Read Cibverano Cipsa Cisena Agalata 4 Bible Online

Agalata 4 - Cibverano Cipsa Cisena bible

Agalata 4

¹Ndisakupangani kuti mwanacinthu unthaka mbali mwana, nkhabe kusyana na n'dzakazi wace, iye mbali mwanacinthu pinthu pyonsene.

²Mbwenye iye asabvera ale ananfuya na anaonerera mpfuma yace, mpaka kufikira n'dzidzi udalongwa na baba wace.

³Na tenepo ifembo, pikhali ife ana ang'ono, tikhacitwa adzakazi a mitemo yakutoma ya dziko.

⁴Mbwenye pidafika iwo n'dzidzi wace, Mulungu atuma Mwana wace, adabalwa na nkazi pontho adabalwa pantsi pa Mwambo,

⁵toera kuombola ale akhali pantsi pa Mwambo, kuti tikwanise kucitika ana a Mulungu.

⁶Pontho, thangwi yakukhala ana, Mulungu atuma Nzimu wa Mwana wace m'mitima mwathu, iwo usakhuwa mbulonga kuti: “Abha[8]” Baba.

⁷Na tenepo, iwe siwe n'dzakazibve tayu, mbwenye ndiwe mwana. Apo na thangwi yakukhala mwana, Mulungu akucitambo kuti ukhale nyaunthaka.

⁸Mbwenye kale ene imwe mbamudzati kun'dziwa Mulungu, mukhali adzakazi a alungu a pezi, a kuti si alungudi tayu.

⁹Mphapo cincino na kudziwa Mulungu, peno tilonge, na kudziwika na Iye, musabwerera tani pontho m'pipfundzo pyanu pyakufewa na pyakusowa mphambvu? Musafuna kucitiswa pontho udzakazi na iyo?

¹⁰Imwe musakoya mbamulemedza matongero a ntsiku, myezi, midzidzi na pyaka!

¹¹Ndisagopa kuti panango ndaphata basa pezi kuna imwe.

¹²Ine ndisaphemba na kudembetera kuna imwe abale anga, kuti mukhale ninga ine, thangwi ine ndakhalambo ninga imwe. Nkhabe cibodzi cidandidawisira imwe.

¹³Ninga musadziwa, ine ndakumwazirani Mphangwa Zadidi pakutoma, ndi thangwi ya utenda.

¹⁴Pakati pa nthenda ikhali na ine idakucitani kuti imwe muleserwe nayo, imwe hamudandipwaza peno kundikhonda tayu. Mbwenye mwanditambira ninga anju m'bodzi wa Mulungu, peno ninga Kirixtu Yezu ene.

¹⁵Kutsandzaya kwanu kwa kale kuli kupi? Ndisatawiradi kuti mbapidakwanisika, imwe mbamudabulusa maso anu toera mundipase.

¹⁶Ine ndadza kakhala nyamalwa wanu na thangwi ya kukupangani pya ndimo mwene?

¹⁷Ale anacita mphambvu zonsene toera akome kuna imwe, hali kupicita mwadidi tayu, mbwenye asafuna kuti imwe mukhonde kuphatana na ine, toera imwe mutsalakane iwo.

¹⁸Mphyadidi kutsalakana udidi midzidzi yonsene, mbamukhonda kupicita pamaso panga basi.

¹⁹Ananga, ndisabva pontho kupha na thangwi yanu ninga nkazi wakufuna kubala, mpaka kufikira mwakula muna Kirixtu.

²⁰Ine ndikhafuna kuti ndikhale pabodzi na imwe cincino, pontho mbandicinja malongero anga. Thangwi ine nkhabe kupidziwa pinafuna ine kucita na imwe.

²¹Imwe munafuna kukhala pantsi pa Mwambo ndipangeni cibodzi: Kodi imwe nkhabe kubva pinalonga Mwambo?

²²Thangwi pyalembwa kuti Abharaamu akhali na ana awiri aamuna. M'bodzi mai wace ndi bichu, unango mai wace ndi ntumbe.

²³Mwana wa bichu abalwa ninga anthu onsene, mbwenye mwana wa ntumbe abalwa na thangwi ya kupikirirwa.

²⁴Ipi pisalongera tenepa: Akazi awiri awa, asalongera pibverano piwiri. Cibverano cibodzi cisabuluka ku phiri ya Sinai, pontho cisabala ana toera kukhala mu udzakazi. Cibverano ceneco ndi Agari.

²⁵Agari asalongera phiri ya Sinai, ku dziko ya Arabhya, pontho ndi cidzindikiro ca nzinda wa cincino wa Djerusalema, uli mu udzakazi pabodzi pene na ana ace.

²⁶Mbwenye Djerusalema wa kudzulu ndi ntumbe, unowu ndiye mai wathu.

²⁷Thangwi pyalembwa kuti: “Tsandzaya pyako, iwe nkazi wakukhonda kubala, iwe kuti cipo udzati kubala mwana. Khuwa na kukomerwa, iwe kuti cipo udzati kubva kupha kwa kubala. Thangwi azinji ndi ana a nkazi wakukhondiwa kupiringana ana a ule nkazi ana mamuna wace.”

²⁸Mbwenye imwe[9] abale, ndimwe ana akupikirirwa ninga Izaki.

²⁹Ninga pa n'dzidzi unoule, mwana adabaliwa na mabaliro a anthu onsene akhazonda mwana adabaliwa na kufuna kwa Nzimu Wakucena, pibodzi-bodzi pisacitika cincino.

³⁰Mbwenye Bukhu ya Mulungu isalonganji? “Thamangisa bichu wankazi, na mwana wace ene. Thangwi mwana wa bichu, cipo anadza kadya unthaka pabodzi na mwana wa ntumbe.”

³¹Na tenepo, abale, ife sife ana a nkazi wa bichu tayu, mbwenye ndife ana a nkazi wa ntumbe.