Read Cibverano Cipsa Cisena Akolosi 1 Bible Online

Akolosi 1 - Cibverano Cipsa Cisena bible

Akolosi 1

¹Ine Paulu, mpoxtolo wa Kirixtu[1] Yezu na kufuna kwa Mulungu, pabodzi na m'bale wanga Timoti.

²Ndisalembera imwe mbumba ya Mulungu pontho yakunyindirika muna Kirixtu iri mu nzinda wa Kolosi. Kukoma ntima na ntendere unabulukira kuna Mulungu Baba,[2] mbapikhale na imwe.

³Ntsiku zonsene tisapereka takhuta kuna Mulungu, Baba wa Mbuya wathu Yezu Kirixtu, tingakuphembererani,

⁴thangwi tisabva anthu mbalonga kukhulupira kunacita imwe muna Kirixtu Yezu, pontho na kufuna kunacita imwe mbumba ya Mulungu yonsene,

⁵na thangwi ya cidikhiro ca pire pidakoyerwa imwe kudzulu, cidabva imwe na fala ya ndimo mwene ya Mphangwa Zadidi

⁶zidafika mpaka kuna imwe. Pa dziko yonsene Mphangwa zenezi Zadidi zisabala misapu pontho mbikula ninga pinacitikambo kuna imwe, kutomera pa ntsiku idazibva imwe, mbamubvesesa kukoma ntima kwa Mulungu na undimo mwene wace onsene.

⁷Imwe mwapipfundza na Epafara, bichu ndzathu wakufunika, nyabasa wakunyindirika wa Kirixtu kuna imwe,

⁸adatipangambo pyakufunana kunacita imwe mu Nzimu Wakucena.

⁹Na thangwi eneyi, kutomera ntsiku idapibva ife, nkhabe neta kukuphembererani, pontho na kuphemba kuti mudzale na kudziwa pinafuna Mulungu, na udziwisi onsene pontho na kubvesesa kwa mu Nzimu.

¹⁰Penepi ndi toera mufambe ninga munafunira Mbuya, pontho pyonsene pikhale pyakun'tsandzaisa, mbamubala misapu ya mabasa onsene adidi, mbamukula na kudziwa Mulungu,

¹¹mbamuwangiswa na mphambvu zonsene, ninga munafunira mphambvu za mbiri yace, toera mukhale na kuwangisira konsene pontho mukhale na kupirira kwa kutsandzaya,

¹²mbamupereka takhuta kuna Baba, adakucitani[3] kuti mukwanire kudya unthaka wa mbumba ya Mulungu mu Umambo wa Cieza.

¹³Thangwi Iye atiombola mu mphambvu za n'cidima mbatikwata mbatiyendesa mu Umambo wa Mwana wace wakufunika.

¹⁴Muna Iye tinagumana kuombolwa,[4] ndiko kulekererwa kwa madawi.

¹⁵Iye ndi cipangizo ca Mulungu wakukhonda kuoneka, mwana wa utombo wa pyonsene pidacitwa

¹⁶thangwi muna Iye pyacitwa pinthu pyonsene pya kudzulu na pantsi, pinaoneka na pinakhonda kuoneka, mipando ya umambo, peno mphambvu za utongi, mphambvu za mizimu peno atongi, pinthu pyonsene pyacitwa na Iye pontho ndi pyace.

¹⁷Iye ndiye wakutoma pa pinthu pyonsene, pontho muna Iye pyonsene piciripo.

¹⁸Iye ndi nsolo wa manungo, ndiyo gereja. Ndiye wakutoma, pontho ndi mwana wa utombo adalamuka pakati pa anyakufa, toera pa pyonsene akhale wakutoma.

¹⁹Thangwi ndi kufuna kwa Mulungu kuti pyonsene pikwane muna Iye,

²⁰pontho na thangwi yace, pisekesane na Iye pinthu pyonsene piri pantsi pano na piri kudzulu, mbadzesa ntendere kubulukira mu ciropa cace cidacololeka pa ntanda.

²¹Kale ene imwe mukhadamwazana na Mulungu, pontho mu ndzeru zanu mukhali anyamalwa ace, mbamucita mabasa a kuipa.

²²Mbwenye cincino, kubulukira pa kufa kwa Mwana wace, mwasekesana na Iye ene Mulungu, toera akupangizeni patsogolo pace ninga mbumba yace, yakusowa thangwi pontho yakukhonda kusandikwa,

²³male mungakakamira kuwangisira mbamukhala dzololo pa kukhulupira, mbamukhonda kubuluka pa cidikhiro ca Mphangwa Zadidi zidabva imwe, zidamwaziwa kuna anthu onsene ali pantsi pa thambo. Ine Paulu ndadza kakhala nyabasa wa Mphangwa zenezi Zadidi.

²⁴Cincino ndiri kutsandzaya pa nyatwa zanga na thangwi yanu, pontho ndisamalisira m'manungo mwanga pire pidasalikira pa nyatwa za Kirixtu, pa thangwi ya manungo ace, manungo enewa ndi gereja.

²⁵Ndiyo idacitirwa ine kuti ndikhale nyabasa, ninga basa ya Mulungu idandinyindira Iye pa thangwi yanu, toera ndikupangizeni mwakukwana fala ya Mulungu.

²⁶Fala eneyi, ndi cinthu cakubisala cikhakhonda kudziwika pa midzidzi yakutoma na anthu akale, mbwenye cincino capangizwa kuna mbumba ya Mulungu.

²⁷Mulungu afuna kupasa kudziwa mbumba yace, mpfuma ya mbiri ya cinthu ceneci cakubisala kuna anthu adakhonda kukhala madjuda. Cinthu ceneci ndi Kirixtu ali muna imwe, cidikhiro ca mbiri.

²⁸Ife tisamulonga, mbaticenjeza na kupfundzisa m'bodzi na m'bodzi na udziwisi onsene, toera anthu onsene akhale akukwana muna Kirixtu.

²⁹Na thangwi eneyo, ine ndisawangisira mbandimenya nkhondo na mphambvu zace, zinaphata basa na kuwanga muna ine.