Read Cibverano Cipsa Cisena Hebhereu 4 Bible Online

Hebhereu 4 - Cibverano Cipsa Cisena bible

Hebhereu 4

¹Mphapo mbatigopeni, kuti pakusiyirwa kwathu cidumbiriro ca kupita pa kupuma kunabuluka kuna Mulungu, paleke kuoneka m'bodzi wanu wakuluza.

²Thangwi Mphangwa Zadidi zidatambira ife, ndi zibodzi-bodzi ninga zidatambira iwo, mbwenye iwo zidaaphedzera cinthu tayu, thangwi azibva mbakhonda kuzitambira na cikhulupiro.[4]

³Mphapo ife adatawira, ndife anafuna pita pa kupuma kweneku, ninga mudalongera Mulungu kuti: “Na tenepo, ndadumbira na kuipirwa kuti: Cipo iwo anadza kapita pa mbuto yanga ya kupuma.” Mbwenye Mulungu akhadamala kale kucita mabasa ace, kubulukira pakucitwa kwa dziko.

⁴Thangwi pa mbuto inango iye alonga pa thangwi ya ntsiku yacinomwe na mafala awa: “Pa ntsiku yacinomwe, Mulungu apuma pa mabasa ace onsene.”

⁵Pibodzi-bodzi pyalongwa pontho kuti: “Cipo iwo anadza kapita pa mbuto yanga ya kupuma.”

⁶Na tenepo, asala anango kuti apite pa mbuto eneyi yakupuma. Ale akutoma adabva Mphangwa Zadidi acimwana kupita, na thangwi yakukhonda kubvera.

⁷Na thangwi eneyo, Mulungu aikha pontho ntsiku ibodzi mbaicemera “lero’’, pakulonga na Dhavidhi pa kupita pyaka pizinji, ninga mukhadalongerwa ipyo kuti: “Ngakhala imwe lero mwabva fala yace, lekani kuumisa mitima yanu.”

⁸Thangwi ngakhala Djosuwa akhadaapasa kupuma, Mulungu mbadalongabve tayu pa thangwi ya ntsiku inango.

⁹Na tenepo, kuna mbumba ya Mulungu, yasala pontho ntsiku ibodzi ya kupuma, ninga ntsiku yacinomwe.

¹⁰Thangwi onsene ale anapita pa mbuto ya kupuma ya Mulungu, asapumambo pa mabasa awo, ninga Mulungu apuma pa mabasa ace.

¹¹Na tenepo, mbitiwangisireni kuti tipite pa mbuto eneyi ya kupuma, toera pakhonde kuoneka munthu wa kugwa, mbatoweza macitiro a ale ambuya anu adakhonda kubvera.

¹²Thangwi fala ya Mulungu isapulumusa, pontho inamphambvu. Iyo nja kutwa kakamwe kupita matarasada onsene anaceka khundu na khundu. Isapita mpaka pakati-na-kati padagawika nzimu na ndzeru, m'mafunyiro a magogodo na mu unong'o-nong'o, mbiweza manyerezero na ndzeru za muntima.

¹³Nkhabepo cinthu cidacitwa mbicikhonda dziwika na Mulungu. Pyonsene pisadziwika, pontho piri pakweca pamaso pa Ule anafuna kutonga mabasa athu.

¹⁴Na tenepo, tinaye nkulu m'bodzi wa anyantsembe adapita kudzulu kakamwe, ndiye Yezu, Mwana wa Mulungu. Na thangwi eneyo mbatiphatisiseni cikhulupiro cinacitira ife umboni.

¹⁵Thangwi nkulu wathu unowu wa anyantsembe, si munthu ene wakukhonda kukhala na ntsisi na kusowa kwathu mphambvu tayu. Mbwenye iye ndi munthu ninga na ife, adapita pa kunyengererwa konsene, mbakhonda kupita n'kudawa.

¹⁶Na tenepo, mbatifendedzereni pa mpando wa umambo, wa kukoma ntima kwa Mulungu na kunyindira konsene, toera tibverwe ntsisi pontho tigumane kukoma ntima kwa Mulungu kunatiphedza pa n'dzidzi wakufunika.