Read Cibverano Cipsa Cisena 1 Atesalonika 3 Bible Online

1 Atesalonika 3 - Cibverano Cipsa Cisena bible

1 Atesalonika 3

¹Na thangwi eneyi, pidacimwana ife kupirira, taona kuti mphyadidi kukhala pyathu tekha ene ku nzinda wa Atena.

²Pontho tatuma Timoti, m'bale wathu, nyabasa wa Mulungu[5] pa Mphangwa Zadidi za Kirixtu, toera kuti akuwangiseni pontho akuphedzeni pa cikhulupiro canu,

³toera akhonde kuoneka munthu wakuzunguzika na nyatwa zenezi. Imwe musadziwa mwadidi mwene kuti ife tacemererwa thangwi eneyi.

⁴Thangwi pikhakhala ife pabodzi na imwe, tikhakupangani kale kuti tinadza kazondiwa, ndipyo pidadza kacitikadi, ninga musapidziwa.

⁵Na thangwi eneyo, na kucimwana kupirira, ndatuma Timoti toera adziwe cikhulupiro canu ciri tani, na kugopa kuti nyakunyengerera akwanisa kukuleserani, mbacita kuti basa yathu ikhali ya pezi.

⁶Mbwenye cincino, Timoti ali kufika kwene buluka kuna imwe, mbatipasa mphangwa zadidi pa thangwi ya cikhulupiro pontho na kufunana kunacitana imwe pakati panu. Iye atipanga kuti imwe musatikumbukira basi, mbamufuna kutiona, ninga ife tisafunambo kukuonani.

⁷Na thangwi eneyo, abale anga, pidabva ife cikhulupiro canu, pakusowa kwathu konsene pontho na pa nyatwa zathu, takhala anthu akumatamizika na thangwi yanu.

⁸Cincino tina mphambvu, thangwi imwe muli dzololo muna Mbuya.

⁹Tinapereka tani takhuta mwakukwana kuna Mulungu pa thangwi yanu, na kutsandzaya konsene kuna ife na thangwi yanu patsogolo pana Mulungu?

¹⁰Masiku na masikati tiri ciriri na kuphembera toera tikwanise kukuonani na maso athu, pontho tidzadzise pidaperewera pa cikhulupiro canu.

¹¹Kuti Iye ene Mulungu, Baba wathu, na Mbuya wathu Yezu asasanyire njira yathu mpaka kuna imwe.

¹²Mbuya mbacite kuti kufunana kwanu kukule kakamwe kuna m'bodzi na m'bodzi, pontho na kuna anthu onsene, ninga pinacita ifembo kuna imwe.

¹³Kuti Iye awangise mitima yanu pa kuperekeka kuna Mulungu, toera mukhale anthu akukhonda kusandikwa patsogolo pana Mulungu, Baba wathu, pakubwera kwa Mbuya wathu Yezu pabodzi na mbumba yace onsene.