Read Cibverano Cipsa Cisena 1 Atesalonika 4 Bible Online

1 Atesalonika 4 - Cibverano Cipsa Cisena bible

1 Atesalonika 4

¹Pakumalisa, abale anga, ife takupfundzisani kale kuti munakhala tani toera kutsandzaisa Mulungu, pontho ndimo mwene, imwe musacita penepi. Cincino tiri kuphemba na kukucenjezani muna Mbuya Yezu, kuti mupitirize kuthimiza na kucita penepi.

²Thangwi imwe musadziwa mitemo idakupasani ife na mphambvu za utongi wa Mbuya Yezu.

³Kufuna kwa Mulungu ndi kuti imwe mukhale akucena mbamukhonda kucita pyalukwali.

⁴M'bodzi na m'bodzi mbadziwe kukoya manungo[6] ace na makhaliro akucena pontho akulemedzeka,

⁵mbamukhonda kukundwa na kusirira pyakuipa, ninga anthu anakhonda kudziwa Mulungu.

⁶Pa thangwi eneyo, mbaleke kuoneka munthu wa kudawisira m'bale wace, peno kum'bera na ucenjeri. Thangwi ninga takupangani kale pontho mbatikucenjezani, Mbuya anadza kaonesa nyatwa onsene anacita penepi.

⁷Thangwi Mulungu hadaticemerera pyakuzuda tayu, mbwenye aticemerera kuceneswa.

⁸Na tenepo, ule anakhonda pinthu penepi, ali kukhonda munthu tayu, mbwenye ali kukhonda Mulungu anakupasani Nzimu Wakucena.

⁹Pa thangwi ya kufunana muubale, nkhabe funika tikulembereni pinango, thangwi imwe ene mwamala kupfundziswa kale na Mulungu kuti mufunane m'bodzi na m'bodzi.

¹⁰Pontho ndimo mwene, imwe musafuna abale onsene a ku dziko ya Masedhonya. Mbwenye tisakupangani abale anga, kuti mupitirize kuthimiza na kucita tenepo.

¹¹Wangisani toera mukhale na makhaliro akupfulika, mbamuonerera pinthu pyanu pontho mbamuphata basa na manja anu ene, ninga mudakupangani ife,

¹²toera mufambe mwakulungama pamaso pa anyakunja, pontho mukhonde kusowa cinthu.

¹³Abale anga, ife nkhabe funa kuti mukhale anthu akukhonda kudziwa pa thangwi ya ale anagona, toera muleke kutsukwala ninga anango adasowa cidikhiro.

¹⁴Ngakhala tisatawira kuti Yezu afa, pontho alamuka, tisatawirambo kuti ale anagona muna Yezu, Mulungu anaadzesa pontho pabodzi na Iye.

¹⁵Pinafuna ife kukupangani na fala ya Mbuya ndi kuti, ife tinafuna gumanika mbatiri m'maso, ife tinafuna sala mpaka kubwera kwa Mbuya, nkhabe kuathangira ale anagona.

¹⁶Thangwi pakubveka kwa n'khuwo wa utongi, na fala ya anju wankulu, na pakuimbwa kwa kaluta ya Mulungu, Iye ene Mbuya anadza kachita buluka kudzulu, pontho adafa muna Kirixtu ndiwo anadza katoma kulamuka.

¹⁷Buluka penepo, ife tinafuna gumanika mbatiri m'maso, ife tinafuna sala, tinadza kakwatiwa na mphambvu pabodzi na iwo mbatiyenda m'makole kagumana cidzulu-dzulu na Mbuya. Na tenepo, tinadza kakhala na Mbuya kwenda na kwenda.

¹⁸Na tenepo, matamizanani m'bodzi na m'bodzi na mafala enewa.