Read Cibverano Cipsa Cisena 2 Akorintu 13 Bible Online

2 Akorintu 13 - Cibverano Cipsa Cisena bible

2 Akorintu 13

¹Uyu ndi ulendo wanga wacitatu unadza ine kakuonani. “Pinthu pyonsene pisafunika pitawirirwe na amboni awiri peno atatu.”

²Ndakucenjezani kale pikhali ine kaciwiri pabodzi na imwe. Cincino, mbindiri kutali, ndisalembera ale akhadawa kale pontho na kuna anango kuti: Ndingabwerera, sinakubveranibve ntsisi tayu,

³thangwi imwe musasaka cidzindikiro cinapangisa kuti Kirixtu asalonga muna ine. Iye si wakusowa mphambvu kuna imwe tayu, mbwenye ndi wa mphambvu pakati panu.

⁴Thangwi ndimo mwene, Iye akhomerwa pa ntanda na kusowa mphambvu, mbwenye ali m'maso na mphambvu za Mulungu. Sawa-sawa na ifembo, ndife akusowa mphambvu muna Iye, mbwenye tinakhala m'maso na Iye kuna imwe na mphambvu za Mulungu.

⁵Lang'anisikani mwekha ene makhaliro anu muone ngakhala muli pakukhulupiradi. Bvundzikani mwekha. Nkhabe dziwa kuti Yezu Kirixtu ali muna imwe? Peno panango musapidziwa kale kuti mwadodomeka!

⁶Ndisadikhira kuti imwe munadziwa kuti ife tidadodomeka tayu.

⁷Cincino, tiri kuphembera kuna Mulungu toera imwe mukhonde kucita cibodzi cakuipa. Si toera anango aone kuti ife tapikwanisa tayu, mbwenye toera imwe mucite pyadidi, ife mbitioniwa pyathu ninga tadodomeka.

⁸Thangwi ife nkhabe kwanisa kupokanya pya ndimo mwene, mbwenye tinakwanisa kutawirira pya ndimo mwene basi.

⁹Tisakhala akutsandzaya midzidzi yonsene inamala ife mphambvu, imwe mbamukhala akuwanga. Maphembero athu mba kuti imwe mukule mu nzimu.

¹⁰Na thangwi eneyi, ndakulemberani pinthu ipi mbindiri kutali, toera kuti ine ndingabwera, pikhonde kufunika kuti ine ndinyanye kucita mphambvu za utongi zidapaswa ine na Mbuya kuti zikuwangiseni mu nzimu, mbizikhonda kukhala za kukufudzani.

¹¹Nkhabe pinango abale anga, tsandzayani! Kulani mu nzimu, matamizanani, khalani na manyerezero mabodzi ene, khalani mu ntendere. Mulungu wa kufunana na wa ntendere anakhala na imwe.

¹²Mwanyikanani m'bodzi na m'bodzi na mpsompsono wa ciubale. Mbumba yonsene ya Mulungu isakumwanyikani.

¹³Kukoma ntima kwa Mbuya Yezu Kirixtu, na kufuna kwa Mulungu, pontho na kuphatana kwa Nzimu Wakucena, mbapikhale na imwe monsene.[7]