Read Cibverano Cipsa Cisena Tiyago 4 Bible Online

Tiyago 4 - Cibverano Cipsa Cisena bible

Tiyago 4

¹Kodi nkhondo na nthonga ziri pakati panu, zisabulukira kupi? Nkhabe bulukira pakusirira kunamenyana n'kati[7] mwanu tayu?

²Imwe musasirira pinthu, mbwenye nkhabe pina imwe. Musapha, musakhala na bibvu, mbwenye nkhabe kwanisa pinafuna imwe. Imwe musakhala mbamumenyana na kucita nkhondo. Imwe nkhabe pinthu, thangwi nkhabe phemba.

³Mungaphemba nkhabe kupipaswa, thangwi musapiphemba mwadidi tayu. Musapiphemba toera kupibvunga na pinasirira imwe.

⁴Imwe anyaupombo, nkhabe dziwa kuti kucita uxamwali na dziko nkhukhala nyamalwa wa Mulungu? Ule anafuna kukhala xamwali wa dziko, asakhala nyamalwa wa Mulungu.

⁵Kodi musanyerezera mphyapezi pinalonga Bukhu ya Mulungu kuti: “Nzimu udaikha Iye muna ife, una nchanje ikulu kakamwe?”

⁶Mbwenye Iye asatipangisa kukoma ntima kwace kukulu. Na thangwi eneyo Bukhu ya Mulungu isalonga tenepa: “Mulungu asaidana na anapikuza, mbwenye asapangisa kukoma ntima kwace ale anacepeseka.”

⁷Na tenepo, bverani Mulungu. Khondani Dyabu, iye anakuthawani.

⁸Fendedzerani Mulungu, Iye anakufendedzeranimbo. Imwe anyakudawa, sambani manja. Cenesani mitima yanu imwe ana ndzeru ziwiri.

⁹Tsukwalani, bulirani pontho lirani. Cinjani kuseka kwanu kudze kulira, kutsandzaya kwanu kudze kutsukwala.

¹⁰Cepesekani patsogolo pa Mbuya, Iye anadza kakukuzani.

¹¹Abale anga, lekani kulongana kuipa m'bodzi na m'bodzi. Analonga ndzace kuipa peno mbakonesa m'bale wace, ali kulonga kuipa mwambo, pontho asakonesa mwambo. Mphapo ngakhala iwe usakonesa mwambo, huli kutoweza mwambo tayu, mbwenye usakhala ninga nyakutonga mwambo.

¹²Alipo m'bodzi basi anacita mwambo na anatonga miseru, ule anakwanisa kupulumusa na kupha. Mbwenye iwe ndiwe ani kuti ukonese ndzako?

¹³Cincino bveserani imwe analonga kuti: “Lero peno mangwana tinaenda ku nzinda uyu peno ku nzinda ule. Kweneko tinakhala caka cibodzi mbaticita malonda anthu, pontho tinawina kobiri.”

¹⁴Imwe nkhabe kupidziwa pire pinafuna kukucitikirani mangwana! Upulumuki wanu pa nyama ndi ninji? Imwe musakhala ninga nkhungwi, isaoneka n'dzidzi pang'ono, ingamala mbimwazika.

¹⁵Imwe musatongwa kulonga tenepa: “Mbuya angafuna, tinakhala m'maso pontho tinacita ipi peno ipi.”

¹⁶Mbwenye cincino imwe musagaya na manyerezero anu. Kugaya konsene ninga uku, nkhwakuipa.

¹⁷Na tenepo, ule anadziwa kuti asatongwa kucita udidi mbakhonda kuucita, ali kudawa.