Read Cibverano Cipsa Cisena 1 Timoti 5 Bible Online

1 Timoti 5 - Cibverano Cipsa Cisena bible

1 Timoti 5

¹Leka kusandika mamuna nkulu na ukali, mbwenye umulange ninga babako ene. Langa aphale ninga abale ako.

²Langa akazi akulu ninga amai wako, pontho langa atsikana na ntima wakucena, ninga abale ako aakazi.

³Koya akazi adaferwa na amuna awo, ale anyakusoadi.

⁴Mbwenye ngakhala nkazi adaferwa na mamuna ana anace, peno ana adzukulu ace, asatongwa kuti atome ndiwo kupfundza kuncitira ntsisi pa nyumba pawo, mbaabwezera udidi udacitirwa iwo na anyakubala, thangwi penepi ndi pinakomerwa na Mulungu.

⁵Nkazi adaferwa na mamuna, ule adacherengadi pontho mbasowa munthu wakum'phedza, asaikha cidikhiro cace kuna Mulungu, pontho asakakamira kuphembera na kudembetera masiku na masikati.

⁶Mbwenye kuna ule anasaka pyadziko ino basi, asakhala ninga ali m'maso mbwenye iye afa.

⁷Apange pinthu penepi toera akhonde kukhala akusandikwa.

⁸Ngakhala alipo munthu anakhonda kukoya abale ace, maka-maka a pa nyumba pace, akhonda cikhulupiro, pontho apiringana ule adakhonda kutawira Yezu.

⁹Nkhabe nkazi m'bodzi anafuna kulemberwa dzina yace pa tsamba ya anyakuferwa na amuna, mbakhonda kukhala na pyaka makumatanthatu pyakubalwa, mbakhala na mamuna m'bodzi basi,

¹⁰pontho akhale wakudziwika pa mabasa ace adidi, ninga akukoya ana, akutambira alendo, akutsuka myendo mbumba ya Mulungu, akuphedza ali pa nyatwa, pontho mbacita basa yonsene yadidi.

¹¹Mbwenye leka kulembera akazi ang'ono adaferwa na amuna awo, thangwi cidadumbirira iwo Kirixtu cingakundiwa na pinthu pya nyama, asafuna acite pontho banja.

¹²Na tenepo, iwo anakhala anthu akutongwa, na thangwi ya kusiya cidumbiriro cawo cidacita iwo pakutoma.

¹³Si basi penepi tayu, asapfundza kupolola, mbafamba nyumba na nyumba. Pontho si kupolola basi tayu, mbwenye ndi anyapseda asapitirira pinthu kuti si pyawo, mbalonga pinthu pyakukhondeswa kulonga.

¹⁴Na tenepo, ndisafuna kuti akazi ang'ono adaferwa na amuna awo, akhale na banja, alere ana awo, akhonde kupasa nyamalwa njira ya kutixola nayo.

¹⁵Thangwi anango amala buluka mbaenda mbatowera Sathani.

¹⁶Ngakhala alipo nkazi[5] wakutawira Yezu ana abale adaferwa na amuna awo, asafunika aaphedze. Mbaleke kupasa basa abale a gereja, toera akazi adaferwa na amuna awo akusowadi anyakuaphedza, aphedziwe.

¹⁷Akulu anatsogolera mwadidi gereja, asafunika alemebze kawiri,[6] maka-maka ale anacita basa yakumwaza Mphangwa Zadidi na ya kupfundzisa,

¹⁸thangwi Bukhu ya Mulungu isalonga kuti: “Leka kumanga mulomo wa ng'ombe, pa n'dzidzi unating'inda iyo tirigu na nyondo.” Pontho isalonga kuti: “Nyabasa asatongwa atambiriswe.”

¹⁹Leka kubvera munthu anasumira nkulu awa gereja, angakhonda kukhala na anyamaso awiri peno atatu.

²⁰Ale anadawa asandike pakweca, toera anangombo agope.

²¹Ndisakupanga mwakukwana patsogolo pa Mulungu na pa Kirixtu Yezu, pontho na pa maanju adasankhulwa, kuti ukoye mitemo ixi, mbumukhonda kusankhula peno kulang'ana nkhope.

²²Leka kucimbiza kuikha munthu manja, pontho leka kukhala pa nsoka wa anthu anango anacita kudawa. Khala munthu wakucena ntima.

²³Leka kukhala mbumwa madzi basi tayu, mwambo pang'ono vinyu na thangwi ya m'mimba mwako, pontho na thangwi ya kuduwala kunakhala mbucita iwe.

²⁴Kudawa kwa anango kusaonekera pakweca mbadzati kutongwa. Mbwenye kwa anango, kusaonekera pakumalisa.

²⁵Sawa-sawambo mabasa adidi asaonekera, pontho ale anakhonda kuonekera, aleke kukhala akubisala.