Read Cibverano Cipsa Cisena 2 Atesalonika 3 Bible Online

2 Atesalonika 3 - Cibverano Cipsa Cisena bible

2 Atesalonika 3

¹Pakumalisa, abale anga, tiphemberereni, toera fala ya Mbuya imwazike na mwansanga pontho ipaswe mbiri, ninga mudacitika kuna imwe.

²Tiphembererenimbo toera tiombolwe pa anthu anyakudawa na akuipa mitima, thangwi si anthu onsene ana cikhulupiro tayu.

³Mbwenye Mbuya ndi wakunyindirika. Iye anakupasani mphambvu mbakugugumirani kuna Nyamalwa.

⁴Ifembo tisakunyindirani muna Mbuya, kuti imwe musacita, pontho munathimiza basi na kucita pinthu pidakupangani ife.

⁵Mbuya mbatsogolere mitima yanu ipite mwakufuna kwa Mulungu na mwakupirira kwa Kirixtu.

⁶Abale, tisakupangani mu dzina ya Mbuya wathu Yezu Kirixtu, kuti mucalire abale onsene anyakupolola,[4] pontho mbakhonda kucita sawa-sawa na ntemo udatambira iwo[5] kuna ife.

⁷Imwe ene musadziwa kuti musafunika kutoweza pire pidacita ife, thangwi pikhakhala ife na imwe tikhakhala kwene mbatikhonda kuphata basa tayu.

⁸Pontho tikhadya ca munthu pezi pyene tayu. Mbwenye masiku na masikati tikhaphata basa ikulu na kuneta, toera tikhonde kulemera m'bodzi wanu.

⁹Sikulongera kuti ife nkhabe tawirirwa kuti ticitirwe penepi tayu, mbwenye ndi cipfundzo kwa imwe toera mutikwatire luso.

¹⁰Thangwi mukhakhala ife pabodzi na imwe, tikhakupangani tenepa: Munthu anakhonda kuphata basa, mbalekembo kudya.

¹¹Thangwi tabva kuti anango pakati panu mbanyakupolola. Iwo nkhabe phata basa, mbwenye mbacita pinthu pyapezi.

¹²Anthu enewa, tisaapanga mbitialanga muna Mbuya Yezu Kirixtu, kuti aphate basa mwakupfulika, mbadya pinaphata iwo na manja awo.

¹³Mbwenye kuna imwe abale, lekani kuneta na kucita udidi.

¹⁴Ngakhala alipo m'bodzi anakhonda kubvera pidalonga ife pa tsamba iyi, mulang'aniseni mwadidi, pontho lekani kukhala na iye pabodzi, toera akhale na manyadzo.

¹⁵Mphapo lekani kuncita ninga ndi nyamalwa, mbwenye nsandikeni ninga m'bale.

¹⁶Iye ene Mbuya wa ntendere, mbakupaseni ntendere pa midzidzi yonsene pontho na makhaliro onsene akusiyana-siyana. Mbuya mbakhale na imwe monsene.

¹⁷Ine Paulu ndisalemba m'mwanyikiro uyu na manja anga. Ici ndico cidzindikiro canga pa matsamba anga onsene. Malembero anga mbanewa.

¹⁸Kukoma ntima kwa Mbuya wathu Yezu Kirixtu mbukukhale na imwe monsene.