Read Cibverano Cipsa Cisena 2 Timoti 3 Bible Online

2 Timoti 3 - Cibverano Cipsa Cisena bible

2 Timoti 3

¹Mbwenye dziwa pinthu ipi: pa ntsiku zakumalisa, inafika midzidzi yakunentsa.

²Anthu anadza kafuna pyawo basi, anadza kakhala akuumirwa na kobiri, akudungudza, akupikuza, akuxola, akukhonda kubvera anyakubala, akukhonda kusimba, anyakuipa mitima,

³akukhonda kufuna andzawo, akukhonda kulekererana, anyapseda, akukhonda kuphata ntima, asumankha, anyamalwa a udidi,

⁴anyakusandukira andzawo, anyakucimbizira pinthu, anyakugaya, anyakufuna pikulu kakamwe na pinatsandzaisa manungo, kupiringana kucita uxamwali na Mulungu,

⁵mbakhala ninga ana cilemedzo na pyakuphembera, mbwenye asakhonda mphambvu zace. Anthu enewa athawembo.

⁶Anango pa nsoka wawo ndiwo anapita m'manyumba nyembere-nyembere mbaenda na nyengerera akazi akusowa ndzeru, akudzala na madawi, anthu akutowerera pyonsene pinasirira iwo.

⁷Midzidzi yonsene akazi enewa asakhala mbapfundza, mbwenye nkhabe kwanisa kufikira kudziwa pya ndimo mwene.

⁸Ninga Djanasi na Djamberi akhapokanyisa Mozesi, iwombo awa onsene asakhonda kubvera pya ndimo mwene. Ndzeru zawo zamala kutaika. Pinakhulupira iwo mphyapezi.

⁹Mbwenye iwo hanafika kutali tayu. Thangwi udzemwa wawo, unapangizika kuna anthu onsene, ninga pidacitikambo kuna ale.

¹⁰Mbwenye iwe usatowerera mwadidi mapfundzisiro anga, makhaliro anga, pinanyerezera ine kucita, kukhulupira kwanga, kupirira kwanga, kufuna kunacita ine abale, kuwangisira kwanga,

¹¹kuzondiwa kwanga, pontho na nyatwa zidaona ine, pinthu pidandicitikira ku mizinda ya Antiyokiya, Ikonyo na Lixtara. Kangasi mbindipirira kuzondiwa! Mbwenye Mbuya andipulumusa pa pyonsene ipi.

¹²Ndimo mwene, ale onsene anafuna kukhala mwakuphembera muna Kirixtu Yezu, anazondiwa.

¹³Mphapo anyakuipa mitima, na anyakunyengeza andzawo, anadza katekereratu kunyengeza iwo mbanyengezwambo.

¹⁴Mbwenye iwe, kakamira pinthu pidapfundza iwe, pire pidakupita muntima, thangwi usaadziwa mbani adakupfundzisa.

¹⁵Thangwi kutomera pa uwana wako, iwe usapidziwa pidalembwa m'Bukhu ya Mulungu, pinakwanisa kukukhalisa na udziwisi toera upulumuke, kubulukira pa kukhulupira kudacita iwe muna Kirixtu Yezu.

¹⁶Pyonsene piri m'Bukhu ya Mulungu ndi pya Nzimu wa Mulungu, pontho mphyadidi toera kupfundzisa, kusandika, kulanga, na kupfundzisa mwakulungama,

¹⁷toera munthu wa Mulungu akhale wakukwana, na wakusasanyika kakamwe toera kucita basa yonsene yadidi.