Read Cibverano Cipsa Cisena 1 Akorintu 6 Bible Online

1 Akorintu 6 - Cibverano Cipsa Cisena bible

1 Akorintu 6

¹Ngakhala m'bodzi wa pa nsoka wanu ana nseru na m'bale unango, musaukwatiranji nseru unowu mbamuenda na iwo katongwa kuna anthu anakhonda kudziwa Mulungu, mbumukhonda kuukwata kwenda na iwo kuna mbumba ya Mulungu?

²Imwe nkhabe dziwa kuti mbumba ya Mulungu inadza katonga dziko? Mphapo ngakhala imwe munadza katonga dziko, munacimwana tani kutonga pinthu ping'ono?

³Imwe nkhabe dziwa kuti ife tinadza katonga maanju? Ndiye tani mphapo pinthu pya dziko ino!

⁴Na tenepo, ngakhala imwe muna nseru wa kutongesana thangwi pinthu pyanu pya dziko ino, sankhulani abale a gereja, peno mbadakhala pyawo anthu akukhonda kubvekera, kuti akhale anyakutonga miseru.

⁵Ndisalonga penepi toera kukunyadzisani. Kodi nkhabepo pakati panu m'bodzi wa ndzeru zakukwanira, kuti akwanise kutonga miseru muubale mwanu?

⁶Mbwenye musasiya penepi mbumwenda kasumirana muubale mwanu patsogolo pa anthu anakhonda kudziwa Mulungu!

⁷Na thangwi ya kusumirana kunaoneka pakati panu, pisapangiziratu kuti mwakundiwa mwadidi mwene. Mwakhonderanji kutawira kunyengezwa pyanu? Mwakhonderanji kutawira kuluza pyanu?

⁸Mbwenye imwe ene, musacita pyakuipa mbumunyengezana muubale mwanu!

⁹Imwe nkhabe dziwa kuti anyakukhonda kulungama nkhabe kudza kadya unthaka mu Umambo wa Mulungu? Lekani kunyengezwa. Ale anyalukwali, analambira alungu a pezi, anyaupombo, amuna anacita banja na amuna andzawo,

¹⁰mambava, anyakuumirwa na kobiri, anyakuledzera, anyapseda na ale anadhobha andzawo, nkhabe kudza kadya unthaka mu Umambo wa Mulungu.

¹¹Ndi penepi pikhacita andzanu anango. Mbwenye imwe mwatsukiwa, mwaceneswa, mbumulungamiswa, mu dzina ya Mbuya Yezu Kirixtu, na mu Nzimu Wakucena wathu.

¹²“Pinthu pyonsene ndatawirirwa kupicita.” Mbwenye si pyonsene pinaphedzera tayu. “Pinthu pyonsene ndatawirirwa kupicita.” Mbwenye ine nkhabe siya cibodzi kuti cindikunde.

¹³“Pyakudya pyacitirwa cifu, cifu cacitirwa pyakudya,” mbwenye pyonsene Mulungu anadza kapifudza. Mphapo manungo athu si toera kucita na iwo pyalukwali tayu, mbwenye ndi toera kuphatira Mbuya, pontho Mbuya ndiye mwanaciro manungo athu.

¹⁴Na mphambvu zace, Mulungu alamusa Mbuya pa kufa, pontho Iye anadza katilamusambo pa kufa.

¹⁵Imwe nkhabe kupidziwa kuti manungo anu ndi mapindi a Kirixtu? Ine ndinakwata mapindi a Kirixtu mbandiacita kuti akhale mapindi a nkazi wa lukwali? Nkhabe citika!

¹⁶Imwe nkhabe kupidziwa kuti ule anadziwana na nkazi wa lukwali, manungo awo anakhala mabodzi ene? Thangwi pyalembwa kuti: “Mu uwiri mwawo anadza kakhala nyama ibodzi.”

¹⁷Mbwenye ule anaphatana na Mbuya, nzimu wawo ndi ubodzi ene na Iye.

¹⁸Thawani pyalukwali. Kudawa kunango konsene kunacita munthu, asakucita kunja kwa manungo ace, mbwenye anacita pyalukwali, asadawisira manungo ace ene.

¹⁹Kodi imwe nkhabe kupidziwa kuti manungo anu ndi nyumba ya Nzimu Wakucena uli muna imwe, udapaswa imwe na Mulungu, pontho kuti imwe nkhabe tongereka mwekha?

²⁰Imwe mwaguliwa na ntengo ukulu. Na tenepo, pasani mbiri Mulungu m'manungo mwanu.[8]