Read Cibverano Cipsa Cisena Hebhereu 13 Bible Online

Hebhereu 13 - Cibverano Cipsa Cisena bible

Hebhereu 13

¹Khalani basi na kufunana muubale wa Kirixtu.

²Lekani kuduwala kukhala na ntima wakutambira alendo. Thangwi anango, na kucita penepyo, akwanisa kutambira maanju, iwo mbakhonda kupidziwa.

³Kumbukani ali n'kaidi ninga muli na iwo pabodzi. Kumbukani anaoneswa nyatwa, ninga ndimwe ene munaoneswa nyatwa.

⁴Banja mbikhale yakulemedzeka kuna anthu onsene. Bonde ya banja mbikhale yakulungama, thangwi Mulungu anadza katonga anyalukwali na anyaupombo.

⁵Lekani kukundwa na ntima wa kufuna kobiri, mbwenye komerwani na pina imwe, thangwi Iye ene Mulungu alonga kuti: “Cipo ndinadza kakusiya, pontho cipo ndinadza kakuthawa.”

⁶Thangwi tinakwanisa kulonga na kunyindira konsene kuti: “Mbuya ndiye nyakundiphedza, ine nkhabe kudza kagopa cinthu. Munthu anandicitanji?”

⁷Kumbukani atsogoleri anu, adakupangani fala ya Mulungu. Lang'anisani mwadidi makhaliro akhacita iwo, pontho towezani kukhulupira kwawo.

⁸Yezu Kirixtu ndi m'bodzi ene dzulo, lero na kwenda na kwenda.

⁹Lekani kutowerera pipfundzo pyapezi pyakusiyana-siyana. Thangwi pyadidi nkhuwangisira mitima yathu na kukoma ntima kwa Mulungu, mbatikhonda kuwangisira na mitemo ya pyakudya, pinakhonda kuphedzera kuna ale anapidya.

¹⁰Ife tinayo guwa ya ntsembe. Penepo nkhabe kutawirirwa kuti adyerepo ale anaphata basa mu khumbi ya ntsembe ya Mulungu.

¹¹Nkulu wa anyantsembe asakwata ciropa ca pinyama mpaka ku Mbuto Yakuceneratu Kakamwe, ninga ntsembe yakulekerera madawi. Mbwenye manungo a pinyama asapisiwa kunja kwa makumbi.

¹²Ndi thangwi eneyo Yezu aonambo nyatwa kunja kwa nsuwo wa nzinda wa Djerusalema, toera kucenesa mbumba na ciropa cace.

¹³Na tenepo, mbatibulukeni tiyende kuna Yezu, kunja kwa makumbi, mbatipirirambo kunyadziswa kudapirira Iye.

¹⁴Thangwi pano, ife nkhabe nzinda ubodzi wa kwenda na kwenda, mbwenye tisasaka nzinda unafuna kudza.

¹⁵Na tenepo, na mphambvu za Yezu mbatiperekeni ntsiku zonsene kuna Mulungu ntsembe ya kunsimba nayo. Unowu ndiwo nsapu wa milomo inakuza dzina yace.

¹⁶Lekani kuduwala kucita udidi, mbamugawana pina imwe m'bodzi na m'bodzi, thangwi ntsembe zenezi ndizo zinakomerwa na Mulungu.

¹⁷Bverani atsogoleri anu, mbamucita pinakupangani iwo. Iwo ndiwo anakuonererani ninga ale anafuna kukutawirirani kuna Mulungu. Abvereni, toera mabasa awo akhale akutsandzaya, mbakhonda kualemera. Thangwi angaalemera, nkhabe kukuphedzerani cinthu.

¹⁸Tiphemberereni. Ife tisadziwa kuti tina manyerezero a muntima adidi, pontho tisafuna kukhala na makhaliro akulemedzeka pa pyonsene.

¹⁹Maka-maka kuna ine, ndisakuphembani kuti mundiphemberere toera ndibwerere pontho kuna imwe na mwansanga.

²⁰Mulungu wa ntendere, adalamusa pa kufa Mbuya wathu Yezu, Nkumbidzi wankulu wa mabira, na thangwi ya ciropa ca cibverano ca kwenda na kwenda,

²¹mbakuciteni kuti mukhale anthu akukwana pa udidi onsene, toera mucite kufuna kwace, pontho acite muna ife[11] pire pinan'tsandzaisa patsogolo pace, na thangwi ya Yezu Kirixtu, Ule anafunika kupaswa mbiri ya kwenda na kwenda. Ameni.

²²Abale anga, ndisakuphembani kuti mupirire mafala anga akukulangani. Ndimo mwene, ipi pidakulemberani ine ndi ping'ono.

²³Ndisafuna kukudziwisani kuti m'bale wathu Timoti akhuciwa n'kaidi. Angafika cincino, ndinadza kakuonani pabodzi na iye.

²⁴Munawangisa atsogoleri anu onsene, na mbumba ya Mulungu yonsene. Abale a ku dziko ya Italya asakuwangisani.

²⁵Kukoma ntima kwa Mulungu mbukukhale na imwe monsene.