Read Cibverano Cipsa Cisena Filimoni 1 Bible Online

Filimoni 1 - Cibverano Cipsa Cisena bible

Filimoni 1

¹Ine Paulu, nyakufungirwa n'kaidi na thangwi ya Kirixtu[1] Yezu, pabodzi na m'bale wathu Timoti, ndisalemba tsamba iyi kuna iwe Filimoni, ndzathu wakufunika pa basa,

²pontho na kuna mwana-nkazi wathu Afya, na kuna Arikipu ndzathu wa pa nkhondo, na kuna abale a gereja anaphembera na iwe pa nyumba pako.

³Kukoma ntima na ntendere unabulukira kuna Mulungu Baba wathu na kuna Mbuya Yezu Kirixtu, mbipikhale na imwe.

⁴Ndisapereka takhuta kuna Mulungu wanga kwenda na kwenda, mbandikukumbuka pa maphembero anga,

⁵thangwi ndisabva anthu mbalonga kufuna kunacita iwe mbumba yonsene ya Mulungu, na kukhulupira kunacita iwe Mbuya Yezu.

⁶Ndisaphembera kuna Mulungu kuti kuphatana kwathu kudabulukira pa cikhulupiro cako, kukhale na mphambvu pa kudziwa mwakukwana udidi onsene uli na ife muna Kirixtu.

⁷Mafuniro ako anacita iwe anthu asanditsandzaisa na kundibalangaza, thangwi iwe m'bale wanga usapasa cipapu mitima ya mbumba ya Mulungu.

⁸Na thangwi eneyi, ine ndina mphambvu zonsene muna Kirixtu, zakukwanisa kukupanga kuti iwe ucite pire pinatongwa iwe kucita.

⁹Mbwenye na thangwi ya kufunana, ndanyerezera kuti ndicite kukuphemba. Ine Paulu ninga nkhalamba, pontho cincino ninga nyaperezo na thangwi ya Kirixtu Yezu,

¹⁰ndisakuphemba na thangwi ya mwana wanga Onezimu,[2] adabala ine mu Nzimu mbindiri n'kaidi.

¹¹Kale ene, iye akhali munthu wakukhonda kufunika kuna iwe, mbwenye cincino ndi munthu wakufunika kuna iwe na kuna ine.

¹²Ndisam'bweza pontho kuna iwe, ntambire ninga usatambira ntima wanga.

¹³Ndikhanfuna kuti akhale na ine toera andiphedze pa mbuto yako, pa n'dzidzi uno unakhala ine n'kaidi na thangwi ya Mphangwa Zadidi.

¹⁴Mbwenye ndakhonda cita cinthu ndekha ene, mbindikhonda kubverana na iwe, toera udidi wako ukhonde kukhala wa kukakamizwa, mbwenye upicite na kufuna kwako.

¹⁵Panango ndi thangwi eneyi ikhadamwazana iye na iwe pa n'dzidzi unowu ung'ono, toera angabwerera, ukhale na iye kwenda na kwenda,

¹⁶si ninga n'dzakazi pontho tayu, mbwenye apiringana pa udzakazi, ndi ninga m'bale wakufunika. Kwa ine ndi m'bale wakufunika kakamwe, maka-maka kwa iwe, ninga munthu pontho ninga nyakutawira Mbuya.

¹⁷Na tenepo, ngakhala iwe usandiona ninga ndzako pa kukhulupira, ntambire ninga usatambira ine.

¹⁸Ngakhala Onezimu akudawisira cinthu, peno ana mangawa na iwe, pinthu penepi mbipikhale kuna ine.

¹⁹Ine Paulu, ndisalemba na manja anga. Ine ndinakubwezera pyonsene. Kweneku nkhucimwana kukupanga kuti iwe ene, unamangawa na ine pa upulumuki wako.

²⁰Ande m'bale wanga, ndikhafuna undibverembo ntsisi muna Mbuya. Pasa cipapu ntima wanga muna Kirixtu.

²¹Ndisakulembera tsamba iyi mbindinyinda kuti iwe unandibvera, pontho ndisadziwa kuti unacita pizinji kupiringana penepi pinakuphemba ine.

²²Ndisaphemba pontho kuti mundisasanyire pakufikira, thangwi na maphembero anu, ndisadikhira kuti ndinati ndibwezwe pontho kuna imwe.

²³Epafara, ndzanga ali na ine pabodzi n'kaidi na thangwi ya Kirixtu Yezu, asakuwangisa.

²⁴Asakuwangisambo pontho Marku, Arixitariku, Dhema na Luka, andzanga a pa basa.

²⁵Kukoma ntima kwa Mbuya Yezu Kirixtu mbakukhale na nzimu wanu.[3]