Read Cibverano Cipsa Cisena Afilipi 1 Bible Online

Afilipi 1 - Cibverano Cipsa Cisena bible

Afilipi 1

¹Ine Paulu, na Timoti, adzakazi a Kirixtu[1] Yezu, ndisalembera mbumba yonsene ya Mulungu muna Kirixtu Yezu ali ku Filipi, pabodzi na atsogoleri na madhiyakoni.

²Kukoma ntima na ntendere unabulukira kuna Mulungu Baba wathu na kuna Mbuya Yezu Kirixtu, mbapikhale na imwe.

³Ndisapereka takhuta kuna Mulungu wanga midzidzi yonsene inakukumbukani ine.

⁴Midzidzi yonsene, pa miphembero yanga yonsene inacita ine kuna imwe, ndisaphembera na kukomerwa konsene,

⁵na thangwi ya kundiphedza kwanu pa Mphangwa Zadidi, kutomera ntsiku yakutoma mpaka cincino.

⁶Ine ndisatawira kuti Mulungu adatoma basa yadidi muna imwe, anati aimalisire mpaka Ntsiku ya Kirixtu Yezu.

⁷Mphyadidi kuti ine ndinyerezere tenepo pa thangwi yanu monsene, thangwi imwe muli n'kati mwa ntima wanga, peno pa kumangwa kwanga, peno pakubvunulira na pakulonga kwanga Mphangwa Zadidi, monsene muli pabodzi na ine pa kukoma ntima kwa Mulungu.

⁸Mulungu ndiye m'mboni wanga wa citsuwo cina ine kuna imwe monsene, na ntsisi zikulu zinabulukira muna Kirixtu Yezu.

⁹Maphembero anga ndi awa: Kuti kufunana kwanu kukule ntsiku na ntsiku pa kudziwa na pa ndzeru zakukwana,

¹⁰toera mukwanise kudzindikira pinthu pikulu kakamwe, kuti mukhale anthu akulungama na akusowa mathangwi akusandikwa na iwo Ntsiku ya Kirixtu,

¹¹mbamudzala na misapu yakulungama inabwera na Yezu Kirixtu, toera Mulungu asimbwe mbapaswa mbiri.

¹²Abale anga, dziwani kuti pire pidacitika kuna ine, pyaphedza pikulu kakamwe kuti basa ya Mphangwa Zadidi iyende kutsogolo.

¹³Na thangwi eneyo, pyonsene pyadziwika kuna anyakuonera onsene a nyumba ya mambo Sezari, na kuna onsene anango, kuti ine ndiri n'kaidi na thangwi ya Kirixtu.

¹⁴Pontho abale azinji, na kunyindira muna Mbuya pa thangwi ya kupitiswa kwanga n'kaidi, ali kumwaziratu kakamwe fala ya Mulungu[2] na cipapu consene mbakhonda kugopa.

¹⁵Ndimo mwene, anthu anango asapfundzisa pya Kirixtu na bibvu pontho na kuzondana, mbwenye anango asapicita na ntima wadidi.

¹⁶Awa anapicita na ntima wadidi asapicita na kufunana, thangwi asadziwa kuti ine ndiri muno toera kubvunulira Mphangwa Zadidi.

¹⁷Mbwenye ale anango asamwaza pya Kirixtu na mapika pontho na uthambi, mbakhanyerezera kuti anakwanisa kundisosera nyatwa mbandiri muno n'kaidi.

¹⁸Mbwenye penepi pinabasa yanji? Pinafunika ndi kuti na njira zakusiyana-siyana, peno mwa uthambi peno mwa ndimo mwene, Kirixtu ali kulongwa. Na thangwi eneyo, ine ndisakomerwa napyo. Ndimo mwene, ine ndinathimiza basi na kutsandzaya,

¹⁹thangwi ine ndisadziwa kuti pire pidacitika kuna ine pinati pindiombole na thangwi ya miphembero yanu, pontho na kuphedziwa na Nzimu wa Yezu Kirixtu.

²⁰Ndisadikhira na ntima onsene pontho mbanditawira kuti nkhabe cinthu cinafuna kudza kandipasa manyadzo. Mbwenye na cipapu canga consene cikhadza na ine, cincino Kirixtu anakuzwambo m'manungo mwanga, peno pa kukhala m'maso peno pa kufa.

²¹Thangwi kuna ine, kukhala m'maso ndi Kirixtu, kufa ndi kuwina.

²²Ndingathimiza kukhala m'maso, ndinati ndibale misapu pa basa yanga. Na tenepo, sinapidziwabve pinafuna ine kusankhula tayu.

²³Ndisanentseka na pinthu piwiri: Ndisafuna kwenda kakhala na Kirixtu, ndipyo pyadidi kakamwe kupiringana pyonsene,

²⁴mbwenye na thangwi yanu, pisafunika kakamwe kuti ine ndithimize kukhala m'maso.

²⁵Na kutawira penepi, ndisadziwa kuti ndinati ndikhale m'maso mbandithimiza kukhala na imwe monsene, toera mukule pontho mutsandzaye pa kukhulupira,

²⁶toera ndingabwera pontho kuna imwe, kutsandzaya kwanu muna Kirixtu Yezu kukuleretu kakamwe na thangwi yanga.

²⁷Pa pyonsene ipi, khalani na makhaliro adidi ninga munafunira Mphangwa Zadidi za Kirixtu, toera peno pakudza kwanga kakuonani, peno pakukhonda kukhala kwanga dhuzi na imwe, ndikubveni kuti muli dzololo na nzimu ubodzi basi ninga munthu m'bodzi basi, mbamugwa nkhondo pabodzi na thangwi ya cikhulupiro ca Mphangwa Zadidi,

²⁸pontho mbamukhonda kuthuswa na anyamalwa anu. Thangwi kuna iwo, ceneci ndi cidzindikiro ca kutaika, mbwenye kuna imwe ndi cidzindikiro ca upulumuki, pontho penepi pyabulukira kuna Mulungu.

²⁹Thangwi imwe mudapaswa udidi wa kukhulupira Kirixtu basi tayu, mbwenye wakuonambo nyatwa na thangwi yace,

³⁰thangwi muli kugwa nkhondo ibodzi ene idaona imwe kuna ine, pontho na cincino ene muli kuibva kuti ndiri kuigwa.