Read Cibverano Cipsa Cisena 2 Akorintu 12 Bible Online

2 Akorintu 12 - Cibverano Cipsa Cisena bible

2 Akorintu 12

¹Pisafunika kuti ine ndithimize kupasika mbiri ndekha na penepi. Ndisadziwa kuti nkhabe kuwina cinthu na penepi, mbwenye ndinati ndilonge pinaoneswa ine na pinapangizwa ine na Mbuya.

²Pyapita pyaka khumi na pinai, mudadziwa ine mamuna m'bodzi muna Kirixtu, adakwatiwa mpaka ku thambo yacitatu. Ngakhala aenda na manungo ene peno mu nzimu, ine nkhabe kupidziwa, Mulungu ndiye anan'dziwa.

³Pontho ndisadziwa kuti mamuna unowu, ngakhala aenda na manungo ene peno mu nzimu, ine nkhabe kupidziwa, mbwenye Mulungu ndiye anan'dziwa.

⁴Akwatiwa kwenda m'paraizu[6] mbabva pinthu pyakukhonda kulongeka, pinthu pya kuti munthu nkhabe tawirirwa kupilonga.

⁵Mamuna unowu ndisagaya na iye, mbwenye ine ndekha nkhabe kugaya, ndinagaya na thangwi ya kupolola kwanga basi.

⁶Mbidafuna kugaya mbidakhala dzemwa tayu, thangwi mbidalonga pya ndimo mwene. Mbwenye ine nkhabe funa kucita penepi, toera akhonde kuoneka munthu wakunyerezera ine, kupiringana pinaona iwo na pinabva iwo kwa ine.

⁷Toera ine ndikhonde kupikuza na thangwi ya kupangizwa kweneku kwa mu Nzimu, ndaikhwa munga m'manungo mwanga, ninga mwanankati m'bodzi wa Sathani kuti undithabuse, toera ndikhonde kupikuza.

⁸Ndaphemba katatu kuna Mbuya kuti andibulusire nyatwa eneyo.

⁹Mbwenye Mbuya andipanga tenepa: “Kukoma ntima kwanga wakwana nako, thangwi mphambvu zanga zisapangizika mwakukwana pa kupolola.” Na tenepo, ine ndinapasika mbiri na kutsandzaya konsene pa kupolola kwanga, toera mphambvu za Kirixtu zikhale muna ine.

¹⁰Na thangwi eneyo, ndisatsandzaya na kupolola, na kutikanwa, na kusowa, na kuzondiwa, pontho na nyatwa zidaona ine na thangwi ya Kirixtu. Thangwi ndingapolola, ndi munawanga ine.

¹¹Ine ndakhala ninga dzemwa, mbwenye ndimwe adandikakamiza penepi. Imwe ndimwe mukhatongwa kundisimba, thangwi ine sine mwana tayu kwa apoxtolo enewa analongwa kuti ndi “akulu-akulu,” mbandidziwa pyanga kuti ine sine cinthu.

¹²Pinthu pinapangisa basa ya upoxtolo wanga, ninga pidzindikiro, pinthu pyakudzumisa, na pirengo, pyapangizika pakati panu na kupirira kukulu.

¹³Ndi canji cidakupwazisani kupita magereja anango, mbindikhonda kulonga pyanga na thangwi yakukhonda kukulemerani? Ndilekerereni kudodomeka kwanga!

¹⁴Cincino ndamala kusasanyira kuti ndibwere kudza kakuonani pontho kacitatu, pontho sinabwera kudza kakulemerani tayu. Thangwi pinafuna ine si pinthu pyanu tayu, mbwenye ndisafuna imwe. Pontho, ana nkhabe kugumanya mpfuma gumanyira ababa awo, mbwenye ababa ndiwo anagumanya mpfuma gumanyira ana awo.

¹⁵Na tenepo, ndinabvunga pyonsene pina ine na ine ene na ntima wanga onsene, na thangwi ya kukufunani. Ngakhala ine ndisakufunani pikulu kakamwe, ine ndinafuniwa pang'ono?

¹⁶Ndimo mwene, ine sidakulemerani tayu. Mbwenye ine ninga nyakucenjera, ndakumangani na ucenjeri wanga.

¹⁷Kodi ine ndakudyerani pinthu pyanu na munthu adakutumirani ine kweneku?

¹⁸Ndatuma Titu kuti adze kakuoneni, mbaperekerwa na m'bale unango. Nkhulongera kuti akudyerani pinthu pyanu? Tidapicita na nzimu ubodzi ene, pontho mbatifamba na njira ibodzi ene tayu?

¹⁹Imwe musanyerezera kuti pa n'dzidzi unowu onsene ife tiri kusaka kubvunulirika patsogolo panu? Tisalonga patsogolo pa Mulungu ninga anthu ali muna Kirixtu, pontho pyonsene pinacita ife, abale anyakufunika, ndi toera kukupasani mphambvu.

²⁰Thangwi ndisagopa kuti, ndingadza kakuonani, ndikhonde kukugumanani ninga mukhadikhira ine, pontho imwe mukhondembo kundigumana ninga mukhadikhira imwe. Ndisagopa kuti pakati panu paoneke nthonga, mabibvu, kuipirwa, kupambulana, kulongerana pyakuipa, mapseda, kupikuza, na kukhonda kubverana.

²¹Ndisagopa kuti ndingadza kakuonani pontho, Mulungu wanga anandicepesa patsogolo panu, pontho ine mbindilira na thangwi ya azinji adadawa kale ene mbakhonda kuchunyuka kucita pyakunyanyasa pyawo, lukwali na kuzuda kukhacita iwo.