Read Cibverano Cipsa Cisena 2 Akorintu 6 Bible Online

2 Akorintu 6 - Cibverano Cipsa Cisena bible

2 Akorintu 6

¹Ninga anyakuphedzera basa ya Mulungu, tinathimiza pontho na kukupangani toera mukhonde kutambira papezi kukoma ntima kwa Mulungu.

²Thangwi Mulungu alonga tenepa: “Ine ndakubva pa n'dzidzi wadidi, pontho ndakuphedza pa ntsiku ya kupulumuswa.” Lang'anani, cincino ndiwo n'dzidzi wadidi, cincino ndiyo ntsiku ya kupulumuswa!

³Ife nkhabe cita kuti munthu apite mwakudodomeka pa cinthu cibodzi, gopesera kuti basa yathu ikhonde kupwazika.

⁴Mbwenye ife ninga anyabasa a Mulungu, tisapangizika pa pyonsene, ninga: kupirira kukulu, pa nyatwa, pa kuthabuka na pakutsukwala,

⁵pa kukwapulwa, pa kupitiswa n'kaidi na kucitirwa cikuti, pa mabasa akuwanga, pa kukhonda kugona na masiku, na kupimana cakudya,

⁶pa kucena ntima, pa kudziwa, pa kupirira kwa kulekerera, pa udidi, pa Nzimu Wakucena, na pa kufunana kwa ndimo mwene,

⁷pa fala ya ndimo mwene, pontho na pa mphambvu za Mulungu, na pida pyakulungama, nkono wa bzere peno nkono wa madyo,[3]

⁸pa kulemebza na pa kupwaziwa, pa kulongwa kuipa na pa kusimbwa, mbiticemerwa anyauthambi mbatiri anthu a ndimo mwene.

⁹Ninga anthu akukhonda kudziwika, mbatiri anthu ene akudziwika, ninga tiri kufa, mbwenye tiri m'maso! Tiri kumenyiwa mbwenye nkhabe kufa.

¹⁰Tisakhala ninga tatsukwala, mbwenye kutsandzaya tinako basi, ninga anyakucherenga, mbwenye tisapfumisa anango azinji, ninga nkhabe cinthu, mbwenye tinapyo pyonsene.

¹¹Tisalonga pakweca na imwe abale a ku Korintu, mbatikufungulirani mitima yathu yonsene.

¹²Ife tidakufungirani mitima yathu tayu, mbwenye imwe ndimwe mudatifungira.

¹³Ndisalonga na imwe ninga ananga, kuti citani pibodzi-bodzi pidakucitirani ife, mbamufungulambo mitima yanu kuna ife.

¹⁴Lekani kumangirirwa pa golopingo ibodzi ene na anyakukhonda kutawira Yezu. Thangwi ndi ninji cinaphataniza pyakulungama na pyakuipa? Peno pisakwanisika kuti cieza cibverane na cidima?

¹⁵Uxamwali wanji una Kirixtu na Bheliyali?[4] Ndi ninji cinaphataniza nyakutawira Yezu, na nyakukhonda kutawira?

¹⁶Ndi cibverano canji cina Nyumba ya Mulungu na ya madzimunthu? Thangwi ife ndife Nyumba ya Mulungu wa m'maso, ninga mudalongera Mulungu kuti: “Ndinakhala na iwo, mbandifamba pakati pawo. Ine ndinakhala Mulungu wawo, iwo anakhala mbumba yanga.”

¹⁷Na tenepo, “bulukani pakati pawo, pontho mumwazane na iwo,” alonga Mbuya. “Lekani kugwedza pinthu pyakukhonda kuceneswa, na tenepo, Ine ndinadza kakutambirani.”

¹⁸“Pontho Ine ndinakhala Baba wanu, imwe munakhala ana anga aamuna na aakazi,” alonga Mbuya wa mphambvu zonsene.