Read Cibverano Cipsa Cisena Titu 2 Bible Online

Titu 2 - Cibverano Cipsa Cisena bible

Titu 2

¹Mbwenye iwe Titu, longa ninga munalongera cipfundzo cakulungama.

²Apfundzise amuna akulu akhale anthu a ndzeru, akulemedzeka, akukhurudzika, akunyindirika, akulungama pa kukhulupira, na pa kufunana na pa kupirira.

³Ndi pibodzi-bodzi kuna akazi akulu, apfundzise kuti akhale na makhaliro akuphembera Mulungu, mbakhonda kulonga mapseda, pontho akhonde kukundwa na vinyu, mbwenye akhale akazi akupfundzisa udidi,

⁴toera apfundzise akazi ang'ono kuti afune amuna awo na ana awo,

⁵akhale akukhurudzika, akucena ntima, mbakoya nyumba zawo, akhale adidi pontho akubvera amuna awo, toera fala ya Mulungu ikhonde kuxolwa.

⁶Ndi pibodzi-bodzi kuna aphale, apase cipapu kuti akhale akukhurudzika.

⁷Pa pyonsene, cita mabasa adidi kuti iwo akwate luso kuna iwe. Kupfundzisa kwako kukhale kwakukwana, pontho kwa ndimo mwene.

⁸Khala na malongero akulungama, a kuti nkhabe munthu anafuna kuasandika, toera ale anakupokanya akhale na manyadzo na thangwi yakusowa cinthu ca kutilonga kuipa.

⁹Adzakazi asafunika abvere a mbuya awo pa pyonsene, asake kuatsandzaisa, akhonde kupokanyisana na iwo,

¹⁰akhonde kubera a mbuya awo, mbwenye apangize kuti ndi anthu akunyindirika mwakukwana, toera tenepa, cipfundzo ca Mulungu Mpulumusi wathu cisirirwe pa pyonsene.

¹¹Thangwi kukoma ntima kwa Mulungu kunapulumusa, kwapangizwa anthu onsene.

¹²Ntsisi zenezi zisatipfundzisa kuti tisiye kuipa na kusirira pinthu pya padziko, toera tikhale na kukhurudzika, na kulungama, na kulemedza pya kuphembera pa midzidzi ino,

¹³pa n'dzidzi unadikhira ife kubwera kwa mbiri ya Mulungu wathu wa nkulu, Mpulumusi wathu Yezu Kirixtu, ndico cidikhiro cathu ca kutsandzaya.

¹⁴Iye aperekeka pa thangwi yathu toera atiombole pa madawi athu onsene, pontho aticenese kuti tikhale mbumba ibodzi yace basi, toera tikhale anthu akufuna kuphata mabasa adidi.

¹⁵Penepi ndipyo pinatongwa iwe kupfundzisa, na kualanga mbuasandika na mphambvu zonsene za utongi. Mbakhonde kuoneka munthu wa kukupwaza.