Read Cibverano Cipsa Cisena 1 Atesalonika 5 Bible Online

1 Atesalonika 5 - Cibverano Cipsa Cisena bible

1 Atesalonika 5

¹Abale anga, pa thangwi ya ntsiku na midzidzi inafuna kucitika ipyo, nkhabe funika kukulemberani,

²thangwi imwe ene musadziwa kakamwe kuti Ntsiku ya Mbuya inabwera ninga mbava na masiku.

³Pa n'dzidzi unalonga iwo kuti: “Tina ntendere na kukhazikika’’, ndi n'dzidzi unafuna kudza kafubza iwo na mwansanga, ninga kupha kunabva nkazi wakufuna kubala. Nkhabe munthu m'bodzi anafuna kudza kaithawa.

⁴Mbwenye imwe, abale anga, muli n'cidima tayu, kuti ntsiku eneyi ikututumuseni ninga mbava.

⁵Thangwi imwe monsene ndimwe ana a cieza pontho ndimwe ana a masikati. Sife a masiku peno a n'cidima tayu.

⁶Na tenepo, mbatilekeni kugona ninga anthu anango, mbwenye mbatikhaleni akulang'anira pontho na ndzeru.

⁷Thangwi ale anagona, asagona na masiku, pontho ale analedzera, asaledzera na masiku.

⁸Mbwenye ife anthu a masikati, mbitikhaleni a ndzeru, mbatibvala cikhulupiro na kufunana ninga nguwo za nkhondo, pontho mbatibvala cidikhiro ca upulumuki ninga capeu ca utale.

⁹Thangwi Mulungu hadatipikirira kutithabusa tayu, mbwenye toera titambire upulumuki kubulukira muna Mbuya wathu Yezu Kirixtu.

¹⁰Iye atifera toera kuti, peno tiri m'maso, peno tafa, tikhale akuphatana muna Iye.

¹¹Na thangwi eneyo, pasanani mphambvu pontho muphedzane m'bodzi na m'bodzi, sawa-sawa ninga munacitira imwe.

¹²Cincino, ndisakuphembani abale anga, kuti mulemedze ale anakhonda kuneta pakati panu, na basa ya kukutsogolerani na ya kukulangani muna Mbuya.

¹³Alemedzeni pikulu kakamwe na kuafuna na thangwi ya mabasa awo. Khalani mu ntendere m'bodzi na m'bodzi.

¹⁴Tisakupangani abale anga, kuti musandike anyakupunguluma,[7] pasani cipapu anyakugopa, phedzani anyakusowa mphambvu, khalani akupirira kuna onsene.

¹⁵Citani mphole kuti akhonde kuoneka munthu wa kubwezera ndzace kuipa na kuipa, mbwenye sakani udidi kuna m'bodzi na m'bodzi, pontho na kuna anthu onsene.

¹⁶Tsandzayani midzidzi yonsene,

¹⁷lekani kuneta na kuphembera,

¹⁸perekani takhuta pa pinthu pyonsene, thangwi kweneku ndi kufuna kwa Mulungu kuna imwe muna Kirixtu Yezu.

¹⁹Lekani kuthimisa Nzimu Wakucena.

²⁰Lekani kupwaza mafala a ciporofeta,

²¹mbwenye leserani pinthu pyonsene, mbamukoya pire pyadidi.

²²Thundani pinthu pyonsene pyakuipa.

²³Iye ene Mulungu wa ntendere akuciteni kuti mukhale akuperekeka kuna Iye pa pyonsene, kuti nzimu wanu, upulumuki wanu onsene, na manungo anu, akoyeke toera mukhonde kusandikwa pakubwera kwa Mbuya wathu Yezu Kirixtu.

²⁴Ule anakucemerani ndi wakunyindirika, Iye anapicita penepi.

²⁵Abale anga, tiphembererenimbo.

²⁶Mwanyikani abale onsene na mpsompsono wa ciubale.

²⁷Ndaphata myendo, ndisakuphembani patsogolo pana Mbuya, kuti muione tsamba iyi, ibviwe pamaso pa abale onsene.

²⁸Kukoma ntima kwa Mbuya wathu Yezu Kirixtu mbukukhale na imwe.