Read Cibverano Cipsa Cisena 1 Atesalonika 1 Bible Online

1 Atesalonika 1 - Cibverano Cipsa Cisena bible

1 Atesalonika 1

¹Ine Paulu, pabodzi na Silivano[1] na Timoti, ndisalembera abale a gereja ya ku Tesalonika, muna Mulungu Baba pontho na muna Mbuya Yezu Kirixtu.[2] Kukoma ntima na ntendere[3] mbapikhale na imwe.

²Midzidzi yonsene tisapereka takhuta kuna Mulungu na thangwi ya imwe monsene, na kukulongani pa maphembero athu, mbatikhonda kupuma,

³mbatikumbuka patsogolo pana Mulungu Baba wathu, basa inabulukira pa kukhulupira kwanu, na mphambvu inabulukira pa kufunana, pontho na kuwangisira kunabulukira pa kudikhira Mbuya wathu Yezu Kirixtu.

⁴Tisadziwa, imwe abale akufunika a Mulungu, kuti Iye akusankhulani

⁵thangwi Mphangwa Zadidi zidakupangani ife zidafika kuna imwe na mafala basi tayu, mbwenye zafikambo na mphambvu, na Nzimu Wakucena pontho na kunyindira konsene. Imwe musadziwa pidacita ife pakati panu, pa thangwi yanu.

⁶Pontho imwe mwakhala anthu akutikwatira luso na akukwatira luso Mbuya. Pakati pa nyatwa zizinji, imwe mwatambira fala na kutsandzaya kudabuluka kuna Nzimu Wakucena.

⁷Na tenepo, mwakhala anthu akukwatirwa luso kuna onsene anyakutawira Yezu ali ku dziko ya Masedhonya na ali ku dziko ya Akaya.

⁸Thangwi kubulukira kwa imwe, fala ya Mbuya yamwazika ku Masedhonya na ku Akaya. Si ku Masedhonya na ku Akaya basi tayu, mbwenye pontho kukhulupira kwanu kuna Mulungu kwadziwika mu mbuto zonsene. Pa thangwi eneyi, taona kuti nkhabe funikabve kuti tilonge pontho pinango,

⁹thangwi iwo ene asalonga kutambira kudaticita imwe, pontho na kuzungunuka kwanu kuna Mulungu, mbamusiya alungu apezi kuti muphatire basa Mulungu wa m'maso na wa ndimo mwene,

¹⁰pontho na kudikhira Mwana wace anafuna buluka kudzulu, adalamusa Iye pa kufa, ndiye Yezu, anadza katiombola pa kuipirwa kwa Mulungu kunafuna kudza.