi kufa kwabwera na mamuna m'bodzi, kulamuka pa kufa kwabwerambo na mamuna m'bodzi.

²²Thangwi sawa-sawa ninga muna Adhamu onsene asafa, tenepambo muna Kirixtu onsene anati apulumuswe.

²³Mbwenye m'bodzi na m'bodzi pa n'dzidzi wace: Kirixtu ndiye wakutoma. Buluka penepo, pakubwera kwace, analamukambo ale ace.

²⁴Buluka penepo, zinati zifike ntsiku zakumalisa, Iye angapereka Umambo kuna Mulungu Baba, pakumala kufudza umambo onsene, utongi na mphambvu zonsene.

²⁵Thangwi pisafunika kuti Iye atonge mpaka kufikira kuti anyamalwa ace onsene aikhwa pantsi pa manyalo ace.

²⁶Nyamalwa wakumalisira kufubza ndi kufa.

²⁷Thangwi Iye “aikha pyonsene pantsi pa manyalo ace.” Mbwenye pa kulonga kuti “pyonsene’’ piri pantsi pace, dziwani kuti penepi sikulongera na Mulungu ene tayu, ule adacita kuti pyonsene pikhale pantsi pa Kirixtu.

²⁸Mbwenye pyonsene pingadza kakhala pantsi pace, na tenepo Iye ene Mwana, anadza kakhalambo pantsi pa ule adacita kuti pinthu pyonsene pikhale pantsi pa Mwana, toera Mulungu akhale pyonsene muna onsene.

²⁹Ngakhala nkhabepo kulamuka pa kufa, anadza kacitanji ale anatambirira batixmu anyakufa? Ngakhala anyakufa nkhabe kulamukadi pa kufa, thangwi yanji iwo asaatambirira batixmu?

³⁰Ifembo, thangwi yanji tisaperekeka mwa kugopsa pa midzidzi yonsene?

³¹Abale, ntsiku zonsene ndisamenyana na kufa. Ndisadumbira na kugaya kunacita ine na thangwi yanu, muna Kirixtu Yezu, Mbuya wathu.

³²Ngakhala ndamenyana na pikala ku Efesu na mathangwi a anthu basi, ndawinanji na penepyo? Ngakhala anyakufa nkhabe kulamuka, “tendeni timwe pyathu mbatidya pyathu, thangwi mangwana tinafa.”

³³Lekani kunyengezwa. “Kufamba na anthu a kuipa kusafudza makhaliro adidi.”

³⁴Ninga anthu akulungama, tomani pontho kunyerezera mwadidi, pontho siyani kudawa. Thangwi alipo anango anakhonda kudziwa Mulungu. Ndisalonga penepi toera mukhale na manyadzo.

³⁵Mbwenye unango anati abvundze kuti: “Kodi anyakufa analamuka tani? Pontho analamuka na manungo a khaindi yanji?”

³⁶Iwe dzemwa! Pinabzala iwe nkhabe mera pingakhonda kufa.

³⁷Pontho iwe ungabzala, nkhabe bzala manungo anafuna kudza kamera, mbwenye ndi mbeu ibodzi basi ninga ya tirigu, peno mbeu inango.

³⁸Mbwenye Mulungu asaipasa manungo ninga mudapitongera Iye, pontho pa mbeu ibodzi na ibodzi manungo ace akunkwanira.

³⁹Nyama zonsene si sawa-sawa tayu. Anthu ana khaindi yawo ya nyama, pinyama pina khaindi yawo, mbalame zina khaindi yawo, pontho nyama za m'madzi zina khaindi yawombo ya nyama.

⁴⁰Alipo manungo a kudzulu, alipombo manungo a pantsi pano. Mbwenye kuyetimira kwa manungo a kudzulu ndi kunango, kuyetimira kwa manungo a pantsi pano ndi kunangombo.

⁴¹Kulipo kuyetimira kwa dzuwa, kulipo kuyetimira kwa mwezi, kulipo kuyetimira kwa nyenyezi. Pontho pakati pa nyenyezi zonsene, zisasyana pakuyetimira kwazo ibodzi na ibodzi.

⁴²Ndi tenepa pinadza kacitika pa kulamuka kwa anyakufa. Manungo anabzaliwa asabvunda, mbwenye analamuka mbakukhonda kubvunda.

⁴³Asabzaliwa akupwazika, mbalamuka a mbiri. Asabzaliwa akusoweka mphambvu, mbalamuka a mphambvu.

⁴⁴Asabzaliwa manungo akubalwa na iwo, mbalamuka a nzimu. Ngakhala alipo manungo akubalwa na iwo, alipombo manungo a nzimu.

⁴⁵Na tenepo, pyalembwa kuti: “Mamuna wakutoma, Adhamu, acitwa munthu wa m'maso,” Adhamu wakumalisa acitwa nzimu wakupulumusa.

⁴⁶Pidatoma si pya nzimu tayu, mbwenye ndi pya manungo akubalwa na iwo. Pya nzimu mbipimalisira.

⁴⁷Mamuna wakutoma acitwa na mataka, ndi wa pantsi pano. Mamuna waciwiri ndi wa kudzulu.

⁴⁸Ale a pantsi pano, alandana na mamuna wa pantsi pano. Ale a kudzulu, alandana na mamuna wa kudzulu.

⁴⁹Ninga ife talandana na mamuna wa pantsi pano, tinadza kalandanambo[19] na mamuna wa kudzulu.

⁵⁰Abale, ndisakupangani kuti nyama na ciropa nkhabe kukwanisa kutambira unthaka wa Mulungu. Pontho pinthu pinabvunda, nkhabe kukwanisa kutambira unthaka wa pinthu pyakukhonda kubvunda.

⁵¹Bvani pyakubisala pinafuna ine kukupangani: Si tonsene tayu anafuna kudza kafa, mbwenye tonsene tinadza kaphinduka,

⁵²pa n'dzidzi ubodzi ene, pakuphoira kwa diso, pa kulizwa kwa kaluta yakumalisa. Thangwi kaluta inati ilire, anyakufa analamuka na manungo akukhonda kubvunda, pontho ife tinaphinduka.

⁵³Thangwi pisafunika kuti cire cinabvunda cibvazikwe cakukhonda kubvunda. Pontho cire cinafa cibvazikwe cakukhonda kufa.

⁵⁴Pontho cakubvunda cingabvala cinthu cakukhonda kubvunda, peno cinafa cingabvala cinthu cakukhonda kufa, inasimbiswa fala idalembwa kuti: “Kufa kwamezwa na kuwina.”

⁵⁵“Iwe kufa, kukunda kwako kuli kupi? Iwe kufa, mphambvu zako ziri kupi?”

⁵⁶Mphambvu za kufa ndi kudawa. Anapasa mphambvu za madawi ndi Mwambo.

⁵⁷Tisapereka takhuta kuna Mulungu, adatipasa kukunda kubulukira muna Mbuya wathu Yezu Kirixtu.

⁵⁸Na tenepo, abale anga akufunika, khalani dzololo, lekani kuzunguzwa, mudzale na kutaikira pa mabasa a Mbuya, thangwi imwe musadziwa kuti muna Mbuya, basa yanu si ya pezi tayu.