Read Cibverano Cipsa Cisena Tiyago 1 Bible Online

Tiyago 1 - Cibverano Cipsa Cisena bible

Tiyago 1

¹Ndine Tiyago, n'dzakazi wa Mulungu na wa Mbuya Yezu Kirixtu.[1] Ndisalembera madzindza khumi na mawiri[2] adamwazika pa dziko yonsene kuti: Mbawange.

²Abale anga, mphyakutsandzaisa kakamwe mungagwerwa na nyatwa za kuleserwa kwakusiyana-siyana,

³thangwi imwe musadziwa kuti kuleserwa kwa cikhulupiro canu, kusabala kupirira.

⁴Kupirira kweneku mbukukhale kwakukwana, toera imwe mukule pontho mulungame, mbamukhonda kusowa cinthu cibodzi.

⁵Ngakhala m'bodzi wanu nkhabe ndzeru, mbaziphembe kuna Mulungu. Iye asapasa onsene na ntima wakucena, mbakhonda kukupasani manyadzo. Munthu unowu, anadza kazitambira.

⁶Mbwenye mbaphembe na kukhulupira, mbakhonda kupenula. Thangwi ule anapenula alandana na bimbi ya m'bara, inakwatiwa na mphepo mbiyenda uku na uku.

⁷Munthu unowu mbaleke kunyerezera kuti anapaswa cinthu na Mbuya,

⁸thangwi ana ndzeru ziwiri, pontho nkhabe kupidziwa pinafuna iye, pa pyonsene pinacita iye.

⁹Mbwenye m'bale wakupicepesa, mbatsandzaye pa kukuzwa kwace na Mulungu.

¹⁰Pontho m'bale m'pfumi mbatsandzaye pa kupwazwa kwa mpfuma yace na Mulungu, thangwi iye anadza kauma ninga maluwa a n'tsanga.

¹¹Thangwi dzuwa isagaka mbipisa, tsanga isauma. Na tenepo, maluwa ace asagwa, kubalika kwawo kusamala. Sawa-sawambo na m'pfumi, anadza kanyala pakati pa mabasa ace.

¹²Mbatsandzaye ule munthu anapirira pa kuleserwa, thangwi angakunda kuleserwa, anadza katambira nthimba[3] ya upulumuki idapikirira Mulungu kuna ale ananfuna.

¹³Munthu anganyengererwa, mbaleke kulonga kuti: “Ndisanyengererwa na Mulungu.” Thangwi Mulungu nkhabe kwanisa kunyengererwa na kuipa, pontho nkhabe nyengerera munthu.

¹⁴Mbwenye m'bodzi na m'bodzi asanyengererwa na pyakuipa pinasirira iye, ndipyo pinankwewa mbipin'nyengerera.

¹⁵Na tenepo, kusirira kweneku angakutawira, kusabala kudawa. Kudawa kungakula, kusabala kufa.

¹⁶Abale anga akufunika, lekani kunyengezwa tayu.

¹⁷Miyoni yonsene yadidi na yakukwana inapaswa ife, isabuluka kudzulu, mbichita buluka kuna Baba wa cieza consene. Iye nkhabe cinjika makhaliro ace ninga mithundzi inakhala mbicinjika.

¹⁸Na kufuna kwace, Iye atibala na fala ya ndimo mwene, toera tikhale ninga misapu yakutoma pa pyonsene pidacita Iye.

¹⁹Abale anga akufunika, dziwani kuti: Monsene khalani akusasanyika toera kubva, mudembuke na kulonga, pontho mudembuke na kuipirwa,

²⁰thangwi kuipirwa kwa munthu nkhabe kubala kulungama kunafuna Mulungu.

²¹Na tenepo, siyani pyakunyanyasa pyonsene na kuipa kuzinji kudasala na imwe, mbumutambira na kupicepesa konsene fala idachekwa muna imwe inamphambvu za kukupulumusani.

²²Khalani anthu akucita pinalonga fala, mukhonde kukhala anyakubva basi, mbumunyengezeka mwekha ene.

²³Ule anabva fala mbwenye mbakhonda kucita pinalonga iyo, asalandana na munthu analang'ana nkhope yace pa supeyo,

²⁴pontho angamala lang'anisika ekha ene, asabuluka, pa n'dzidzi ubodzi-bodzi mbaduwala makhaliro a nkhope yace.

²⁵Mbwenye munthu analang'anisisa mwadidi mwambo wakukwana unadzesa ufulu, mbapirira na kuutoweza mwambo unowu, mbakhonda kuduwala pidabva iye mbwenye mbaucita, anakhala na kutsandzaya na pire pinaphata iye.

²⁶Munthu ananyerezera kuti ndi nyakulambira Mulungu, mbwenye mbakhonda kuphata lirimi yace, asanyengezeka ekha ene. Kulambira kwace nkhwapezi!

²⁷Kulambira kwa ndimo mwene na kwakukwana kunafuna Mulungu Baba wathu ndi uku: kuphedza amphawi, na akazi adaferwa na amuna awo pa nyatwa zinaona iwo, pontho mbukhonda kuswipiswa na pinthu pyakunyanyasa pya padziko.